La ponte de Palladio

 

Esta mañana aportóme una semeya autorretratu del fiu mayor. Taba en Bassano del Grappa, un pueblín de les estribaciones alpines italianes, al pie del monte del mesmu nome, escenariu dramáticu de la Primer Guerra mundial, que ye pernomáu pola grappa escelente qu’ellí se produz, y tamién por una ponte en madera que yá esistía, que se sepa, nel sieglu XIII, en plena Edá media.

Supongo que la so apaición nesi llugar tan prestosu, dada la hora y el día, debíase a asuntos llaborales, pero maxinone, a falta de la so esplicadura, que quería recordar una xornada, va yá abondo d’años, na que viniendo del norte, creo que de Cortina, desviamonos hasta ellí porque la muyer, apasionada d’Andrea Palladio, quería ver la ponte pernomada, refecha por él nel sieglu XVI. Y ellí apaecimos al entamu del atapecer.

Veníemos mayaos, y los neños fartos de coche, puesto que, entoncenes, nun esistíen los arbíos qu’anguaño ayuden a los pas nesos trances, y, como tampocu contábemos con GPS o google maps, aparqué na parte alta del pueblu. Dende ellí guetando’l descensu y guiándomos pol rumor del riu llegamos a un paséu, lungofiume-y dicen ellí, perfeutamente empedrao y con un murín que protexía a los viandantes d’una cayida al riu.

Al pocu, topamos con un garrapiellu de güelos, media docena quiciabes, sentaos rebiciando de la brisa del atapecer. ¿Vamos bien pa la ponte de Palladio? Equí nun hai dala ponte de Palladio, retrucóme un. La muyer y yo güeyamonos, entrugándomos si nun enquivocaremos el llugar. L’única ponte ta ehí abaxo, la Ponte de los alpinos, il ponte degli alpini, remató otru de los güelos. Y siguimos el camín tres dar les gracies.

Y ellí taba. Yera la ponte de Palladio, la reproducida en milenta estampes y litografíes. Formosa, toa ella en madera, colos sos múltiples pilastros, coles sos barandes y techumbre en tola so estensión. Hasta los neños paecíen contentos d’atopalu tres los munchos kilómetros, y cruciamoslu andando, esfrutando los detalles, hasta la fin au paecía metese nun edificiu que na so dómina debió ser onde se cobraba’l portalgu, esto ye, el peaxe, el mesmu de les autopistes anguaño.

Güei, en llugar del portalgu venden una grappa escelente, de la que entós namái me llevé una botella, pa reconcomiu posterior, y au mos esplicaron que la vieya ponte bombardexada, nun sé si por aliaos o tedescos, na Segunda Guerra mundial, fuera reconstruyida polos Alpini tres la guerra,  lo que daba llugar al cómo yera conocío por casi tol mundiu anguaño.

Una ponte estraordinaria qu'axunta dos orielles.

Raúl Suevos

A 22 díes vencíos de xineru de 2024

Torna en castellán en repdiv.blogspot.com