El tormentu y l'éxtasis

El virus tien llanzao a la cai a más de media España, pocos somos los que mos caltenemos atrincheraos na casa y yo, un d’esos,  cayí esta tarde, demientres zapiaba, nuna de les munches cadenes de televisión qu’anguaño se ponen al algame del mandu a distancia. Una de baxu presupuestu pues emitía “el Tormentu y l’éxtasis”, película de los años 60 basada nuna novela del norteamericanu Irving Stone, que puedo maxinar que nun va pagar munchos drechos d’emisión.

El rellatu cuenta’l procesu de la criación del techu de la Capilla Sixtina por Miguel Angel Buonarroti, interpretáu por un hieráticu, como casi siempres, Charlton Heston, y Rex Harrison como un pocu creyible Papa Xulio II. Yeren los 60 tiempos de recoyimientu, muncho más radical que l’actual confinamientu pandémicu; tiempos nos que cada añu estrenabase una producción rellacionada colos sucesos bíblicos, lo que convertía a la del xeniu florentinu en pocu menos qu’una gran apertura cultural.

A min la hestoria tráeme recuerdos de Florencia; pela rodiada, a dellos kilómetros ta’l pueblu de Settignano; nes sos canteres de mármol entamó a trabayar d’aprendiz Miguel Ángel, enantes d’entrar nun taller florentín au aniciaría’l camín a la gloria. Ellí tamién s’atopa una de les villes de los Medici, mui visitada polos turistes, anque’l mio referente yera la Capponcina, una trattoria que nos 90 ofrecía na so magnífica terraza pasta fresca, crostini toscani o vitello tonnato y que tomaba’l nome de la villa que demientres dellos años habitó Gabrielle d’Annunzio, el gran poeta italianu de finales del XIX y principios del XX. Ellí vivió un romance chornizu y comentáu con Eleonora Duse, la gran actriz italiana rival de la mismísima Sarah Bernhardt. Cuenten a quien quier oyelo que d’Annuzio yera veceru de la trattoria pero nun cuadren les feches, una pena pues sedría una hestoria perguapa.

Agora eses hestories nun dan p’argumentos de noveles, nin de guiones; tamos en tiempos que la cultura márcala la velocidá d’internet; too ta ehí, na rede, fácil, y llega a velocidá vertixinosa, casi a la mesma cola que se disipa lo que tan cómodamente mos ofrez. La cultura, aquello que queda cuando se escaez lo lleído, ye frutu d’un trabayu muncho más trabayosu, más constante, más humilde, más d’años; daqué que choca col mou actual de vivir. Florencia ye namái un puntu más pa coleicionar, un viaxe más, quiciabes más interesante como escenariu de series o películes que como bierzu del Renacimientu, daqué que quiciás desapaeza del currículu escolar, como’l llatín, y en xeneral les humanidaes, toes elles materies que yá malapenes interesen. Una pena.  

Raúl Suevos

A 3 díes vencíos d’abril de 2021

Torna en castellán en repdiv.blogspot.com