El guaḥe de Bagdad

 

Güei les noticies veníen cargaes de ñeve. Muncha ñeve en Davos, au s’axuntaben los líderes de la política y la economía mundial, y tamién muncha nieve en Centroeuropa, onde ta cayendo una ñevada de dómina, inclusive p’aquellos llares. Pero pa nós casi tol interés suizu taba nes andances del nuesu doctor Sánchez qu’ellí diba con dos oxetivos nidios: amosar lo bien que fala inglés al auditoriu, el so espiche nun podía ser xulgáu pela fondura del so mensax, como l’aplausu tebiu que-y dieron a la fin paez atestiguar; y tamién aconceyase colos empresarios españoles pa sacase una fotografía y amosar asina lo bien que se lleva coles empreses del IBEX, dalgo al paecer mui importante según dalgún de los sos múltiples asesores en comunicación.

D’esta reunión malapenes tuvimos imáxes, a lo menos cuando esto escribo, pero nel video curtiu que los telediarios mos brindaron podía vese, nuna habitación estrecha y aforfugante, a unos empresarios, de los que naide faltó a la cita, serios, como apesadumbraos, como temerosos, como dicen que taben aquellos qu’esperaben nes celdes de les cheques que vinieran a nomar a los designaos pal paséu nocherniegu. Una escena que, a mín paezmelo, difícilmente puede ser emplegada como sofitu de dalu mensax subliminal, salvo para los adeptos radicales, pero vaya usted a saber.

Dalgunu de los convocaos, nun voi señalar por respetu, recordaben al neñu aquel británicu, fiu de rehenes, que lu punxeron al llau al dictador demoníacu pa amosar al mundiu’l so llau paternal y bonable. El guaḥe tenía una cara de llercia mayor que la que punxe yo cuando de neñu me llantaron al llau del príncipe Aliatar, embaxador de los Reis magos, cola so carona embetunada de negru, metanes l’escenariu del casinu del barriu La Calzada de Xixón. Aínda nun se me fue’l sustu, como aquel neñucu británicu en Bagdad supongo, como a los empresarios españoles  en Davos. Qué mieu.

A la fin el mensax que queda ye que la política moderna, non namái equí n’España, si non namái hai que ver la campaña de primaries del tarrecible Trump nos EEXX, básase nos guelpes d’efectu más que nes aiciones efectives. Ye lo qu’hai, y lo que ye peor, el cuerpu d’electores activos paez que, visto lo visto, ye tremendamente sensible a estos “númberos” el gobernante de nueso.

Sicasí, nun debemos preocupanos demasiao, esa imaxe, como too na política anguaño, va durar mui poco, el tiempu xustu pa fabricar otru pequeñu efectu pa la galería.

Raúl Suevos

A 17 díes vencíos de xineru de 2024

Torna en castellán en repdiv.blogspot.com