Tal día como güei, un 30 d’abril de 1975, cayía la capital de Vietnam nes manes del vietcong, o lo que ye lo mesmo, les fuercies armaes de Vietnam del norte. Foi una cayida, como casi tola guerra ellí desendolcada cola necesaria cooperación de los EEXX, vivida casi en direuto por toos nós, puesto que dende l’entamu les cadenes de televisión norteamericanes encargáronse de trayer aquelles imáxes a les nueses xintes familiares énte’l televisor. La guerra en direuto, per primera vegada.
Al nivel de nueso apurrimos a los meyores de los nuesos corresponsales de guerra, de los qu’agora me vienen a la memoria’l míticu Miguel de la Cuadra Salcedo, o l’asturianu Diego Carcedo. Y asina foi hasta esi día del xuiciu final nel que multitú de ciudadanos norteamericanos y vietnamitas medranosos d’un futuru negru atacabense ente la verxa de la embaxada yanqui a la gueta d’un asientu nos helicópteros que dende l’azotea evacuaben a tol qu’ellí consiguía llegar haza los portaviones fondiaos nela averada mariña.
La xornada, cabera de varios díes, piesllóse coles imáxes del llanzamientu al mar d’esos helicópteros una vegada finalizada la so misión d’estafeta dende la embaxada, y ye que, les bodegues taben ocupaes por milenta desamparaos fuyios de la previsible represión comunista una vegada ocupada la ciudá y el país.
Pasáu’l tiempu, y tres delles fames, aportó ellí’l reflexu de la Perestroika de Gorbachov, o lo que ye lo mesmo, la desapaición de la Xunión Soviética, lo que supunxo un choque ideolóxicu descomanáu pa la dirixencia vietnamita que tomó una decisión radical: Reconocimientu de la propiedá, iniciativa privada ya inversión estranxera. Unes midides aparentemente simples qu’implicaron, baxo la batuta del siempres único y poro hexemónicu partíu comunista, una revolución económica con una medría sostenida de la economía del país que reduxo les cifres de probitú estraordinariamente.
En Cuba, con Fidel Castro, nada d’esto asocedió y la nomada perla del Caribe, la islla de les tres coseches, tres superar gracies a l’ayuda venezolana un tarrecible periodu especial de penuries fondes, seguieron calteniendo la economía centralizada y la propiedá estatal escontra de lo que les evidencies notros “paraísos” comunistes, como Vietnam, tien amosao. El recien congresu del partíu comunista cubanu refrenda lo yá esistente; refierse al “bloquéu” norteamericanu como xustificativu de tol sistema dictatorial que caltien a la islla en condiciones, anguaño cola pandemia del covid, casi infrahumanes, quedando a salvo namái la xerontocracia dirixente y los sos familiares allegaos, a los que nada d’esto paez afeutar.
Raúl Suevos
A 30 díes d’abril de 2021
Torna en castellán en repdiv.blogspot.com
No comments:
Post a Comment