El sindios español

 

Sindios ye una pallabra que, dicen, la Real Academia de la Llingua estudia pa la so posible inclusión nel diccionariu como rellativu a daqué que ye alloriao o ensin sentíu, y estos díes, viendo lo qu’asocede nel nuesu país vienme a la tiesta de manera recurrente. Tamién la imaxe del infiernu español, nome d’un chiste bien castizu y de fundamentos escatolóxicos que me torguen reflexalu por escrito. El casu ye que, cuando la nación s’atopa metanes una crisis que supera toles que, los qu’anguaño somos adultos, vivimos personalmente, encontramonos con una situación qu’acoyona, dicho esto na doble aceición de la RAE, qu’acobarda y que dexa varáu.

El gobiernu ta de baxa, o de vacaciones, nun se sabe mui bien. Dexó-y el pastel a les Autonomíes, que facen, o facen como que facen, mientes se palpen la ropa y recen pa que la cosa nun vaya a más y los sos hospitales nun entren en ruta de colapsu. Too ello ensin entrar nel espectáculu perpenosu del regresu a les aules que tien a los pás responsables tremando, y a los que namái quieren que dalguien se faiga cargu de los sos fíos tamién. Corren los díes y septiembre y la seronda entamen a vese como presaxu d’una nueva folada de terror.

Da cuenta la prensa del interés del gobiernu, daquien debió quedar pa falar nel so nome, en qu’Europa adelante caudales d’aquellos famosos 140M d’euros ensin los cualos la situación va convertise en dramática, daqué fácil d’entender a estes altures, pero ye difícil qu’esto asoceda pos ellí, n’Europa, los asuntos del dineru van reglaos y nun se contemplen exceiciones. Sabenlo en Madrid y too suena como al entamu d’una campaña pa que la opinión pública se vaya preparando pa la traxedia. Esta vegada, amás d’hospitalaria, será económica, y tarrecible.

En Madrid un xuez diz que nun se pue prohibir fumar pola cai, notra rexón otru xuez sanciona que nun se pue piesllar les discoteques, o los bares de copes; en cada rexón, agora a cargu de la xestión de la crisis sanitaria, interpretense les aiciones de los gobiernos autonómicos a guelpe de decretu xudicial, y ta bien que seya asina nun estáu de drechu, pero cabe entrugase si yera esto lo que queríemos cuando votamos la Constitución y el so títulu VIII. Nun sé si España da pa tanto.

Les vieyes Reales Ordenances de les Fuercies Armaes, yá non vixentes, definíen la Patria como “el quefacer común de los españoles d’ayeri, de güei, y de mañana, que s’afirma na voluntá manifiesta de toos”, yera un testu de los d’enantes, de los que poníen los puntos sobro les íes.

Raúl Suevos

En Xijón a 21 díes vencíos d’agostu de 2020

Torna en castellán en repdiv.blogspot.com