Leal, el cronista de La Habana

Recién instaláu en L’Habana, allá pel 2010, descubrí dos especies naturales de la islla que me dexaron ablucáu. Nel xardín de casa un particular zumbíu llevóme hasta una especie de pexesín, ente azul y violeta con tonos metálicos, que se caltenía suspendíu nel aire al altor d’una de les flores; yera un colibrí, el primer que güeyaba al natural en vida mio y fízome sentir una emoción fondera depués de tantos documentales de la 2. Ellí dicin-yos Zunzun, pol so zumbíu característicu al volar y son una de les munches maravielles de la islla.

Tamién nesos díes primeros tuve qu’asistir a un actu institucional que se pieslló con un discursu d’Eusebio Leal, Historiador de la ciudá, cargu que yo creí al entamu que yera como ellí nomaben al Cronista de la Villa. Dende les sos pallabres primeres llamóme la atención pol tonu y la claridá de la so voz; suave y melodiosa como una habanera, nun castellán perfeutu; nada que ver col falar de los cubanos, a los que la so alta ya inxustificada autoestima lleva-yos a pensar que el de so ye’l meyor del mundu hispanu. Un discursu ensin papeles, ensin perder la ilación magar los xiros narrativos multiples. Un discursu dignu d’un orador del sieglu XIX, d’esos que güei ye imposible escuchar; a lo menos yo nun tuve esa fortuna.

Dende entós nun perdía ocasión d’oyelu, como’l qu’asiste a un conciertu. Un año depués, con ocasión del 500 aniversariu de Baracoa, primera ciudá fundada polos españoles, pronunció un discursu estraordinariu pues los silencios sobro la Revolución o los Castros resultaben atronadores, d’igual miente que la so falta de recatu al emporderar el llabor d’España a lo llargo d’esos sieglos na islla. Ye de suponer que Fidel, yá abondo gaga entoncenes, nu se pescanciare pero ensin dulda Raúl debió de tomar nota.

La oferta turística cubana sedría la mesma que la del restu del Caribe si nun fuere poles sos ciudaes que se caltuvieron nun estáu d’envernía y decrepitú aniciáu‘l día que Fidel entró na capital. Casi too s’está cayendo tres decenios d’abandonu; Trinidad, Santiago, Cárdenas son bonos exemplos, y La Habana llevaría’l mesmu camín si nun fuere porque Eusebio Leal llogró, yá como Historiador, que Fidel lu autorizare a desendolcar un proyeutu de reconstrucción de La Habana Vieya. Un proyeutu que entamó guetando los antiguos artesanos de los oficios, ebanistes, ferreros, vidrieros, que cola xavaz nacionalización de Castro desapaecieram del texíu económicu y social. Hebo que escomencipiar de cero, que pidir subvenciones, nel estranxeru claro, y too dende’l prestixu de Leal, que adulces recuperó edificios nos que tornaba a allugar a los sos propios moradores, a los que daba trabayu nes tiendes, restaurantes u hoteles que la Oficina del Historiador diba abriendo. Anguaño La Habana Vieya, aú entá queda muncho por facer, lluz otra vegada en dalgunes de les sos cais y fáilo colos sos propios vecinos. La Habana Vieya nun ye una curiosa concha vacía ye un barriu vivu, y debe-ylo a Leal.

Cola desapaición de Fidel desapaeció’l fidelismu, teórica corriente a la que Leal pertenecía. Anguaño too ye raulismu y a la Oficina del Historiador yá va tiempu que-y eliminaron dalgunes de les sos prerrogatives, especialmente aquelles que xeneraben rendimientos económicos, que pasaron a les manes de los militares de López Callejas, el yernísimu de Raúl Castro, y agora, cola muerte de Leal, el so proyeutu va tomar una direición más pragmática, más economicista, más de bella ensin alma, como cuasi tolos cascos históricos.

Raúl Suevos

A 2 díes vencíos d’agostu de 2020

Torna en castellán en repdiv.blogspot.com