Targeting

 Targeting

Esti pallabru inglés, escontra lo que dalgunos podieran pensar, nun va de tarxetes de créditu sinon d’oxetivos, o blancos si prefieren. Ye d’usu xeneralizáu dende va tiempu nel mundiu militar modernu y anguaño algama tamién otros munchos campos; fíxense sinon nes audiencies target de los medios de comunicación, o les audiencies target de los partíos políticos. Pero ye nel campu de batalla au desendolca la so definición precisa.

A nivel tácticu, esto ye, na zona de combate, les unidaes d’artillería trabayen con una target list que-yos aportaría, xeneralmente, de la mano de les unidaes d’intelixencia y van ser oxetivos, xeneralmente tamién, llexítimos; quier dicir, que nun vayan escontra les lleis de la guerra pola so condición de sanidá, cultura, etc. Anque a vegaes se produzan erros, como cuando los norteamericanos bombardexaron la embaxada china en Belgrado. Un erru de targeting.

Si la tensión amonta ente dos posibles contendientes les sos unidaes d’intelixencia entainen a desarrollar llistes d’oxetivos; y nun hai que pensar muncho pa pescanciar que cuando, como nel casu de Rusia y Ucrania, vieyos miembros d’un mesmu estáu, se caltien una guerra nun declarada dende 2014, les sos target lists cuenten con una precisión casi absoluta. Bombardexase lo que se quier bombardexar.

La penúltima otomía d’esta guerra fo l’ataque mortíferu  con misil a un centru de detención en territoriu controláu por Rusia nel que s’allugaben los combatientes de la factoría d’Azovstal, munchos d’ellos pertenecientes al Batallón Azov, rabiosamente nacionalistes y auténticos demonios nazistes pa la propaganda rusa. Práuticamente los responsables principales de la “operación especial” de Putin. Nin un vixilante feríu.

Dicen los rusos que foron los ucranianos pa torgar que los prisioneros, énte les técniques convincentes d’interrogatoriu ruses se supón, escomencipiarena a cuntar los secretos militares d’Ucrania, anque ye abondo duldoso que los miembros d’un batallón sepan muncho de secretos militares una vegada que la so posición cayera. Dicen los ucranianos que fo’l tristemente conocíu grupu de mercenarios Wagner pa enzacar que los prisioneros, aportáu’l momentu, contaran les atrocidaes a les que taben siendo sometíos. Quiciabes más atendible.

Este blancu, target, oxetivu, colos Convenios de Xinebra na mano, nun ye llexítimu pero ye mui probable que, col pasu del tiempu y l’aportar d’atrocidaes nueves vaya esmuciéndose ente la borrina de la guerra, anque estos díes, a min, llámame l’atención cómo dalgunos, entá, y depués del cuelmu d’indicadores del roxurosu exerciciu del poder y la política de Putin y el desenvolvimientu bestial del exércitu rusu dende l’entamu de les operaciones, aínda puean dar alimentu a la versión de que fo un misil HIMARS norteamericanu’l responsable de la matancia. Ye lo qu’hai.

Raúl Suevos

A 31 díes vencíos de xunetu de 2022

Torna en castellán en repdiv.blogspot.com