Patria y vida pa Cuba

 

Una de les facetes más creatives de Fidel Castro atopábase na formulación de frases de impautu. Yera ésta una más de les sos carauterístiques, ente les qu’un narcisismu mastodónticu y un irresistible magnetismu pa les mases rellumaben a partes iguales. Estos detalles de la so personalidá yá sobresalíen nos sos años mozos nel xesuita colexu de Belén habaneru, agora Politécnica del Exércitu, y onde caltienen como un santuariu la so antigua habitación. Depués forxaríase na universidá cubana, entamando como pistoleru despreciáu polos partíos qu’entós dominaben pa, una vegada señaláu pola diosa fortuna, algamar l’Olimpu de los dioses de la progresía mundial, eso que dende va dellos años nomen “gauche caviar”. Pol camín quedaría una historia llarga de miseria pa un pueblu, que llega hasta anguaño, y que’l gran manipulador llogró vender al mundiu envuelta nun papel de colores cola etiqueta “revolución”, anque nel so aniciu Fidel llamólu “movimientu”.

Una de les conseñes más vieyes de Fidel taba na so “patria o muerte, venceremos”, repetida hasta la estenuación, servía pa pesllar discursos, llenar carteles descomanáos poles carreteres de la islla y, sobremanera, pa afogar cualquier tipu d’opinión mínimamente contraria a los oxetivos de la revolución, esto ye, de Fidel o, depués y agora, del so hermanu Raúl. Baxo ella condergóse a morir fuera de la patria a tou tipu de disidentes, como Reinaldo Arenas, Bebo Valdés, Celia Cruz, o Cabrera Infante, por poner dellos exemplos. Con ella, y con múltiples y a vegaes inconfesables agasayadures cuando visitaben la islla, enquillotróse a notorios comunicadores, escritores o músicos, munchos d’ellos españoles, que a lo llargo del tiempu nun tuvieron reparu en vender y defender la cárcel cubana como paraísu de llibertá, y que güei prefieren caltener un perfil baxu.

La situación na islla ye anguaño tan penosa, una vegada escosáu’l caldar de la vaca venezolana y col grifu turísticu práuticamente secu, que son les remeses de la diáspora cubana les que caltienen con un filo de vida la economía isleña, especialmente eses procedentes de la “gusanera” norteamericana. La tensión interna ye tan fuerte qu’entamen a dase situaciones enantes impensables, y ello magar el creciente acosu de les fuercies policiales a tolo que guela a disidencia. Vióse va dalgo más d’un mes col asaltu a la see del Movimientu San Isidro, respondío por tou tipu d’artistes con una sentada énte’l ministeriu de cultura. Y vióse agora col escarniu qu’unos conocíos artistas musicales ficieron-y al “patria o muerte” de Fidel Castro.

Xente de Zona ye un grupu cubanu qu’algamó fama mundial col so “baillando” de la mano d’Enrique Iglesias o la "gozadera" con Marc Antony, y Yotuel Romero ye un reconocíu raperu, enantes miembru de los Orishas, afincáu en Miami y mui popular tamién n’España. Conxuntamente crearon un canciu, “patria y vida” que trata d’evidenciar el nivel de sufrimientu y fartura que sufre la población cubana, daqué que namái se pue solucionar con un cambéu de réxime. El “temazu” supunxo, sigue faciendolo, un terremotu na islla, au tol aparatu del gobiernu y el partíu comunista llanzáronse escontra ellos de forma desaforada, lo que tamién ayudó a multiplicar l’efeutu taumatúrxicu del canciu. Quiciabes esto seya l’entamu de daqué. Yá podía.

Raúl Suevos

A 2 díes vencíos de marzu de 2021

Torna en castellán en repdiv.blogspot.com

Duopoliu nel mercáu políticu

 

La democracia representativa, como sistema políticu, algamó’l so periodu d’espansión tres la segunda Guerra mundial, y llueu derivó haza lo que se conoz como partitocracia, esto ye, una situación na que’l poder y les decisiones queden nes manes de la élite de los partíos dexando ensin espaciu, y poro ensin representación efeutiva, a los ciudadanos. Too se “cuez” nel senu de les executives de los partíos, sacantes cuando estos evolucionen nos sos estatutos otorgando un poder total al secretariu xeneral; entós tol sistema pierde la so esencia, derivando notra construcción que, por muncho que se-y maquille, merez otra denominación.

El duopoliu ye una figura que n’economía describe la situación na que dos empreses son les suministradores úniques d’un productu o, dicho d'otra miente, controlen un mercáu de forma mayoritaria. Ye daqué qu’entra na normalidá económica demientres nun esista alcuerdu entrambes p'aprovechar la situación p'acordar los precios nel so beneficiu, y a costa de los clientes en que’l so casu taríen frayando la llei, y deberíen ser sancionaes. Hai una llista d’exemplos abondo llarga.

Estos díes asistimos n’España a una conxunción nidia d’ambes facetes na vida política nacional; la manipulación de los precios per parte d’un duopoliu imperfeutu. El mercáu políticu, nel que los oferentes de servicios, los partíos, facenmos les sos promeses cuatrienales, camina haza la consolancia en cuantu que los ciudadanos nun tenemos posibilidá de reclamación d’esos prometíos productos, como una xusticia independiente o una televisión estatal profesional y ensin ideoloxía. Son promeses que sistemáticamente s’incumplen.

La formación del Conseyu de Televisión española esta selmana cabera foi un exerciciu pornográficu qu’a los únicos que nun avergoña ye a los sos protagonistes, y namái dalgunos “pequeños” axustes torgaron que se llegara a un alcuerdu pa, una vegada más, furtianos la posibilidá d’un Conseyu xeneral del Poder xudicial independiente de la presión de los partíos. Había esta vegada que dar “xuegu” a los socios menores del gobiernu, anque pel camín se dexe ensin esta “representación”, non contemplada na Constitución, a partíos que suponen casi’l 30% del votu popular. Ye cosa de díes y ensin dulda, d’una u otra forma, van llegar a un alcuerdu que responda a los “sos” intereses.

La democracia moderna  como sistema de gobiernu básase, fundamentalmente, nel consentimientu de los gobernaos, que se manifiesta periódicamente pente medies los procesos electorales, ente unos y otros nun hai forma de reclamar les promeses incumplies puestu que los programes nun comprometen y poro, como ye’l casu, los usuarios descubrimos, al abrir la caxa, que’l productu nun respuende a lo esperao. Ye lo que tienen los duopolios.

Raúl Suevos

A 28 díes vencíos de febreru de 2021

Torna en castellán en repdiv.blogspot.com

Onanismu democráticu como sistema políticu

 

La cultureta yanqui bautizó esti tipu de situaciones, la repetición de fechos aparentemente yá vivíos, como’l “día de la marmota”, anque a min, quiciabes pola edá, vienme meyor recordar el déjà vu de Crosby, Still, Nash and Young, una pieza curtía y terrible que daba nome al discu espublizáu en marzu de 1970, en plena guerra de Vietnam, un conflictu que caltenía conmocionada a la sociedá americana, especialmente a la mocedá amenaciada por un reclutamientu abondo inxustu, y que llevaría a la so retirada del país en 1973, tres los Acuerdos de París.

Equí revivimos dalgunos sucesos demientres dellos años, en particular dende que parte de la clas política catalana decidió que l’escapismu independentista yera una solución bona pa caltenese na poltrona –cuéstame llamar poder a lo qu’ellí se cocina-; lo que mos lleva, repetidamente, a contemplar como l’autodenomináu pacíficu movimientu pon a amburar a l’antaño curiosa ciudá de Barcelona. Too sirve como coartada pa la convocatoria “pacífica” que depués se va de les manes por culpa de unos “pocos” violentos y que, más allá del coste de reposición de mobiliariu urbanu, asumible pal ayuntamientu, les baxes por lesiones de municipales y mozos d’escuadra, qu’ainda importa menos a los dirixentes, y los comercios destruyíos o desvalixaos, con dueños de filiación política duldosa, dexa una imaxe qu’afala la escapada continua d’empreses de la rexón y acuta la posible llegada de capital estranxeru. Ye una repetición de lo mesmo, que namái pue conducir a la consolancia social, política y económica de la qu’antaño fuera primera rexón d’España, y que, el embanzanamientu que los resultaos electorales prometen, va contribuyir a afondar.

Si güeyamos a nivel nacional nun paez qu’atopemos señales ilusionantes; el tactismu nel que se desendolca la “alta” política, empobináu a enzancar l’aición del alversariu, o del sociu temporal, más que a polítiques constructives, nun sirve pa responder a los retos que tenemos per delantre. La lexislación en cuestiones de xéneru pue ser un avance necesariu pa dalgunos, pero albidro que la mayoría s’atopa más esmolecida polo que va asoceder cuando rematen los ERTE, y el pesu de la delda, que de dalu mou el Bancu Européu va perdonar, entame a pasar factura nos presupuestos. Nun digamos yá si los famosos fondos europeos nun aporten, daqué non refugable. Va ser entoncenes cuando se compruebe la eficacia del sistema políticu de nueso y comprobemos que, anque quisiéremos emular a los nuesos parientes italianos, equí nun tenemos dengún Draghi.

Atópase España nuna encruciada hestórica, fondigada nuna crisis de salú que va ser económica, con un sistema políticu que nun facilita la gobernabilidá y que, amás, xenera preocupantes tendencies al ensimismamientu nos ocupantes del palaciu de la Moncloa; poro, a min, esta situación recuerdame la hestoria d’Onán, que nun quería tener frutu de la so muyer, namái reviciala, y al que Yaveh castigó cola aniquilación.

¿Ú tará Yaveh?

Raúl Suevos

A 21 díes vencíos de febreru de 2021

Torna en castellán en repdiv.blogspot.com

Marcial Lafuente y el marshall Galindo

 

Demientres tola segunda metá del sieglu XX la lliteratura popular española yera cosa de dos autores; Corín Tellado yera la reina de la novela rosa y Marcial Lafuente Estefanía el patrón de la novela del oeste. Yeren éstas de formatu pequeñu, 100 páxines más o menos, y d’espublizamientu selmanal; podíense mercar nueves o camudar por un preciu moderáu nel kioscu del barriu. Dalu autor foi tan lleíu como Estefanía.

Les sos trames teníen dellos llugares comunes que resultaben infalibles; un pueblu nel que los malandros campaben a los sos deleres, una ciudadanía encoyida y sometida a los abusos de los primeros, y unes autoridaes incapaces de resolver la situación o inclusive conbalechaes colos malandros… hasta qu’aportaba un foriatu, casi siempres mui altu, seis pies y mediu, un altor supuestamente descomanáu pues nun había a mano dengún conversor, y a vegaes el visitante resultaba ser un Marshall, daqué asina como un axente especial del FBI.

El paisaxe social de les noveles d’Estefanía tenía munches similitudes cola insania que se vivió demientres dellos años nel País Vascu; ellí, amás, la ilesia tomaba partíu polos malandros y l’autoridá del estáu taba desapaecida o yera impotente. El sheriff, o lo que ye lo mesmo, la Guardia Civil, taba pa servir de blancu metanes, nel meyor casu, la indiferencia de la redolada, y el desanimu suplía ente les sos files… hasta que llegó’l comandante Galindo.

L’estáu diba perdiendo la batalla, que mataren guardies y militares, xunto a los sos familiares y que nin siquier merecieren un responsu nun paecía trescalar a naide, anque cuando los asesinos ampliar la llista d’oxetivos a prensa, xueces y políticos les coses aniciaron a movese. Les aiciones de Galindo y los sos homes foron fundamentales pa camudar el signu de la batalla na que taben somorguiaos, y tamién pa qu’en Francia se decataren de les implicaciones que pa ellos tenía la so falta de cooperación.

Foi una guerra dura, abondo dura. Foi una guerra sucia, toles guerres lo son, y como neles noveles d’Estefanía, aquel alcalde que tan bien acoyiera al foriatu, una vegada solucionao’l problema de los malandros, toma distancia pa que nada-y chisque y dexa que a Galindo lu pille la inflexibilidá de una xusticia ciega dispuesta a llavar la imaxe del estáu a costa de los sos servidores más entregaos.

Al xeneral Galindo llevólu’l coronavirus, pero dala condena pudo nin va poder retira-y l’apreciu y l’agradecimientu de los qu’entós y agora valoriamos la so dedicación al serviciu como una entrega a España nel completu sentíu de la divisa qu’adorna les puertes de los cuarteles de la Guardia Civil.

Raúl Suevos

A 14 díes vencíos de febreru de 2021

Torna en castellán en repdiv.blogspot.com

L'Asturies d'Aldous Huxley

 

Recuerdo los branos de la infancia como un regalu verdaderu que la vida me dio. Pasábalos na casa familiar d’Ibias, qu’entoncenes rexíen la mio tía Sara y el so home Enrique; un caseríu, como casi tolos d’aquella tierra, que namái daba pa una economía rural de subsistencia. La venta d’un xatu, los años bonos dos, un par de sacos de nueces, daqué d’oruxu, y pare usté de contar. Nun se pasaba fame pero’l conceutu de plusvalía nun esistía. Ibias ye una tierra dura, quiciabes la que más n’Asturies.

El pueblu taba entós, nos 60, enllenu de vida, anque dende muncho enantes l’escedente poblacional taba condergáu a la emigración. En casa recordábase entá la reciella d’oveyes que protexía de los llobos el tíu Manolín y el so mastín pero, llegada la edá militar, emigró a la minería del valle de Laciana primero y depués a la siderúrxica avilesina, como tantos otros. Na mio dómina namái quedaben vaques en casa, que pastoriábemos los neños, y nel monte yá nun s’avistaba al llobu, tampocu al osu, que s’acovecía en Muniellos d’aquella.

Cola desapaición de la minería aportó’l guelpe definitivu al suroccidente astur. Anguaño los pueblos tán de postal, caleyes encementaes, cases cuidaes y parres en estáu perfeutu, pero too ye un espeyismu braniegu calteníu polos emigraos, qu’agora son retornaos estacionales; la realidá márquenla les escueles piesllaes en tol valle. Ye un valle condergáu a la desapaición, como tantos otros n’Asturies.

Malpenes esiste actividá económica rellacionada col agru; dellos corros de panales de miel, cada día más asaltaos pol osu que llega a onde desapaeciera va más de cien años, y un garapiellu d’esplotaciones vacunes n’estensivo, pendientes de que tanto l’osu como’l llobu, menos presente per agora, les respeten. Con estes blimes ye difícil facer un bon cestu pal futuru.

Llega agora la noticia de la prohibición cinexética del llobu, auténtica némesis de los ganaderos qu’entá lo intenten na zona de Picos; una iniciativa que nin la fía de Félix Rodríguez de La Fuente  aprobó por intempestiva en tiempu y forma, pero que foi aplaudida pol totalitarismu ecoloxista nacional y los urbanites bonistes que, dende l’alegría inconformista de la birra en terraza, aplauden toa iniciativa que-yos suene remotamente a salvar el planeta, anque nun algamen a comprender la importancia ecolóxica d’una boñiga.

Quién sabe. Quiciabes el futuru d’Asturies s’atope nel so valir como reserva ñatural, toa ella, cola so xente, paa ser visitada polos urbanites felices d’Aldous Huxley. Quién sabe.

Raúl Suevos

A 9 de febrero de 2021

Torna en castellán en repdiv.blogspot.com