La Dilixencia

 

El títulu ye probable qu’a la mayoría del personal, especialmente a los de cierta edá, yos-traiga alcordances de John Wayne y John Ford, y aquella película esplendida del oeste cargada d’estereotipos; pero esti escribidor ta pensando naquelles dilixencies que, hasta l’apertura de la Rampa de Payares, allá pol llonxanu 1885, facíen el percorríu d’Uviéu a Madrid nun fugaz ralu de cinco díes, a unos precios descomanaos pa la dómina, incluyíos los que s’acomodaben na baca del vehículu a mercé de les inclemencies del tiempu. yera lo qu’había, y yá entós yera mui caro viaxar a la capital del reinu.

Too ello viénome a la tiesta coles noticies caberes tocantes a la puesta en marcha de la Variante de Payares pal primer semestre de 2023. Noticies que suponen la enésima ocasión qu’ello s’anticipa y que convien poner ente comines, por aquello de la prudencia en tiempos d’afliximientu; anque esta vegada la cosa debe dir meyor empobinada pos en Xixón yá decidieron nomar como Rosario Acuña a la estación de Moreda futura, anque, anciosos ellos, tamién se va llamar asina l’actual, por si acasu.

Cuando a fines del XIX s’acometió’l proyectu de la Rampa, que diba dexar orellaos a los vieyos arrieros que corríen col pesu del tresporte comercial na rexón de nueso, dióse un impulsu fundamental a Asturies, qu’entós atopábase en plenu surximientu del fenómenu mineru y que diba conllevar a la construcción casi inmediata de los muelles de Fomentu nel pueblerín Xixón, embaeciu na so autocomplacencia xovellanista. Percima d’aquelles travieses diba a discurrir la nueva savia de la rexón, llena de puxu, hasta’l so incomprensible parón n’ochobre del 34.

Yera una obra d’inxeniería espectacular, colos sos casi noventa túneles en menos de cincuenta kilómetros, los sos desniveles terribles, que la facíen un finxu nes ferrovíes europees. Un camín de fierru pel que diba a discurrir la historia de la nuesa rexón demientres casi sieglu y medio, pos entá anguaño sigue siendo l’arteria principal del tresporte industrial asturianu. Ye lo qu’hai.

Unos falen de piesllala cuando s’abra la Variante, de la que nun ta nidio’l so potencial loxísticu. Otros de caltenela pa eso, pa la loxística, y tamién pa usos turísticos. Pero lo único que ta pernidio, pel momentu, ye que, teniendo en cuenta los precios del ferrocarril d’alta velocidá, y los dos peaxes que los asturianos tienen que pagar p’aportar a la capital, ensin escaecer que la vía a Barcelona per Bilbao tien el peaxe más caru d’España, tamos, indudablemente, como nel tiempu de la dilixencia.

Raúl Suevos

En Xixón a 22 diés vencíos d’ochobre de 2022

Torna en castellán en repdiv.blogspot.com