Non poteva non sapere

 

Na primavera del 1992 entamóse una revolución n’Italia que se llevó per delantre a tolos partíos políticos de la dómina, dalgunos d’histórica sonadía, como’l Partíu socialista, el Comunista o la Democracia cristiana. Anguaño, si vustedes se decaten, dalu d’ellos esiste nel país qu’inventó’l Renacimientu.

N’España malapenes prestamos atención al aniciu. Tábemos como llocos con aquello de la Olimpiada, pero l’asuntu italianu, al qu’ellí dieron-y-l nome de Tanxentópolis, en referencia a la ciudá au too se cocía, Milán, y onde un grupu de procuradores -una figura qu’axunta la nuesa fiscalía ya instrucción, pero independiente, non como quier facer el señor Bolaños- desendolcó un infiernu llegal con 5000 persones investigaes, 1200 condergaos ente empresarios y políticos, y una trentena de suicidios, con Raúl Gardini, el propietariu de “Il moro di Venezia”, desafiante de la Copa América, como más notoriu ent’ellos.

Nun ciertu puntu, nel que la campaña xudicial nun acaba de rincar, empantanada ente’l garantismu llegal y los “yo nun sabía” de los investigaos principales, un cuadru intermediu, énte’l so enxuiciamientu previsible, llanzó’l memoriable “non poteva non sapere” tocantes el so superior xerárquicu. Dalgo manifiestu pero que, hasta entoncenes, namái merecía la categoría de niciu, y que, primero los procuradores y lluéu los xueces, decidieron tomar como prueba evidente. Y ehí abrióse l’abilsu.

El presidente del gobiernu y secretariu del partíu socialista, Bettino Craxi, tomó l’equivalente del nuesu Falcón nacional y salió pitando pa Túnez, au s’esilió y morrió dalgunos años más tarde, y metanes una escorribanda xeneral los partíos tradicionales foron eslleiéndose o desapaeciendo. Dempués vendríen dello años de recursos y contra recursos, al estilu italianu; pero eso ye otra historia.

Equí, na nuesa desgraciada España, too resulta más pedestre, más cutre. Los enchufes familiares del presidente, y les barraganes, múltiples, del otrora poderosu númberu dos del principal partíu del gobiernu, dan el toque de pandereta al nuesu paisaxe deprimente de corrupteles, que, anque nun seyamos conscientes, dexen pelos suelos eso que pomposamente, con secretaria d’estáu incluyía, tienen dao en nomar “la Marca España”.

Más alló d’esi gran PIB, col que’l doctor Sánchez se llena la boca, pero que non algama a tapar la realidá de probetería de la diezmada clase media y la creciente clase baxa, lo que la mayoría del personal entama a talantar, ye un país ensin rumbu, nel que la única referencia ye caltener el poder a toa costa, y nel que la consigna ye llamase a andana, esperando l’escaezu de los bóvidos, y el control xudicial de Bolaños. Ye lo qu’hai.

Raúl Suevos

A 31 díes vencíos de mayu de 2025

Torna en castellán en repdiv.blogspot.com

De Xan Acutu a Rodrigo Díaz

 

La mayoría de visitantes al Duomu de Florencia, Santa María del Fiore, entren disparaos haza la cúpula descomanada de Bruneleschi, afrescada por Giorgio Vasari; y malapenes se decaten del frescu grandiosu que s’atopa nada más entrar, nel muru de la drecha. Una pintura que representa una estatua ecuestre tridimensional d’unu de los primeros y más conocíos condotieros de la Italia renacentista. Un inglés, John Hawkwood, Giovanni Acuto pa los italianos, que se pasó tola so vida matando cristianos, dende la Francia de Crecy a les estremaes ciudaes italianes dependiendo de quién pagara los sos servicios.

El paisanu yera tan feroz que cuenten que nuna ocasión, viendo a dos de los sos capitanes engarriaos por quién se quedaba con una novicia -suponse que tres l’asaltu a un conventu- atravesó a ésta cola so espada p’atayar la cuestión y que los dos individuos nun perdieran el tiempu en pequeñeces más propies del apreski. Con tala fueya de servicios acabó a les órdenes de la Signoria florentina, que nun contratu caberu comprometióse a face-y una estatua, honorándolo nel so momentu cola sida d’esi frecu magníficu que, al paecer, nun-y prestó al protagonista.

Cómo él hebo munchísimos na Italia renacentista, anque a mín ye Giovanni delle Bande Nere el que meyor me cae; un condottieru de la familia Medici al que Liliana cavani dedicó un película preciosa y preciosista, pero enantes qu’ellos, na España medieval, tierra de resfregón ente civilizaciones, que non de choque naquel entoncenes, tamién hebo munchos, con especial rellumu’l del nuesu héroe nacional, Don Rodrigo Díaz, alzáu a esos altores a llombos del Cantar anónimu, y convertíu en lleenda en sieglos sucesivos poles necesidaes polítiques y sociales de les estremaes Españes y les sos dómines. Ensin dexar nunca de rellumar la so reblaneda. Ye lo qu’hai.

Podría pensase qu’agora toca echa-y un pocoñín de tierra percima, por aquello de la mazcaya Alianza de civilizaciones y los munchos moros que cayeron al so pasu, anque tamién trabayó pa ellos, especialmente en Zaragoza; pero ye un llibru que vien de la pérfida Albión, que’l so títulu resalvo intencionadamente,  el qu’una vegada más trata de destruyir la imaxe del Campeador so xustificación d’humanizalu. Y a min duelme como pisotón en callu, porque casi siempres ye lo mesmo lo que d’allá mos aporta. Acabamientu a la trayectoria d’España, pasando de llargo sobro Vernon, el de Cartaxena d’Indies, y tol restu de la so quincalla histórica.

Ye difícil atopar hispanistes británicos que se centren n’Alfonso IX de Lleón, el de les Cortes, el inventor -a la fuercia, yá lo sé- del gobiernu representativu, que la so paternidá s’atribuyen na tierra de los anglos con frecuencia sospechosa. Dedíquense a esto y déxenmos en paz al nuesu Cid.  

Raúl Suevos

A 15 díes vencíos de mayu de 2025

Torna en castellán en repdiv.blogspot.com

El municipalismu y los partíos nacionales

 

Tengo pasao, por razones profesionales, la mayor parte de la mio vida fora d’Asturies; n’España y en varios países foriatos, pero siempres ensin dexar d’exercer de playu allá au y cuando tenía oportunidá. Como anécdota queda’l fechu de que’l mio primer cachopu degustélu va dellos años na Casa España de Santo Domingo, y nun m’emocionó, como ensin dulda lo ficiera un pulpu con patatines. Ye lo qu’hai.

Magar esa distancia nunca tengo dexao de siguir los avatares, particularmente los políticos, de la mio ciudá, Xixón, na qu’agora, a la fin, atópome casi establecíu; y, ente esto, la mio esperiencia vital y la imaxe que la prensa de tou tipu mos tresllada, el mio desanimu, dicen qu’inherente al avanzar de la edá, nun dexa d’amontar.

Y ye que, dend’aquellos años gloriosos en que la naval, la siderurxia y la minería marchaben a tou trapu, la nuesa rexón y ciudá nun tien dexado de cayer en casi tolos sentíos, particularmente nel llaboral pero tamién en xeneral. Y como amuesa namái hai que dase un paséu pel centru de la ciudá y contabilizar el númberu de llocales que s’atopen piellaos, y con poca o nula posibilidá de reabrir.

N’Asturies namái paez dir-ye-y bien a Uviéu, siempres aposentada na so privilexiada capitalidá, que por sí sola promueve empléu de calidad y en cantidá, mientes el restu, especialmente les Ales, pero Xixón y Avilés tamién, ven cómo hai que tar al interés de quien gobierne nel Principáu, col sofitu de Madrid, según quien s’alcuentre nunu u otru llugar.

Agora en Xixón cuntamos con un gobiernu que podríemos calificar como llocal pola so escarsa implantación fora de la villa de Xovellanos. Un gobiernu de coalición nel que’l so partíu principal esfuerciase, aparentemente, en desarrollar la ciudad – va-y el futuru nello- y atopase con, llamémosles asina, circunstancies alverses que vienen de la mano de quien gobierna n’Uviéu o en Madrid, como amuesen los retrasos nel hospital de Cabueñes o’l túnel d’accesu al Musel, ensin nomar otres histories que tamién tán ehí.

La cabera, que tien concitao la unanimidá del restu de fuercies polítiques, vien del troléu que l’Autoridá portuaria, gubernamental, quier monta-y al Ayuntamientu a cuenta de los tarrenos de Naval; un proyeutu acordáu y robláu, que ta llamáu a impulsar el siempres desfavorecío Natahoyo, y de pasu casi rematar la siempres pendiente fachada marítima xixonesa.

Enquivoquense Madrid y Uviéu, y vanlo notar cuando haya que votar en Xixón, yá lo verán, anque yá va ser tarde.

Raúl Suevos

A 15 díes vencíos de mayu de 2025

Torna en castellán en repdiv.blogspot.com

Los heterodosos ucranianos

 

Yera esi un llibru qu’imponía muncho a los escolinos. Esplicabenmoslo n’asignatura de lliteratura, yá nel bachiller superior; los “heterodosos españoles” de don Marcelino Menéndez Pelayo, al que-y daben el títulu de gran polígrafu, y qu’a nós, adolescentes del institutu Xovellanos, nun llograba atrayenos más que les coetánees del entoncenes opuestu institutu doña Ximena, el nuesu interés auténticu penriba d’aquellos seis tomos apavoriantes de quinientes páxines la pieza. Y ye que la heterodoxia da pa muncho.

Don Marcelino cuntaba la historia d’aquellos que se salíen de madre, que tiraben per la cai d’enmedio en coses de relixón, filosofía o lliteratura, y que, polo visto, siempres tienen sío lexón na nuesa patria. Tamién podría dicise de los que fuyen o escapen de lo convencional, como los ucranianos nes coses de la guerra; y ye qu’ellos, énte la so prevista derrota pol segundu exércitu del mundiu, previsión casi xeneral, incluyendo la mía, supieron fuyir de les doctrines de combate preestablecíes no que se llama guerra convencional, y facer frente a aquel exércitu que, como Vernon en Cartaxena d’Indies, viaxaba colos sos uniformes de gala na mochila, pensando nel desfile victoriosu nes aveníes de Kiev.

Dende’l primer momentu de la invasión los ucranianos supieron adaptase a les circunstancies nueves, camudantes ca día y xeneralmente n’inferioridá numbérica y armamentística, y foron los primeros en sacar conclusiones de lo asocedío un añu enantes na guerra ente azeríes y armenios nel Nagorno-Karabaj, una engarradiella na que los drones aéreos, novedosamente, foron determinantes pal resultáu d’un conflictu.

Dende aquellos díes primeros, los ucranianos tiénense convertío na primer potencia mundial nesi aspeutu militar, desendolcando téuniques nueves, como los filodirixíos, los drones armaos con fusilería o escopetes, drones dispensadores de lava sintética, zones de muerte pente  medies los drones; drones balísticos d’algames impensaos; desarrollu avanzáu del “jamming”, la interferencia electromagnética, y agora, en primicia mundial, el drone naval armáu con misiles capaz de derribar un sukoi-30, un de los meyores interceptores aéreos rusos. L’acabóse.

Ucrania tien camudao’l campu de batalla. Un escenariu nel que los otrora poderosos medios acorazados anguaño namái se valoren en función de los impactos de drone que pueden soportar calteniendo la supervivencia de les sos tripulaciones. Un campu de batalla d’evolución tan rápida que fae obsoletes les doctrines y los planes de continxencia, y que nós, los españoles, navegando nesti nuevu mar embravecíu, qu’al sur paez preparar una tormenta, afrontamos llevando al timón a un capitán que nun paez prestar atención a los nubarrones premonitorios. Ye lo qu’hai.

Raúl Suevos

A 4 díes vencíos de mayu de 2025

Torna en castellán en repdiv.blogspot.com

El créditu, la opinión

 

Tengo d’afirmar, d’entrada, que nunca tien sío daquien que m’inspirara enfotu, si bien esi nunca entama cola noticia d’aquella urna escondía tres unes cortines naquel congreso balasmosu que los socialistes montaron pa escoyer al sucesor de Rubalcaba. Yera un mal aniciu, y facia pensar que, tres el so serendén, escondíase un tipu peligrosu. Pero con too y con ello, primer los sos correlixionarios, y dempués un númberu abondo d’españoles, alzáronlu a la más alta maxistratura de la nación, tres el Rei. Y nello tamos.

Col sofocón del apagón, y nun quiero facer canción, el nuesu presidente tiénmos dao, una vegada más, amuesa de les sos capacidaes histrióniques pa camudar la realidá según los sos gustos, o meyor, les sos necesidaes. Y ayeri, tres les dos intervenciones tardíes y vacíes del día de la dómina preindustrial que veníemos de sofrir, obsequiómos con una apaición nueva na que, aparte d’echar balones fuera, mui fuera, de la contorna de la so responsabilidá, centrándose nesa “oscilación enerxética”, de la que culpa ensin pruebes a “operadores privaos” ignotos, nun aportó un res que mos pueda aselar a los españoles, nin no técnico, nin no político.

Qué tiempos aquellos de la gota fría, va pensar dalgún, pues dempués vieno la cicloxénesis esplosiva, la DANA, y agora esta oscilación enerxética maldita, pa amestar a les nueses medranes d’adultos, camudando aquel simple home del sacu de les nueses velees infantiles. Agora too ye más cenciello, y complicao cuando falla la tecnoloxía, como esi taxista madrilanu qu’ensin GPS nun sabe aportar a la M-30. Ye lo qu’hai.

A min, oyendo al doctor Sánchez, veníenme los versos que Calderón dedicó al soldáu español na so comedia “el Sitiu de Breda”, nos que describe perfeutamente la condición humana de la piedra angular de la construcción del Imperiu Español, “…la cortesía, el bon tratu, la verdá, la firmeza, la llealtá, l’honor, la bizarría, el créditu, la opinión, la costancia, la pacencia, la humildá y la obediencia; fama, honor y vida son…”, y analizando eses carauterístiques d’aquel soldáu de los Tercios concluyo que namái la costancia paez adornar el pechu del responsable de la nuesa política en xeneral, y la de defensa en particular.

Son tantes les mentires, agora conocíes como cambéu d’opinión, que, tengo pa mín, la mayoría de los españoles, a lo menos aquellos mínimamente racionales, tienen algamao’l nivel de fartura. Per toos llaos el trampantoxu políticu nel que se tien instalao Sánchez paez esbarrumbase, y unu nun puede por menos que sentise enraxonáu énte tantu aprobiu y sinvergoncería, pues, queramos o non, él ye’l presidente de nueso.

Raúl Suevos

A 30 díes vencíos d’abril de 2025

Torna en castellán en repdiv.blogspot.com