Georgia on my mind

 

Asina como suena, n’inglés, a munchos va-yos trayer a la mente una canción pernomada d’aquel virtuosu cantante norteamericanu del Blues; Ray Charles. Él foi quien-y dio percorríu col so estilu inconfundible, y, sobremanera, cola so capacidá pa tresmitir emociones, pues esta canción, escrita allá pelos años 30 del sieglu pasáu, algamó la gloria col timbre inimitable d’aquel ciegu de voz y manes prodixoses.

La pieza, que traducida como “Georgia nel mio pensamientu”, va d’eso, de murría, d’alcordanza de la tierra nunca escaecida, de la patria chica, de la señardá, esa pallabra tan asturiana que respuende al “sentimientu de tristura que se tien pola ausencia de dalgo o de daquien” y que, nel casu de Ray Charles, referíase al estáu norteamericanu sureñu de Georgia. Un estáu qu’años más tarde decidió adoptar la canción como himnu oficial. Coses.

La historia recuerda, en ciertu mou, a la nuesa “Asturies patria querida”, muncho más adaptada al cantu colectivu ella, como requieren los himnos. Pero la Georgia qu’estos díes ta en boca de munchos nel ramu de la política, ye la Georgia Meloni, xefa del gobiernu italianu, despreciada por, presuntamente, pertenecer a la ultraderecha, y estos díes, díes de campaña electoral europea, reclamada como posible socia por dalgunos, nun va muncho inimaxinables.

Hasta la señora Ribera, tiesta de llista socialista, amosóse abierta a esa posibilidá, si bien rápidamente plegó veles énte’l quilombu montáu na so casa. Tamién la impenetrable señora Von der Leyen la considera como susceptible de ser tenida en cuenta. Nun digamos los Populares europeos, de los que los nuesos formen parte, anque seya Vox quien ye’l so aliáu nel mesmu grupu del Parllamentu Européu; un grupu qu’ainda tien a la so drecha a los que seríen los auténticos ultras según l’arcu parllamentario, los de la señora Lepén, los de la Lliga de Salvini, y los temibles de la Alianza por Alemania.

Ye una situación llamativa, anque non novedosa, en cuantu que les apretures que les encuestes agoren pal Parllamentu nuevu d’Estrasburgu señalen la necesidá de negociaciones a múltiples bandes pa llegar a alcuerdos sólidos y duraderos. D’ehí l’imperativu de cuntar cola señora Meloni, Georgia, a quien la obligación de repartir trigu una vegada acabao’l tiempu de la prédica paez que-y tien suavizao’l perfil políticu, llevándola a posiciones menos radicales de les que prometía; dalgo llamativo en rellación con quien mos gobierna n’España que, atenazáu pola diversidá y radicalidá de los so socios, paez surfear dende la socialdemocracia orixinaria hasta la esquierda populista radical d’anguaño. Ye lo qu’hai.

Raúl Suevos

A 27 de mayu de 2024

Torna en castellán en repdiv.blogspot.com

Emburriando pola Cultura de Defensa

 

Apoteosis patriota, a lo menos eso ye lo qu’a primer vista paecía la enllena fachada marítima xixonesa nel día d’ayeri, anque con ausencia llamativa de bandieres d’España, ye lo qu’hai. Día de les Fuercies Armaes, brazu armáu de la nación, que nesti benditu 2024 tien decidío trayer la so presencia física a la nuesa Asturies. Ayeri en Xixón y güei n’Uviéu; ayeri con revista naval y desfile aéreu, más eshibiciones dinámiques na sablera de San Lorenzo; y güei na capital del Principáu con desfile militar, too ello con esposiciones na capital y  visites a buques nel Musel. Una selmana casi completa. Un emburrión a la Cultura de defensa, tan necesitada ella.

En Xixón, presidío por So Maxestá, y pa plasmu de grandes y pequeños, especialmente los neños, que nun van sofrir dalu trauma infantil poro, esfrutamos de la presencia masiva del portaaeronaves Xuan Carlos I, buque insignia de la nuesa Armada, con hermanos construyíos pa otres flotes allende los mares, como otros proyectos de la nuesa industria naval, que sigue dando grandes satisfacciones en cuantu a tecnoloxía y retornos pal país.

Tamién rebiciamos del vuelu estáticu del Harrier, anguaño casi al final de la so vida útil. Tamién el Airbus 400, xoya de l’aeronáutica europea y soporte básicu de la nuesa proyeición esterior, al qu’acompañaba l’Eurofighter, otru exemplu de la cooperación europea en Defensa. Y ye que los tiempos son los que son.

La ciudadanía debe saber, y daquien-y lo tien que dicir, que son tiempos difíciles, que más allá de Gaza, la Rusia de Putin, autocrática ella, invade una democracia, Ucrania, y que Europa, ensin entrar nel militarismu, debe tomar conciencia de cuála ye la situación. Con unos Estaos Xuníos pendientes de China, y deseyosos de desenganchase d’Europa, y’el tiempu de la Europa de la Defensa.

Ayeri, nel primer debate electoral européu, Úrsula Von der Leyen, previsiblemente prósima presidente de la Comisión Europea, falaba de la necesidá d’habilitar fondos europeos pa financiar el desendolcu de la Defensa europea, y la creación d’un Conseyu européu de Defensa. Y ye que lo d’Ucrania, y la medrana a la llegada de Trump, camudáronlo too.

N’Asturies, con 2500 emplegos nel sector defensa, y un 15% del PIB rexonal; con un puxante “Asturias Hub Defensa”, tenemos que ser conscientes de les nueses posibilidaes, ciudadanía ya instituciones. Con un sector tecnolóxicu d’altu valor añadío nel qu’ayuntamientos, Xixón nesti casu, Universidá, Principáu, y empresariao, deben emburriar pa qu’esti Día de las FAS nun se quede namái nuna oportunidá pa chigreros y signifique una puerta al futuru y al emplegu cualificáu.

Raúl Suevos

A 24 de mayo de 2024

Torna en castellán en repdiv.blogspot.com

Usu y abusu del xenocidiu

 

Toles pallabres son importantes, ensin esceición, anque dalgunes contienen nel so interior connotaciones que van más allá de les persones y de los tiempos. Una d’elles ye la que da pie a esta tribuna, el xenocidiu, estos díes en boca de munches persones, individuos y personaxes, pero de la que’l DALLA mos diz que se trata del “desaniciu o estermín (d’un pueblu, d’una nación)”, con lo qu’“afita”, d’alcuerdu con los oxetivos de la so esistencia, l’algame de la pallabra. Para toos n’Asturies, y al mou como lo fae la RAE pa España, inclusive pa los políticos.

La esquierda populista, na que tamién paez encuadrase el partíu principal del nuesu gobiernu, tiénse llanzao nuna campaña, teóricamente de sofitu al pueblu palestín, anque beneficie direutamente a los terroristes de Hamas, na que l’usu del términu xenocidiu sirve pa xustificar el mensax y tamién les aiciones polítiques, inclusive les de calter internacional, y yá de pasu la demonización de la oposición, non abondo allineada con eses tesis.

La crisis, entamada col ataque terrorista a Israel, l’únicu país democráticu de la rexón, con 1139 muertos y 245 secuestraos, la mayoría civiles y munchos d’ellos neños, tien derivao, como guetaba Hamás y el so patrocinador Irán, nun combate cruentu en población –el más difícil y mortíferu ente les modalidaes que la guerra desarrolla- del que los civiles de Gaza son les víctimes principales. Pero eso nun ye un xenocidiu.

Xenocidiu fo’l de Ruanda, el más recien, tamién el del pueblu armenio en 1915 a manes de los turcos, y, sobremanera, el de los xudíos europeos demientres la Segunda Guerra Mundial, con dirección nazi y cooperación de munchos en munchos países, non namái n’Alemania. Ye lo que hai, y amás ye imposible de camudar. Poro debiera llamar l’atención l’usu y abusu del términu por parte de la esquierda populista.

A min, qué quieren que-yos diga, tráeme l’alcordanza d’aquel “Non a la guerra”, secundao pola tropa zapateril nel casi lloxanu 2003, con ocasión de la Segunda Guerra d’Iraq, y que dio, ente otres coses, pa un maxistral llibru de Gustavo Bueno, “El pensamientu Alicia”, nel que describía la inanidá del pensamientu políticu de talu personaxe singular, que la so eleición pa dirixir el gobiernu de la nación en dos ocasiones da cuenta perfeuta de la clas de sociedá que somos.

Esta fola nueva de vacuidá política naz, como munches otres, neses universidaes norteamericanes, enantes templos d’escelencia y güei acaroñaes pol pensamientu Woke, que llega depués a Europa, au una xeneración estudiantil güérfana de conceutos la abraza ensin saber qué hai detrás.   

Raúl Suevos

A 18 díes vencíos de mayu de 2024

Torna en castellán en repdiv.blogspot.com

Asturies, paraísu natural...del golf

 

Demientres los años que viví n’Estrasburgu, capital de l’Alsacia, sosprendíame siempres l’aportar de la primavera pol españíu de colores que se producía en munches de les sos villes, dalgunes yá de por si perguapes. Un arreventón floral en forma de maceteros, tiestos, xardineres, y tou tipu d’encontu que pudiera albergar a los primaverales elementos.

Yera esa manifestación productu de lo que se conoz como Villes floríes de Francia, una iniciativa conxunta del gobiernu francés, los ayuntamientos y los productores de flores del país, y que, col esfuerciu tripartitu llogren agupiar sobremanera esos pueblos y ciudaes, faciéndolos más  atractivos pal turismu de lo que yá son, y, al mesmu tiempu, calteniendo o inclusive incrementando los puestos de trabayu nel gremiu floral.

Vien esto a cuentu de la noticia, nun tengo nidio que positiva, de que nEspaña esisten anguaño 340.000 pisos turísticos, cifra que nun engloba a los munchos miles que funcionen ensin declarar oficialmente la so actividad y, poro, ensin devengar fiscalmente. N’Asturies la cantidá ye mui inferior, fálase de 6000, anque amontando esponencialmente según tolos indicios, y a esta deducción mos lleva la burbuya inmobiliaria que sufre nesti momentu Xixón, que, según les axencies, sofítase na compra pa segunda vivienda y alquiler.

Ye un fenómenu que, mui probablemente, va alegrar a los chigreros en xeneral, pero que, aparte de la xentrificación sesgada que lleva a los barrios antiguos, de lo que Cimavilla ye un exemplu, xenera mui pocos puestos de trabayu, y esos non especialmente cualificaos y poro de pocu ingresu. Pa facéselo mirar.

Llegamos agora al asuntu del golf, nuna ciudá, Xixón, qu’en tiempos del alcalde Areces, y en plena desindustrialización de la comarca y rexón, apostó pola creación d’un campu municipal, que fo’l primer en toa España, y qu’anguaño cuenta con cuatro instalaciones en total, dalguna, como’l Real club de Castiello, de les más vieyes de la nación.

Una rexón, el Paraísu natural, na que coesisten unes catorce instalaciones golfístiques, contando col güei pastu de monte y xabaril de los Balagares,  casi toes na estaya costera, que suponen un añadío a los atractivos d’Asturies y que, ensin dulda, cola promoción afayadiza por parte de los implicaos, Principáu, ayuntamientos y entidaes, como en Francia, daríen un saltu de calidá, más allá del cachopu y la sidra, empobinándonos haza unos oxetivos turísticos alloñaos del turismu de mases haza’l que paez que dalgunos mos quieren dirixir.

Golf, que tenemos muncho, y cultura, que tamién la hai a esgaya, cola gastronomía, faen un amiestu esplosivu, y muy rentable. Ye lo qu’hai.

Raúl Suevos

A 17 díes vencíos de mayu de 2024

Torna en castellán en repdiv.blogspot.com

Llimpieza étnica a la española

 

Ye ésti, anque dalgunos piensen que ta ehí dende siempres, un términu rellativamente nuevu. Entamó a emplegase demientres la cabera de les Guerres balcániques, la de Bosnia, que nun foi sinon una más de la serie aniciada nel sieglu XIX col esbarrumbamientu del Imperiu turcu. Una guerra, la cabera, na que mos vimos envueltos los españoles, con unes cuantes vides dexaes pel camín, por aquello de la nuesa aportación a la paz mundial trámite NNXX, y depués OTAN.

Ellí, en realidá, nun había llimpieza étnica, pues étnicamente toos son lo que se conoz como eslavos del sur, poro, ente otres coses se creara la vieya Yugoslavia; pero, anque hermanos de sangre, les diferencies relixosas, con tres credos ente ellos, foron abondo pa que, a la muerte de Tito, too aquello se viniera abaxo, con estrueldu y gran abondanza de sangre.

El casu ye qu’había que “purificar” la parte de caunu, a base d’espulsar a los otros. Y asina, los serbios tomaron la delantrera, anque toos s’afanaron, y anguaño nun queden serbios nin en Saraxevo nin en Mostar, tampocu nes Kraxines, de onde los echaron los croatas tres 500 años ellí, completando el trabayu entamáu en Xasenovac, demientres la Segunda Guerra Mundial. Los nomaos bosníacos, esto ye, los de credu musulmán, tampocu se quedaron atrás, y, amás, pel camín convirtieronse en radicales islámicos. Ye lo qu’hai.

Esi tipu de limpieza, la de Yugoslavia, ye abondo desagradable, y da muncho que falar, más afuera qu’en casa, au toos callen polo que pudiera pasar, y encima nun resuelve malapenes un res, como amuesa l’empatanamientu políticu d’aquellos países, de los cualos namái Croacia, tan católica ella, tan europea, tien salío adelantre. Pero hai otres formes de llimpieza.

Nel nuesu maraviosu País Vascu falten a llista unos doscientos mil votantes, invitaos a colar del feudu bereber de los sabinianos por aquello d’evitar un atentáu, o l’acosu diariu de parte de la redolada. Una pérdida humana que, nun fai falta ser sociólogu pa deducilo, influye directísimamente nel resultáu de les eleiciones naquella autonomía. Ye esa una llimpieza étnica a la vasca. Sí.

Agora, en plena xornada de reflexión en Cataluña, llégame la noticia de qu’unu de los más conspicuos analistes políticos, catalán él, tien decidío dexar Barcelona, con toa la so familia, ya instalase en Madrid, porque, al paecer, l’ambiente social de la capital catalana ye afogadizu. Y ye que nun facen faltan tiros y bombes, con un aire insanu pa respirar puede ser abondo, sobremanera si tienes posibilidaes de ganate la vida notra parte, como suel ser el casu.

Pero tranquilícense vustedes, España va bien.  

Raúl Suevos

A 11 díes vencíos de mayu de 2024

Torna en castellán en repdiv.blogspot.com

Ensin Llingua nun hai paraísu

 

Esta selmana cabera, demientres l’actu central de la Selmana de les Lletres Asturianes, el presidente de l’Academia de la Llingua, Xosé Antón González Riaño, llanzó un órdagu abondo potente a la presidencia del Principáu, y, en xeneral, a toles fuercies polítiques na rexón, tocantes cola necesidá d’algamar consensos que mos dexen avanzar na defensa y potenciamientu de la llingua tradicional d’Asturies, la Llingua.

Yera un actu, el del Campoamor, que cuntaba cola presencia de les autoridaes de los partidos nos palcos del mesmu, particularmente colos dos fondamentales, Queipo y Barbón, anque protagonistes tamién yeren los mio dos queríos profesores de la UABRA, Claudia Menéndez y Pablo Rodríguez Medina, nomaos académicos de númberu de l’Academia, y con munchos años per delantre pa siguir aportando nel estudiu y recuperación de la nuesa llingua y tradiciones.

Foi Antón, como siempres, mui midíu nes sos pallabres, naide va poder acusalu de rompedor o faltosu nes sos manifestaciones a lo llargo del so mandatu. Ye consciente de la función subordinada de la so institución, y poro apella siempres a la comprensión de los políticos, responsables auténticos de los avanzos y parones na cuestión llingüística asturiana.

Nel cincuentenario de l’apaición de Conceyu Bable, al qu’Antón pagó tributu, señaló’l presidente la necesidá d’avanzar nel desarrollu de la Llingua, con base nel consensu, pos son yá munchos los años, tantos como la Llei d’Usu, nos que malapenes s’atalanta un res de nuevu, más allá de matices cosméticos pensaos pa contentar a la parroquia votante, pero ensin algame verdaderu nin fondura.

Y equí aportamos, una vegada más, a la respuesta rellampiante del presidente del Principáu, aguiyáu un día depués pola manifestación pola oficialidá, que de les so arengues pudiera deducise qu’ensin Oficialidá nun hai paraísu. Un  Barbón que yá convocó esta mesma selmana a los partíos políticos pa atopar una solución ¿Consensuada? Difícilmente. El Partíu Popular, padre, de la mano de Sergio Marqués, de la Llei d’Usu, yá se manifestó nidiamente en cuantu a la voluntariedá de la Llingua, dalgo que choca cola Oficialidá, que conduz inesorablemente al infiernu llingüísticu, como mos amuesen les rexones que yá la tienen.  

Vien una temporada, una vegada más, de discutonios triviales sobro la Llingua, anque espero que, a lo menos, sirvan pa dar un emburrión a la propia Llei d’Usu, que la lleve a maximizar toles so posibilidaes, al so esporpolle, y con ella l’asturianía y la concencia de ser de los so ciudadanos, con independencia de credos y dende la voluntariedá. Ye lo qu’hai.   

Raúl Suevos

A 6 díes vencíos de mayu de 2024

Torna en castellán en repdiv.blogspot.com

La guxanera

 

Diz el DALLA qu’asina se noma’l llugar u hai munchos guxanos; y asina, guxanos, foi como dende mui ceo, malapenes unos meses dempués de la so entrada en L’Habana, anició a llamar Fidel Castro a los cubanos que tomaben el camín del esiliu, principalmente haza Miami y Florida, au dende’l sieglu XIX, cola industria tabaquera, esistía yá una colonia cubana puxante.

Si ellí diben los guxanos, nin qué dicir tien qu’aquello llueu se convertiría na Guxanera, un neoloxismu de gran fortuna tres l’emplegu demientres dellos años por parte del propiu Fidel y de tol réxime, y qu’aínda anguaño, tres la desapaición del líder inabarcable, sigue siendo usao polos so heriedes pa xustificar toles penuries que la so manifiesta incapacidá tienen procurao a los cubanos demientres yá más de sesenta años.

Colo de la guxanera, amás d’identificar un enemigu, algamaben a descalificalu, anulalu, animalizalu. Torgaben que naide, a lo menos na islla y ente los so allegaos esteriores, entrara siquier a analizar les propuestes o teoríes que pudieran llegar o nacer en Miami. Yera la guxanera. Yera lo peor.

Na islla, con tol aparatu, tantu xudicial como informativu, a disposición del réxime, la simple identificación como próximu, por cualquier motivu, a la guxanera, tien sío razón pa condergar al señaláu al ostracismu políticu y social, si ye que nun acababa na prisión Modelo tres el so pasu previu per Villa Marista, el tenebrosu centru de detención política de L’Habana. Etiquetar facilita muncho la represión, ye un axoma.

Equí n’España paecía que tábemos a salvo d’esos vezos tan feos, anque entá me vien l’alcordanza de lo de la Brunete Mediática, apelativu col qu’Arzallus descalificaba a tou periodista non allegáu a les tesis nacionalistes, y que foi recuperao tamién polos políticos catalanes del Procés; pero nun pensaba que talos recursos, de probe sustentu intelectual, y aptos namái pa mentes ideolóxicamente cautives, llegaríen a ser la base de toa una teoría política, nesti casu sofitada pel partíu principal del gobiernu y el so líder inconmensurable.

La Maquina del fangu ye aínda más completa que la guxanera, pola so  falta de llendes xeográfiques y la indefinición de protagonistes. Sirve pa too, anque xueces y periodistes paecen ser los so oxetivos primarios, especialmente aquellos que nun comulguen cola doctrina gubernamental, o sanchista, y tamién tol arcu políticu non allegao, PP y Vox sobremanera; y si a ello amestamos la defensa de la democracia, en peligru según el doctor Sánchez, tenemos tolos ingredientes pa un caldu estraordinariu. Atémonos los machos porque ye lo qu’hai.  

Raúl Suevos

A 4 díes vencíos de mayu de 2024

Torna en castellán en repdiv.blogspot.com