Yo nun sé si tien sío’l famixeráu cambéu climáticu, o’l terremotu psicosocial que supunxo’l Covid, o quiciabes la combinación de dambos, sía que non, Xixón paez que se punxo de moda pa toa mena de personal, dende los que gracies al teletrabayu s’alluguen equí de forma permanente, a los que casi tolos fines de selmana del añu invaden la ciudá, incluyíes les pesadísimes dispidies de solteru. Anque nun tengo nidio qu’agora seyamos una ciudá meyor.
A min, no personal nun me va mal, la próstata dame tregua y el colesterol tamién, y, amás, el golf ayudame a enllenar l’apartáu dedicáu a natura y deporte, y non yá, pues con un grupu d’amigos de Xixón y Uviéu, -sí, señores, n’ocasiones esiste esa posibilidá- solemos aconceyamos con periodicidá más o menos mensual pa reviciar de dalgún de los campos asturianos y, de camín, sofitar al pequeñu empresariu de la restauración gastronómica. Ye lo qu’hai.
Nesta oportunidá’l contuberniu de veteranos tevo llugar en Xixón, y na parte dedicada al manexu del armamentu metálicu, l’arroz con bugre ye lo que tien, pude esfrutar de una parolada llena d’información perinteresante, pues el mío oponente yera un de los pioneros que, al mou d’aquellos aponderaos poles pelis hollywoodienses, entraron nos campos del anguaño perguapu Tragamón pa entamar, col so trabayu personal y tamién les so perres, a poner en marcha el que sedría’l primer campu de golf municipal d’España, al que siguiría non muncho dempués el de la LLorea.
Cuntaba cómo aquellos trabayos nun se pudieran llevar a cabu ensin l’ayuda, la paciencia y la comprensión d’un personaxe al que Xixón debe muncho, pues él foi l’impulsor, ensin dulda cola anuencia y puxu de Tinin Areces, de la etapa cultural más rescamplante de la nuesa ciudá, recuerden a los Stones, por poner un exemplu, y toi falando de Daniel Gutiérrez Granda.
El golf ye la tercer actividá deportiva por númberu de federaos n’España, y Xixón cuenta, gracies a Granda, con cuatro campos, dos privaos y dos municipales, lo que podría suponer, si hubiera ganes y propósitu na ciudá y nel Principáu, un elementu turísticu de descomanada importancia, especialmente pol tipu de personal que mueve l’actividá, de poder alquisitivu mediu altu ellí au nun tienen instalaciones municipales, y que, con toa seguridá, nun se van paseyar en traxe bañu pel barriu de l’Arena, como güei entama a ser vezu.
Esi golf municipal, faltu anguaño d’impulsu fayadizu, nun taría de más que promoviera un tornéu dedicáu a Granda, anqu’él nun practicara l’actividá, pero en ciertu mou fuera’l so pá.
Raúl Suevos
A 8 díes vencíos d’agostu de 2026
Torna en castellán en repdiv.blogspot.com
No comments:
Post a Comment