Nun somos xermánicos

 

Dicen los que d’eso saben que nel corpus normativu de nueso entá se pueden descubrir reminiscencies del derechu xermánicu, aquel que les estremaes invasiones bárbares, dende los suevos hasta los visigodos, pasando polos vándalos y alanos, dexaron na nuesa cultura como herencia consuetudinaria. Más allá d’eso ye mui difícil, por nun dicir imposible, atopar dalgún rasgu xermánicu en nós, los españoles, incluyendo a aquellos pocos qu’entá caltienen nos sos apellios dalgún xentiliciu que recuerda a aquellos pueblos subsumíos na grandeza de los pueblos ibéricos, menos notorios pero más resilientes a la fin.

Nel 2004 daquien decidió que me ficiere cargu del mandu del batallón multinacional del Eurocuerpu, n’Estrasburgu, ribera del Rin y territoriu perteneciente a Francia anguaño pero de nidios y brengosos raígaños culturales xermánicos. Ente los componentes del batallón un continxente de 120 militares alemanes obligóme a facer una autollimpieza mental de tolos tópicos que la filmografía anglosaxona m’imprentara, inalvertidamente, a lo llargo de toa una vida. Llegué a estudiar alemán demientres un par d’años pa poder/intentar comprendelos meyor; cola conclusión, a la fin del mio periodu de mandu, de qu’españoles y alemanes somos mui estremaos.

Estos díes toa Europa anda pendiente d’Alemania. Cola mama/mutti Merkel y les eleiciones nun dexen, dicen, un panorama nidiu. Pero enquivoquense, son xermanos, non españoles, y el futuru ta clarísimu, anque los responsables entá lu tán escribiendo.

Les eleiciones dexen un parllamentu mui dividíu. Dos partíos nos estremos, die Linke/estrema esquierda y Alianza por Alemania AfD/estrema drecha que nun cuenten pa les dos grandes formaciones poles sos posiciones estremes; la esquierda socialista/SPD y la drecha tradicional/CDU que vien de gobernar en coalición demientres los dolce años caberos pero qu’agora nun tienen abondo escaños pa repetir y, finalmente, los modestos verdes/centro esquierda y liberales/centro drecha deveníos n’árbitros de les dos posibles soluciones.

Ye probable que la solución tarde un tiempu porque, al contrario que n’España, ellí les conversaciones pa los alcuerdos políticos son llargues y detallaes y, amás, plasmense en documentos programáticos que, oh maravía, los firmantes cumplen a raxatabla, d’ehí la duración de los pautos. Llamativamente son verdes y lliberales los que iniciaron les reuniones puesto que, anque minoritarios na coalición futura, sábense cruciales. De lo qu’ellos alcuerden, lo que va llevar el so tiempu, va desprendese’l color de la coalición de gobiernu p’Alemania, centru esquierda o centru drecha, esto ye, va ser una cuestión de pequenos matices na que, dende yá, se puede descartar polítiques radicales en cualquier sentíu. Triunfa la moderación.

N’España facemos alcuerdos de gobiernu d’un día pa otru, con clausules que o nun se cumplen o se fai a remolera, con socios que se mirem de regüeyu y con una política, en xeneral, que tiende a la polarización en llugar de la moderación. Y ye que nun somos xermánicos.

Raúl Suevos

En Xixón a 4 díes vencíos d’ochobre de 2021

Torna en castellán en repdiv.blogspot.com