De les coses de Cuba ye difícil facese una idea nidia. Los rexímenes autoritarios, especialmente los comunistes, tienen ente les sos carauterístiques el control asolutu de la información, en particular la negativa, que suel ser la más común. Ye lo que asocede cola finca de los hermanos Castro dende va yá 60 años y ye una situación semeyante a la que podemos güeyar en China tocantes l’entamu la pandemia de gripe asiática, au llegaron a encarcelar a varios sanitarios por escribir en redes sobro l’asuntu.
Estos díes, sicasí, aporten informaciones sobro l’ausencia de preservativos nes farmacies habaneres, asuntu non despreciable pa un país que puxa pol lideralgu ente los destinos turísticos de calter sexual; ellí, u les vulgares prostitutes camudense en xineteres, oficiu muncho más reguetoneru y susceptible de ser presentáu como daqué más festivu y menos censurable. La falta de condones convierte la yá de por sí dura vida de les meretrices, y de la población en xeneral, nuna actividá de riesgu mayor si tenemos en cuenta que en Cuba nun hai SIDA pol simple fechu de que nun se dan cifres, como asocede col Dengue o cualquier otru problema sanitariu, ellí nun hai cuentes y, polo tanto, nun hai problema, pero habelo háilo.
Los tiempos caberos cubanos nun traen más que noticies de penuries. Cola cayida de los aportes venezolanos, en forma de petróleu sovencionáu, y la repatriación de mélicos d’estremaos países, la balanza económica ye deficitaria, muncho más de lo tradicional nel réxime. La cayida del turismu norteamericanu recorta aínda más los ingresos, y los capitales emplegaos na construcción d’hoteles de cinco estrelles, agora vacíos, amuesase como un sarcasmu demoníacu pa la población; mentanto, el gobiernu de Díaz Canel ufierta midíes polítiques cosmétiques que namái busquen el caltenimientu del castrismu más allá de la llonxevidá de los sos propios líderes.
Equí, escaecida yá la visita real a L’Habana, hai otres coses más importantes que dexen a Cuba orellada na corriente de les grandes noticies internacionales. Venezuela y Guaidó, Iran-USA, Brexit, pandemia de gripe asiática, too paez más importante que la llucha pola supervivencia cotidiana de los cubanos; too paez indicar que van tener que depositar les sos esperances nuna rápida desapaición de Raúl Castro pa ver si Díaz Canel se paez en dalgo a Adolfo Suarez o van tener que recurrir a la violencia popular pa, por fin, facer la revolución, la de verdá.
Raúl Suevos
A 1 de febreru de 2020
Torna en castellán en repdiv.blogspot.com
No comments:
Post a Comment