Entrugábase’l protagonista de “conversaciones na catedral”, una de les grandes noveles de Mario Vargas Llosa, por “cuando se xingó’l Perú” y, dende entós, muncha xente faise la mesma entruga ensin atopar respuesta pa una situación, la d’esti país, que paez nun tener fin.
Nestos meses caberos el Perú tiense averao a la nuestra cotidianeidá por algamar unes cotas tarreciblemente negatives na llucha escontra la pandemia, como dalgún de los sos vecinos del continente americanu, y como nós mesmos cabría añeder. En medio d’esa voráxine’l país andín tevo que trepar con una crisis política nueva, la enésima, y unes eleiciones presidenciales que vieron algamar la victoria a Pedro Castillo, por un garapiellu de votos, sobro Keiko Fujimori.
A España nun paez importar-y muncho les coses del Perú, pero dalguna d’ellas puedenos llegar, como parte de la coca que se cultiva y procesa nel VRAEM, acrónimu que nasconde a los valles del los ríos Apurimac, Ene y Mantaro, esti caberu, por un casual, oxetu d’entruga ensin respuesta va non mucho nel programa Pasapalabra. Un valle que s’alza como primer productor mundial d’esi productu malditu.
El señor Castillo, de profesión maestro rural, aporta a la presidencia como resultáu d’una situación inesperada –a nós yá mos asocedió con Zapatero- pos el líder del so partíu, Perú Llibre, un estalinista de nome Vladimir Cerrón, nun podía presentase a les eleiciones por tener causes xudiciales pendientes, y llantólu a él cola intención nidia de tutelalu posteriormente. Una situación clásica que suel xenerar fuertes dolores de cabeza ya inestabilidá política.
El señor Castillo dame mieu, confiésolo. Nos díes caberos tiense despachao con declaraciones tranquilizadores tocantes les sos intenciones polítiques pal futuru viniente, y ye que les campañes electorales en Perú, fondamentalmente populistes, nun dan pa facer muncha prospectiva, tampocu les promeses. Eses manifestaciones resultenme calcaes a les que facia Hugo Chávez recién ganaes les sos eleiciones primeres en Venezuela. Y yá ven como ta esi país.
Castillo quier una constitución nueva, y eso tamién me preocupa; coles mesme pretende desarrollar un sistema de milicies populares, qu’ellí llamen rondes, una iniciativa que nació por pura necesidá en tiempos de Senderu lluminosu y qu’agora paez ser la base pa daqué más fonderu y peligrosu. Vamos ver cómo acaba.
Güei, na so toma de posesión, descolgóse con un discursu indixenista cargáu de perles antiespañoles, col rei d’España ellí presente, y reivindicación d’un pasáu feliz precolombinu que yá namái utilicen los populistes nacíos y desarrollaos na precariedá intelectual y política, amás de la social y económica. Cerrón, el so tutor, d’ideoloxía castrista más que comunista, va emburriar haza la radicalidá y Castillo, ensin sofitos na Cámara va navegar ente esa pulsión y la de la realidá peruana. Pue ser una travesía tempestosa.
Raúl Suevos
A 30 díes vencíos de xunetu de 2021
Torna en castellán en repdiv.blogspot.com
No comments:
Post a Comment