Siempres que se fala de futuru hai que facelo con tremenda prudencia pero, per embargu y polo contrario de lo qu’asocedía va una xeneración, si amás se-y axudica nome de muyer, y n’Alemania, paez que’l futurible faise más concretu y llogra una solidez que lu fai más que probable. Podríemos falar de certidume.
Dende la creación de la Xunión Europea'l pesu xermánicu tien sío pimpanu, quitando en cuestiones de defensa, estaya na que siempres se caltuvieron pasivos, obligaos pol so pasáu recien de guerres mundiales y por una Constitución eminentemente pacifista, nel restu d’asuntos siempres hebo que contar col paecer de los teutones que, na mayoría de los casos, llevaron el barcu a la so oriella, y si non, ésti acababa fondigáu na travesía. Recuerdo agora la chaptalización, un procesu d’añedío d’azucares p’aidar a la lleldadura del vinu que’l canciller Schroeder fizo aprobar en beneficiu de los caldos tedescos, y que los países del sur tuvimos que tragar a remolera; por poner un exemplu.
La señora Von der Leyen, presidente de la Comisión europea, y la propia canciller Anxela Merkel, son los meyores exemplos del poderíu alemán y, particularmente, d’un feminismu bien entendío, y nun señalo a naide. Detrás d’elles, y con una ideoloxía distinta y, en dalgunos aspeutos, más moderna, llégamos una nueva Diana protectora de la naturaleza, tamién de la caza. Trátase d’Annalena Baerbock, la líder de los verdes alemanes qu’encabeza toles encuestes pa les llexislatives que van tenese’l septiembre viniente n’Alemania.
Baerbock encabeza unos verdes modernos y pragmáticos que nun tienen un res que ver colos cuasi radicales de va venti años. Yá casi nin son pacifistes, pela cueta, creen qu’Alemania debe facer más pola so seguridá y la d’Europa, invirtiendo más y esplegando más en misiones colos sos socios; llántense nidiamente escontra China nel asuntu Uigur y les sos implicaciones económiques y tamién escontra’l gasoductu Stream 2 rusu por ser antieuropéu y resalviase les sanciones aprobaes. Too ello con un claru apueste pola contención del cambiu climáticu y el fortalecimientu de les polítiques verdes.
España acaba de presentar el so programa de xestión de los fondos europeos y ye consideráu un de los meyores tocantes el porcentaxe dedicáu a la descarbonización de la economía, o lo que ye lo mesmo, facela más sostenible, pero, coles mesmes, mui criticáu pola falta d’especificación de les estayes d’aplicadura y, entá peor, de cómo se van xestionar y fiscalizar les inversiones, el yá clásicu escurantismu del doctor Sánchez. Sia que non, los tiros van haza lo verde.
La mío atención sobro Annalena llegó de la mano d’un comentariu del señor Errejón, comunista Gramscianu como Iglesias pero muncho más llistu y taimáu qu’ésti, qu’apuntaba que’l futuru d’Europa y d’España vendría per esi camín, y qu’él, de mayor, quería ser verde. Va a haber que siguir l’asuntu.
Raúl Suevos
A 9 díes vencíos de mayu de 2021
Torna en castellán en repdiv.blogspot.com
No comments:
Post a Comment