Estación central de Milán

Güei tenemos comida familiar y namái mos dexen unes hores llibres pa facer un percorríu rápidu pel urbanismu milanés, ensin paraes, o namái les obligaes; y pa ello tomamos el metru al llau de casa, en San Siro, xunto al renomáu estadiu, arrodiáu per una gran esplanada-aparcamientu que-y da la posibilidà d’alendar y llucir impresionante inclusive nuna mañana desapacible como la de güei. Puedo maxiname l’impactu visual nuna nueche de derby ente’l Milan y l’Inter.

Tres la nuesa temporal mutación en topos urbanos alúmbranos el día nel marcu incomparable de la Estación central de Milán, y ríanse vustedes de la de Nueva York. Golpia la vista dende’l primer instante y quiero entamar a esplorala pero obliguenme a tomar un ristretto cola cremina, un chute de cafeína, enantes de somorguianos na obra magnífica. Con escaleres descomanaes y toa ella n’estilu neoclásicu llámame l’atención la falta de símbolos de los Saboya, anque nel gran salón descubro un mosaicu bien grande col toru y la corona de fierru. Sobrestantes a les grandes puertes descubro unos frescos (¿) espectaculares con vistes de les grandes ciudaes italianes, toes elles reconocibles; y más allá la playa de víes cubierta por unes bóvedes de fierru y cristal escomunales. Impresionante y guapo a la vegada.

Salimos pa catar la fachada, tres la que s’amazcara una zona acutada a la familia real con pasadizu d’escape incluyíu y que, al paecer, nun ye visitable, pero, nós tenemos que retroceder munchos metros pa algamar un bon encuadre y ye entós cuando columbro nel frontis la fecha de 1931, periodu fascista por escelencia, razón pola cuala l’edificiu ta tan guérfanu de simboloxía. Una pena porque los adornos de la ilesia de San Antonio de Pádova de Zaragoza son barbáros.

Dend’ellí tomamos una diagonal p’averanos a una de les zones urbanes nueves que tien como polu d’atracción el conocíu “bosco verticale”, un edificio doble, anguaño de sonadía mundial, que se diseñó para soportar terraces individuales arbolaes y que, magar ser hibiernu, caltien un indudable encantu que se suma a los parques y permodernos edificios de la zona de Porta Garibaldi. Y siguen construyendo, y siguen creciendo los precios.

Dende la Porta tomamos haza Chinatown, per Paolo Sarpi, que l’atraviesa toa agalanada pos tamos en víesperes del Añu nuevu chinu y l’actividá ye febril ente los munchos ítalo-chinos y los curiosos, foriatos o non, que pululamos pela zona. Y más allá aportamos a l’área de Tre Torri, lo más nuevo ente lo nuevo de Milán. Tres edificios descomanaos, un d’ellos de nidies connotaciones fáliques, en qué taría pensando l'arquitectu, que s’abren en semicírculu pa enfrentase a una zona de parque que se pieslla con una serie d’apartamentos, dalgunos aínda en construcción, col preciu por metru cuadráu más altu d’Italia, y con propietarios, como Clara Ferragni, ente los influencer más importantes del mundu. Lo más de lo más.

Corremos al metru pa nun llegar tarde. Va siguirá.

Raúl Suevos

A 29 díes vencíos de xineru de 2023