Yera’l tiempu en qu’ainda nun tinía’l sofitu económicu de los medios iraníes o rusos, y pa espublizar el so evaxelu particular prodigábase per estremaos platós televisivos; supongo que compensación monetaria mediante. Un d’ellos yera 24 Hores, cuando lu dirixía Vicente Vallés y muncho enantes de que’l programa se convirtiera n’exemplu paladín de lo que nun debe ser el periodismu d’opinión.
Ellí, en 24 Hores, produxose un alcuentru tirante que, posteriormente, ye posible que fuera causa pa que’l presentador camudara de caena. Y quiciabes ellí foi au oyí al vecín de Galapagar falar sobro Xuegu de Tonos, una serie que yo yá siguía, y de Borgen, otra que punxo como exemplu de enseñu sobro la política anguaño de cualquier país. Lo que me llevó a guetala y siguila hasta la so desapaición tres cuatro temporaes.
Borgen ye’l nome del edificiu qu’en Copenhagen alberga a Parlamentu y Gobiernu, asina como los despachos de los sos componentes, qu’ellí desarrollen la so actividä ensin qu’haya cuchillaes nin disparos, aparentemente. La exa narrativa ye una moza política, líder d’un partíu pequeñu de centru que, por eses coses de la política vese dirixendo un gobiernu multipartidista metanes les intrigues, aliances, chantaxes y traiciones qu’unu nun esperaría d’un país que dende’l fin de les sagues vikingues ofrez una imaxen de tranquilidá y amabilidá.
El casu ye que, nun momentu dao de la historia ficticia, los guionistes faen apaecer un yacimientu de petróleo descomanáu nes costes de Groenlandia, desendolcando les fuercies independentistes de la islla, l’interés de petroleres y potencies varies, y too un xuegu políticu internacional ya internu en Copenhagen. Casi como güei.
Y ye qu’esa estaya embruscada del mundu ye oxetu d’interés dende’l S. XV au los nuesos pescadores, particularmente los asturianos, pesquen el bacaláu dende que les ballenes desapaecieron de la nuesa mariña, y agora, cambiu climáticu mediante, pasa a ser más interesante aínda, pues pel este bordíala la yá pernomada Ruta del Norte, viniendo del Árticu rusu, y pel oeste la Ruta del Noroeste, al traviés de la mariña d’Alaska. Rutes que recorten un 50% los tiempos actuales pa les mercaderíes chines, 20 díes menos. Tou un mundu al qu’hai qu’amestar la promesa de Tierres rares nel so sosuelu.
Los guionistes de la serie dieron-y un final feliz al problema; agora, col ogru naranxáu de Washington y los sos esbirros obedientes, andamos los europeos, y particularmente los inquilinos d’esi Borgen real, palpándomos la ropa. Son tiempos pa dir abrigáu, y paez que mos garra ensin ropa abondo. Ye lo qu’hai.
Raúl Suevos
A 15 díes vencíos de xineru de 2026
Torna en castellán en repdiv.blogspot.com
No comments:
Post a Comment