La matricula AFI

 

Propiamente tendría de falase de placa, o n’italianu targa, esto ye, l’indicador que correspuende a la matricula, y que nesti casu, la placa AFI, paga-y a Allied Forces Italy. Una placa que s’otorgaba a los vehículos militares y los de particulares d’aquellos que, perteneciendo a les Fuercies Aliaes, preferentemente la OTAN, yeren destinaos al país transalpín. L’asuntu nun yera trivial puestu que, polos alcuerdos algamaos al finalizar la Segunda Guerra Mundial, la placa torgaba munchos de los impuestos amestaos al tresporte; un privilexu que revicié demientres un tiempu.

Va yá dellos años que, creyo, desapaecieron por razones de seguridá, pero traigo equí’l conceutu polo d’Aliaos, dalgo que nesti momentu, tres la asoleyadura de la Estratexa de Seguridá Nacional del señor Trump, munchos n’Europa entamen a entrugase si podemos siguir pensando que sigue vixente. Y ello vien de la mano de la llectura del documentu, au atopamos que ye Europa la única parte del mundiu que l’ogru anaranxáu trata con despreciu nidiu y, a la vegada, trata d’amedranar. Una actitú que taría lloñe de lo que s’espera d’un aliáu ¿Non?

Per otra parte, la so inxerencia na política de los países europeos algama el nivel d’impertinencia pola so declaración escrita de sofitu a partíos del estremu del espectru políticu allegaos a la so propia y personalista doctrina. Dalgo, esto cabero, que recuerda espantiblemente a la decisión de la Komintern en 1935, dirixía por Stalin, de crear los Frentes Populares, siguida nel congresu del PCUS pola aceutación de pactos colos partíos burgueses. Unes decisiones que conduxeron a la esclavitú de munchos países europeos demientres un par de xeneraciones. España libróse pel anchor d’un bigotín.

Fala’l documentu trumpianu de falta de llibertá n’Europa, quiciabes la collecha de la qu’andamos más sobraos, xunto col imperiu de la Xusticia, y la llimpieza nes eleiciones, aspeutos nos que, nos tiempos caberos, el gran país americanu paez más carrancu; y nun debiera importar muncho si namái fueran declaraciones del Gil y Gil yanqui, pero esi documentu marca la política del Imperiu, y d’él deduzse que yá nun somos aliaos, más bien debiéramos guetar l’antónimo na ALLA, que mos devuelve los términos d’alversariu o nemigu. Una constatación perdura, pero ye lo qu’hai.

Escosasemos el tiempu a los europeos, con unos líderes mediocres nel puente de mandu pa la nuesa desgracia, y yo concluyo que nesta hora escura la única solución ye la propia Xunión, pero más federal y fuerte, más integrada; y si ficiera falta, más pequeña y decidida.

Raúl Suevos

A 9 díes vencíos d’avientu de 2025

Torna en castellán en repdiv.blogspot.com