Malapenes un sollutu nos medios de comunicación nacionales, eso ye lo que supunxo la muerte d’un cadete de l’Academia Xeneral Militar nel día d’ayeri nel Campu de maniobres de San Gregorio. Un llugar infernal au s’adiestren los futuros oficiales del Exércitu Español y tamién el restu d’unidaes del mesmu. Un tarrén batíu pol cierzo demientres l’hibiernu, esi vientu norteñu qu’ellí nomen Moncayo y que fai que la sensación térmica lleve a los que lo sufren a pensar que tán en plena tundra siberiana; ye tamién un territoriu tórrido pel branu, con polvarees intermitentes ente calmes sofocantes ensin dala fuente d’auga nos sos 35000 Ha y 110 km de perímetru. Un llugar inclemente, duru y ensin dulda afayadizuu a la finalidá que se busca; formar a los futuros oficiales del Exércitu.
El cadete, alumnu de cuartu curs, alférez alumnu poro y cola mayor parte de la so formación yá realizada, yera una promesa de bon facer pa la Infantería, Arma a la que pertenecía, y, según les noticies, realizaba una marcha topográfica per dalguna zona del campu. La autopsia fala de muerte ñatural pero, sía que non, va ser una investigación xudicial la que trate d’esclariar les circunstancies. Too esto pocu o nengún consuelu va trayer a los sos pás y allegaos; y na so promoción va ser recordáu como’l primer cayíu n’actu de serviciu. A min, el socesu, déxame un ciertu regustu amargurientu, magar que’l Decálogu del cadete los encamiente a ser emplegaos nes ocasiones de mayor riesgu y fatiga, pos la muerte siempres ye difícil d’aceutar, más aínda la muerte d’un mozu. Quiciás seya porque nestos mesmos díes vemos a la policía impotente, en toles esquines d’España, énte los rebaños, pallabra qu’uso intencionadamente, de mozos, y mozes, cellebrando la fin de les midies escontra’l covid, en botellones multitudinarios qu’acaben col sosiegu de los vecinos y suenen a invitación pa una sexta fola. O tamién colos asaltos de manada a quien delinque, pa los acosadores, por simplemente ser estremao. Too ello danos una imaxe de país del cual se fai difícil sentise argullosu, y si pensamos nel futuru…pa preocupase.
El nuesu cadete xixonés tevo poca cobertura informativa, ye otru l’interés de los medios de comunicación, la so xoven consagración al serviciu de la patria nun provoca l’almiración de los sos conciudadanos, quiciabes, seique, llegáu’l casu d’una puntual crisis internacional mos acordemos d’él y los sos collacios d’armes, como de Santa Bárbara cuando truena, poro’l regustu amargurientu de la noticia y de lo qu’implica, si mos paramos a pensar un pocu nello.
Raúl Suevos
En Xixón a 7 díes vencíos de setiembre de 2021
Torna en castellán en abellugunelcamin.blogspot.com
No comments:
Post a Comment