El Principe

 

Pal turista que visita Florencia hai trés llugares inescusables a visitar nel centru la ciudá, al que cabría amestar el Piazzale Michelangelo, estramuros, na colina de San Miniato al Monte; y son estos, el Duomo, el Ponte Vecchio, y la Piazza della Signoria. Pel camín, davezu invadíu de collacios de turistéu y col tiempu ainante de los viaxes anguaño, casi nunca y a casi nadie-y queda tiempu pa perder unos minutos na plaza interna de los Uffizi, anque dalgunos ellí pasen inclusive hores de cola esperando entrar a la galería pernomada. Y el casu ye qu’alló, nesa plaza, atópase’l muestrariu de grandes figures del Renacimientu querío por Cósimo de Medici, el Grande, el primer gran duque de Toscana, el so constructor.

Si Cósimo fo’l constructor, l’arquitecto foilo’l gran Vasari, pero les hornacines d’aquel patiu quedaronse vacíes hasta metanes el S.XIX, cuando yá la familia de Lorena exercía¡l mandu ducal, y ellí, ente eses grandes figures del Renacimientu, munches d’elles universales, atopámos a Francesco Guiciardini y a Nicoló Macchiavelli, dambos politólogos grandísimos, diríemos anguaño, pero, sobremanera, grandes constructores del Renacimientu na so parte humanística.

Al Machiavelli tengo-y especial apegu, quiciabes pelos trés años que pasé como vecín de la ciudá de Florencia, que me permitieron visitar la so casa en Sant’Andrea en Percusina, u pasó l’afamáu esiliu demientres el cualu escribió la so gran obra, Il Principe, anque non la más importante. Ellí, na so casa familiar, fuera de les muralles de la ciudá, d’onde fuera espulsáu polos Medici tres la cayida de la República y la so recuperación del poder, podía rumiar la so señarda mientes güeyaba allalantrón la cúpula de Santa María del Fiore, la maravia construyida por Bruneleschi. Una estrañedá que lu llevaría a escribir, col oxetivu de recuperar el favor de los Medici, y con ello el regresu a la so querida ciudá, la obra pernomada.

El Principe, casi siempres inxuriáu, con una visión mui parcial, “el fin xustifica los medios”, que torga a los más afondar nuna obra que, equí n’España, daría pie, más d’un sieglo dempués, a Saavedra Fajardo y a Baltasar Gracian, pa escribir sendes obres maestres al rodiu’l mesmu tema, la formación de la estructura moral y política del gobernante, el príncipe. Falamos, en fin, d’una obra que, per vegada primera na historia asienta los principios de la ciencia política; principios que yá apuntara nos sos previos “Discursos sobro la primer década de Tito Livio” onde fala yá del conceutu republicanu y el exércitu nacional.

Nes sos llínees Machiavelli separta la moral de la relixón, defín lo qu’anguaño ye la teoría del realismu políticu, desendolca’l conceutu de la “virtú” del gobernante/príncipe que güei entenderíemos como capacidá téunica o profesional, y finalmente presenta la famosa “razón de estáu”, siempres presente nel gobiernu de les naciones, como resalta’l padre del realismu modernu, Morgentau, y motivu de la so conderga polos energúmenos de la crítica. Amás, y como regalú final, amuesanos, ensin sabelo, lo qu’anguaño conocemos como pesimismu antropológicu y que Hobbes desarrollaría na so Gran Leviatan. Una obra sensacional El Principe.

Y, ¿por qué me vengo güei tan arriba con esti asuntu? Pues porque pasé al pie de la estatua que Zaragoza dedica al so gran rei, Fernando’l Católicu, y que dalgunos dicen foi la inspiración pa esi príncipe imaxinariu del Machiavelli, anque otros, más, suxeren que la so referencia fo’l Duca Valentino, Cesar Borgia, fiu del Papa Alexandru VI, pa min más condotieru que príncipe, y que, casualmente, diba finar malamente los sos díes nun barrancu averáu de Viana, en Navarra. Amás, l’añu viniente, 2027, vanse cumplir cinco sieglos de la desapaición del gran florentín, y a bon seguro vase falar abondo d’él y de la so obra. Ye lo qu’hai.

Raúl Suevos

A 11 de pallares de 2026

Torna en castellán en abellugunelcamin.blogsspot.com