Si vis pacem para bellum

 

Na Academia Xeneral Militar esisten requexos cargaos de referencies; un d’ellos ye la Escalera del cañón que dende la zona central d’aules da accesu a los pisos superiores colos dormitorios de cadetes. Ellí celébrase tolos años, en día indetermináu, la “batalla” de puxu ente la promoción nueva, que tien “prohibio” l’usu de la mesma, y la de veteranos, dominadores de la zona superior. Depués el disfrute va quedar abiertu a toos.

Nel arcu d’entrada relluma una inscripción, “si vis pacem para bellum”, atribuida erróneamente a Xulio Cesar, y que dende l’anguaño orielláu llatín invita a evitar la guerra pente medies la preparación pal combate; acción que daría qué pensar a un posible enemigu enantes de llanzase escontra nós. Ye quiciabes na neutralidá armada tradicional de los suizos au atopamos un exemplu perfeutu, y el recordatoriu paez más qu’apropiáu pa los alumnos de l’AGM.

N’Ucrania lleven cuatro meses llargos de guerra d’esgaste con consecuencies espantibles, especialmente na redolada de los frentes de batalla, y ellí podemos güeyar les dos cares de l’académica inscripción al recordar cómo una Ucrania desprotexida perdió parte de los sos territorios y milenta combatientes nun espaciu breve de tiempu, mientres el branu de 2014. Nun preparara la guerra y los rusos, amarutaos de nacionalistes del Dombás, tuvieronlo abondo fácil, y pa munchos occidentales namái queden anguaño les imáxes del avión de pasaxeros malayu derribáu como alcordanza d’aquella guerra.

Dende entós Ucrania aplicóse al “para bellum” de la frase romana pa poder desanimar a Putin d’una previsible repetición d’aquellos acontecimientos, anque bien vemos que nun foi suficiente y la mocedá rusa paez tar pagando un preciu altísimu y sangrientu pola falta de previsión del so gobernante tocantes los descendientes de los cosacos zaporogos. Ye lo qu’hai.

Nel otru llau del “para bellum” tán les polítiques d’apaciguamientu, como aquella que intentaron los líderes europeos con Hitler, que yá sabemos cómo acabó, y qu’anguaño dellos analistes, pocos pol momentu, entamen a apuntar pola vía de la solución negociada o diplomática, con tantu de pérdida territorial pa Ucrania, pensando quiciabes en Crimea, y que nun va muncho yá suxurió Kissinger, campeón históricu de la realpolitik, que muncho sabe d’estos asuntos.

La parte más difícil de les guerres ye el cómo acabales, y Putin d’un llau, y Occidente del otru, van tener de guetar una solución, que si se basa na pallabra d’un autócrata despiadáu y manipulador como él, nun va ser una solución, namái un apañu temporal…y poro la OTAN.

Raúl Suevos

A 9 díes vencíos de xunetu de 2022

Torna en castellán en repdiv.blogspot.com