Coló Xuanxu, ensin avisar

COLÓ XUANXU, ENSIN AVISAR

La Promoción, pa los militares, ye muncho más qu’un grupu llaboral o educativu. N‘Academia Xeneral Militar entres cuando malpenes entamaste a formate como persona y pases ellí unos cuantos años en réxime d’internáu, cinco na mio dómina. Los llazos que se creen son indisolubles de fuertes que son, nin la espada d’Alexandru algamaría a tayalos. Son llazos formaos per munches hores de brega, de marches y de sudu, d’exercicios con fueu real, de profesores convencios de que la disciplina imprimese pente medies la obediencia y en munchos casos el castigu. Salimos, nun sé si con espíritu de cuerpu, pero sí con espíritu de promoción. La mía ye la xxxv, la de Xuanxu.

Xuanxu aina empecipió a resaltar por contestatariu nun ambiente au eso yera sacrilexu. El siempres tenía una salida de tonu, siempres de bon humor y siempres en positivu. En segundu añu, creo recordar, demientres una galopiada pel campu de San Gregoriu, el so caballu llegó ensin xinete y a Xuanxu atopamoslu desorientaú, pasó pel hospital militar y al so regresu yá nun yera’l mesmu, o meyor, yera’l mesmu pero amás yera estrambóticu. Dende entós dexó de ser Téllez pa ser siempres Xuanxu. Un elementu distintivu de la xxxv.

Cuando salimos tenientes d’Infantería Xuanxu garró’l camín del cursu d’Operaciones Especiales y yo que colé pa Montaña perdí-y un pocu la pista. Supe que se casara y divorciara malpenes nun telediariu y yá capitanes recuperamoslu na Brigada de Montaña, nel batallón Pirineos. Ellí aportó fechu cuasi un activista pa lo que yeren los parámetros de la institución. De la so salida de formación metanes una Misa entá se fala ente los collacios de Montaña. Él entendía que nun yera de recibu nun actu militar y el casu dio p’arrestos, recursos, victories y derrotes. La Reserva sería'l so escape defensivu.

Per esa dómina la so molición filosófica tocó techu. Coló pa la India a meditar y pelli tuvo dellos años hasta que, según me contó, la llegada de neófitos occidentales al so particular retiru a la gueta d’un supuestu gurú y el barruntu de que pudiere ser él a quien buscaben fo motivu abondo pa pensar que yera’l momentu de tornar, y asina lo fizo depués de múltiples peripecias viaxeres.

De nuevo n’España, y col aselu que siempres apurre la edá, tuvo trabayando un tiempu pa La Rioja en xeres d’emigración hasta que l’amor, o daqué asina, picó otra vegada na so puerta en forma d’una natural de Querétaro, la maraviosa ciudá mexicana, a onde emigró a la gueta d’esi nirvana que dexara na India. Tampocu resultó nesa ocasión pero sí'l so namoramientu de la ciudá y el país, y tamién un amor nuevu encarnáu esta vegada nuna sinaloense de güeyos fermosos y otres bondaes non menos curioses. Con ella intentólo per dellos años pero pesó más, creo, Sinaloa y la so peculiar cultura de la violencia, cantada polos Tigres del Norte y caltenida pol Chapo Guzmán y los sos esbirros.

Nesta dómina tuve ocasión de visitalu. Como yo nun pude subir a Querétaro foi’l quien baxó al DF. Quedamos nel Centru Español, cabo’l Zócalu, y pellí apaeció Xuanxu tirando de la so pequeña maleta, americana y sombreru crema, abriéndose pasu ente'l xentíu. Los mios cuñaos, vecinos del DF per 12 años, taben plasmaos, nunca vieren apaición semeyante. Yera Xuanxu, que nun conducía y desplazabase per México como si de la cai Uría se tratare.

La comida, nel Centru cómese perbono, foi una raxona de estraversión y vivencies de Xuanxu; los cuñaos de mio entá lu recuerden como si fuere va unos meses y siempres con sorpresa y ablucamientu. Yo recuérdolu como si fuere’l comedor de l’Academia, yera’l Xuanxu de siempres, simplemente dexárase barba, yá cana, y un mostachu esplendidu.

Estos años caberos tornamos a venos en Xixón. Pasaba una temporada de reposu en casa Perico, un amigu común que tien una Quintana na zona de Colunga. Habíenlu operáu de cáncer y taba decidíu a superalo y asina paeció cuando tres dellos meses regresó al so Querétaro aparentemente fuerte y sanu. Pero’l bichu tornó.

Va unos meses descubrí que taba en casa la so familia, en Cartaxena. Un descuidu nel corréu dióme la pista y confesóme que recayera. Nun quería entrar na dinámica de más operaciones y quimioterapies, valoraba más la calidá de vida. Siempres me comentaba daqué sobro les parolaes que yo escribía pero facia una selmana que taba en silencio radio. Malo.

Güei enteréme que Xuanxu mos dexara y la Promoción pierde más qu’un miembru, pierde un de los sos xilgueros y eso dexanos con menos música, más murnios, más solos.

Nos vemos Xuanxu.

Raúl Suevos

A 13 días vencíos de febreru de 2020

Torna en castellán en repdiv.blogspot.com