Técniques de negociación

 

Va yá abondo d’años, el tiempu ye inclemente, el Ministeriu de Defensa contrató la realización d’un cursu de Comunicación pública cola facultá de Ciencies de la información de la Universidá Complutense de Madrid. N’él yo yera un de los aplicaos escolinos, y nel plan d’estudios esistía una materia col nome de Técniques de negociación.

Yera un asuntu que, de primeres, nun paecía mui rellacionáu cola finalidá del cursu, anque lluéu mos dimos cuenta de la so importancia, tanta que’l profesor yera’l decanu de la propia facultá, y, anque güei casi too yá lo escaecí, una de les so clases maxistrales tornóme estos díes a la tiesta dende’l caxón de les alcordances.

Dicía’l vieyu profesor que nuna negociación, si esiste voluntá d’algamar alcuerdos vidables, les partes, toes, deben tar dispuestes a ceder nos sos presupuestos iniciales, pues ensin esta predisposición nun se puede falar de negociación y sí, sicasí, d’imposición, que ye lo que’n munches ocasiones asocede, si bien la necesidá de caltener les apariencies fai que mos lo presenten como resultáu de la cesión de les partes.

Contaba tamién l’enseñante, y sorayábalo como axiomáticu, que cuando una de les partes cedía en too ensin presentar, aparentemente, dalu tipu de resistencia, yera señal evidente de que nun taba nes so intenciones respetar lo pautao. Y equí ye a ónde quería aportar. 

Y ye que los pactos recien algamaos pol secretariu xeneral de los socialistes españoles, el doctor Sánchez, presenten toos ellos, con indiferencia de quién seya l’interlocutor nos estremaos contubernios bilaterales, el común divisor de la entrega total a los requerimientos de la otra parte. Una cesión casi absoluta, pero siempres colos costes direutos y colaterales, o inesperaos, a costa del restu de los españoles.

Y a min too ello llévame a pensar que nun hay voluntá de cumplir colo pautao, más allá de lo que’l tiempu vaya imponiendo en cada casu; y ye que’n mayu viniente va haber eleiciones nes Provincies vascongaes, con cambéu probable de los equilibrios anguaño; la amnistía, según proclama del propiu presidente del tribunal constitucional, va sofrir un íter que nun va acabar enantes de la fin del 24; camín más curtiu, sicasí, que’l del referéndum hipotéticu, que, más allá de la grandilocuencia de dalgunos, y cómo señala’l cabréu de los CUPistes, nin ta nin se lu espera.

Los presupuestos pal 2024 tán yá aprobaos, y eso da-y tiempu pa repartir cartes nueves al tahulleru –neoloxismu de tahúr y fulleru- qu’anguaño mos gobierna. Ye lo qu’hai.

Raúl Suevos

A 12 díes vencíos de pallares de 2023 

Torna en castellán en repdiv.blogspot.com