Corría’l mes de febreru de 1898 cuando se presentó en L’Habana l’acorazáu norteamericanu Maine, una de les xoyes de l’armada USA, que venía, suponíase, en visita de bona voluntá, daqué qu’entraba nos usos d’entoncenes y d’agora pero que, daes les circunstancies –la guerra nun pintaba bien pa los mambises y en Norteamérica llevábase a cabu una feroz campaña de prensa escontra d’España-, yera un elementu de presión adicional pal gobiernu español.
El barcu y los sos tripulantes, inorantes de la traxedia, yeren una trampa con detonador temporal que diba servir pa xustificar unos meses dempués el lladroniciu de Cuba y tolo que quedaba de les posesiones españoles d’ultramar. Too s’aniciaría cola esplosión interna de la santabárbara del buque provocada pola autocombustión de los depósitos de carbón, asitiaos –erru de diseñu- na inmediatez de les municiones.
El buque foi a pique con 266 tripulantes, y, col dictamen interesáu d’una comisión técnica yanqui de que fuere una mina la causante, los Estaos Xunios declaráromos la guerra, colos resultaos de sobra conocíos y que los cubanos lleven pagando, en ciertu mou, dend’aquel día malfadiau. El Maine foi una trampa pa nós anque llegó envueltu no que paecía un actu de cortesía.
Ente les consecuencies del Maine tevo la Xeneración del 98, un tema típicu de les revalides de la mio xeneración, como los reyes godos lo foron de l’anterior, y nun sé cuál va ser el que toca agora pero a min, dende l’entamu del nuesu sistema políticu anguaño, paecióme que’l títulu VIII de la constitución de nueso llevaba nel so interior, como’l Maine, muncho peligru. Daqué que, témome, táse poniendo n’evidencia.
L’estáu autonómicu foi bien recibiu porque venía a averar l’alministración del estáu a los alministraos, a los ciudadanos. A min, como asturianu, costábame entender lo de les comunidaes hestóriques, pero dilo por bono, anque pensaba que lo del repartu de competencies nun taba nidio, y podía entrañar dificultaes nel futuru.
Güei vemos, col espectáculu llamentable de les 17 sanidaes más dos y la non xestión de Moncloa, que la supuestamente envidiable sanidá española ta lloñe de lo que maxinábemos; y la educación, n’irrefrenable cayida dende va dellos años, atópase agora cola propuesta de los partíos del gobiernu y los independentistes pa eliminar la obligatoriedá del español como llingua vehicular nel enseñamientu. Pue ser la esplosión definitiva de la santabárbara del renqueante galeón español y el presaxu del so afondamientu.
Esta vegada nun son los yanquis, somos nós mesmos.
Raúl Suevos
En Xixón a 3 díes vencíos de payares de 2020
Torna en castellán en repdiv.blogspot.com
No comments:
Post a Comment