El XIX foi un sieglu malfadiáu pa China. L’imperiu chinu taba nos sos momentos más baxos y, pol contrario, los británicos atopábense nel so meyor periodu depués de la perda de les colonies norteamericanes lo que llevó, esta conxunción desgraciada, a les nomaes como les Guerres del opiu. Básicamente y por embrivir, la imposición a los chinos del consumu d’opiu producíu na India, coles sos tarrecibles consecuencies sociales, y l’apertura d’una serie de puertos al comerciu británicu con condiciones mui ventaxoses pa los de la so graciosa maxestá y vergonzoses pa los chinos. Los más mayores seguro que s’alcuerden d’aquella célebre película, “55 díes en Pekín”, que daba, como suel asoceder cola industria del cine, una imaxe que ensin dulda taba mui lloñe de la realidá histórica, anque Ava Gardner taba perguapa.
Foi en dalgún momentu d’aquellos tiempos gafos, y posiblemente porque Francia s’apuntara a la segunda de les guerres, cuando s’atribuyó a Napoleón l’afirmación de que “China ye un xigante dormíu, y meyor nun despertalu porque cuando lo faga’l mundiu va tremecer”, y neses tamos. Anque nun hai rastru per dalu llau de que l’emperador se manifestara al respeutu en dalu momentu de la so movida esistencia la frase fizo fortuna, y el casu ye que China despertóse por fin y el congresu anual que’l Partíu comunista chinu tevo’l mes pasáu en Pekín vieno a confirmar que nun tien intención de tornar a adormecese. ¿Habrá qu’echase a tremecer?
Que Xi Jimping ye’l gobernante con más poder personal nel mundo anguaño –quitando quiciabes a Kim Jong Um- yera yá sabío; agora avísanos de cuálos son los sos oxetivos pa los 14 años vinientes y, anque nun s’amuesa especialmente belicista nes declaraciones, los sos comportamientos nel Mar de la China, la so redolada, son los de un chulu de barriu, anque n’ingles-y digan assertiveness, de asertivu, firme, que queda como muncho más cool. Nun hai qu’engañase, ye’l típicu comportamientu del vecín ricu y faltón. Que-ylo entruguen a Taiwán, Vietnam o Filipines.
El plan chinu recién sancionao pasa pola aprobada “Estratexa de circulación dual”, esto ye, impulsar la demanda interna y la independencia tecnolóxica, güei entá mui dependiente d’occidente, demientres se caltien el comerciu esterior, daqué que, si repasamos un pocoñín la historia, ye’l percorríu que llevó a los EEXX a convertise nel hegemón mundial. China quier facer lo mesmo y los sos mil millones d’habitantes paecen una base suficiente pa entamar tirando del consumu interior que sofite tolo demás, especialmente agora que’l covid-y tien dao una ventaxa comparativa sobro’l restu del mundiu.
Nesi camín namái paez interponese los EEXX; los sos vecinos, incluyíos los más importantes, como India o Australia, yá escomencipiaron a sentir la so presión en formes de guerra estremaes, la convencional o la comercial. Pol norte, el so vecín rusu nu paez decatase del peligru, o cree poder cabalgar el tigre, especialmente na apertura permanente de la ruta norte pol Árticu, con tolo qu’ello implica; y la nuesa Europa paez asumir la so decadencia y el so papel de meru espectador.
Nun sé si Napoleón tendría dalgún remediu pal mal despertar, anque tampocu sé si sedría pal de los chinos o pal de nueso.
Raúl Suevos
A 8 díes vencíos d’abril de 2021
Torna en castellán en repdiv.blogspot.com
No comments:
Post a Comment