I ('ve) got you, babe

 

Creo que debía andar yo per primero o segundo de bachiller, nel colexu Politécnicu de los Campos, va tanto que me cuesta recordar, pero sí tengo nidio que yá entoncenes me gustaba dar el cante, y en llugar de coleicionar cromos de futbolistas como la mayoría, yo dedicábame a los de cantantes y similares; y “Sony and Cher” yeren lo máximo, xunto a “The mamas and the papas”. Yeren los tiempos de la música hippie, de la que supongo que ye herieder eso qu’agora llaman Indie, anque nun toi seguru de esto último.

L’asuntu viénome porque va un par de nueches, güeyando una serie de eses yanquis que per ca momentu “guay” dante tres pa dir al diván del psiquiatra, “This is us” ye’l so títulu, punxeron un canciu que darréu me llevó a los mio cromos, nos que la incombustible Cher taba aínda al natural, fresca, ensin pasar por ciruxía, con un flequillu espantible. Yera “I (‘ve) got you, babe”.

Una canción de 1965 que ye un canticu al amor, a la entrega, a la certidume de que teniendo al llau a la to pareya too va ser más fácil, y los díes más rescamplantes. Merez la pena lleer la lletra, pos los sos versos sirven para facer comparances odioses colo que los lletristas modernos mos ofrecen. El so ritmu sele, melódicu y tranquilu, paez querer recordamos qu’amar nun tien por qué ser complicao, al contrario, Cher, que lleva la voz cantante, como-y pasaba a Tina con Ike, consigue da-y, sofitada nuna lletra bárbara, unos tonos de tenrura que convierten a esta canción nun auténticu himnu al amor, al amor pacible, al amor pa toa una vida; al amor de pareya nel que caun se da al otru.

James Brown tien tamién un canciu con esti mesmu títulu pero él da-y, aparte del ritmu rockeru y rompedor que namái él llograba algamar, un tonu muncho más carnal al asuntu, paez más un canticu d’alegría por tener garráu “cachu” cola moza tres un más o menos llargu asediu; ye un canticu de victoria masculina, nada que ver cola complicidá de Sony y Cher, quienes, a éstes, divorciáronse unos años depués. Ye lo qu’hai.

Nel llau de los “Mamas and the Papas” la cosa nun fo muncho meyor; la so “California dreamin”, coetánea del “I got you”, fo tamién un ésitu epocal que sigue sonando anguaño, anque ellos separáronse poco depués, pero queda lo importante, el mensaxe d’esperanza y d’amor qu’a min prestaríame tresmitir a les pareyes que, nestos tiempos d’obsolescencia programada, siguen pensando que merez la pena embarcase en viaxes ensin final aseguráu.

Raúl Suevos

A 27 díes vencíos de xineru de 2023

Torna en castellán en repdiv.blogspot.com