Col día d’Asturies aportó’l momentu d’anunciar lo que va ser la fin de llexislatura y, como cabía prever, espéranos a los asturianos un apigazamientu políticu, si ye que nun tamos yá n’él, xustificáu nos discutinios sobro la reforma del Estatutu d’Autonomía. Una reforma que, según paez, ye imprescindible pal progresu de la rexón, anque con que sirviere pa torgar la cayida haza la inconsistencia nacional na que mos atopamos, a munchos bastaríanos.
La reforma paez tener como oxetu principal la cooficialidá de la llingua asturiana, una cooficialidá amable acordies coles pallabres del presidente Barbón, anque nun se sepa mui bien qué quier eso dicir, máxime si atendemos a les derives llingüístiques d’aquelles rexones que yá cuenten con esa “maraviosa” cooficialidá nes que la radicalización política, l’acosu de los disidentes y la persecución del castellán son les tóniques xenerales de les mesmes. Toi pensando nel País Vascu, Cataluña, Baleares, Valencia y, a lo que paez, tamién dientro de pocu Galicia.
Asturies tien munches ayalgues culturales y ent’elles ye l’asturianu la más importante. Fálolu y escribolu dende va dellos años, seguramente non col suficiente remangu, pero sí p’afirmar que ye una llingua almirable a la qu’hai que defender, promocionar, enseñar y fomentar el so usu; exactamente como yá proclama el nuesu estatutu y, dende 1998, como tamién desarrolla la llei d’usu y promoción del asturianu; una llei impulsada polos qu’anguaño son oposición na Xunta y de la que’l güei partíu de gobiernu nun quiso nun saber un res demientres toos estos años. ¿A qué vien esti cambéu de sópitu y a les carrenderes?
Los equilibrios políticos, o desequilibrios según se mire, son responsables de decisiones coyunturales que puen xenerar problemes demientres dellos años. Al mio mou de ver atopamonos nuna d’eses ocasiones; el PSOE nun tien pesu abondo y necesita los sofitos de la estrema esquierda, equí y en Madrid, y nel casu asturianu l’alcuerdu pasa por abrazar una cooficialidá que nun ta nel ánimu del paisanaxe astur -¿Cuántes manifestaciones multitudinaries vimos reclamándola?- que se sofita n’encuestes de pagu per parte de l’Academia de la LLingua encargaes a un organismu vascu gustante de los oxetivos de la encuesta. Nun hai anguaño abondo xustificación pa una decisión tan radical.
La concordia de la xente d’Asturies ye otru de los grandes valires rexonales, lloñe tamos de la polarización que se respira notres rexones. La imposición de la cooficialidá, amparada nuna escuálida mayoría coyuntural na Xunta Xeneral namái pue traer un encrespamientu de les opiniones polítiques y un deterioru del bon clima social qu’anguaño reviciamos
Raúl Suevos
En Xixón a 9 díes vencíos de setiembre de 2021
Torna en castellán en repdiv.blogspot.com
No comments:
Post a Comment