Bentham fo’l creador de la doctrina del Utilitarismu, allá pol S. XVIII, filosofía política que diba desarrollar años más tarde John Stuart Mill, con obres como “sobro’l gobiernu representativu”, na qu’afirma que la meyor acción ye aquella que produz el mayor bienestar pal mayor númberu d’individuos.
Mill na so obra dános les claves pa construyir el meyor gobiernu pa la meyor sociedá y, ente otres razones, básalo na definición nidia de los drechos y llibertaes de los ciudadanos, y les llendes de l’acción del gobiernu, pero, especialmente, señala la educación de los individuos d’un llau y la selección de los servidores del estáu dotru, como fundamentales pa llograr una sociedá sana y progresista.
Estos díes caberos delles noticies ficieronme recordar el mio iter personal y lo que paez ser la sienda que’l país de nueso se dispón a recorrer. En rellación cola educación reculo hasta los mios quince años y el quintu cursu de bachiller, que, a min, atopóme nel institutu Xovellanos a la par que descubría un fuerte y renováu interés nes moces del doña Ximena, allugáu a unos pasos del nuesu centru. Aquello fo una hecatombe; fixi bacarrá, que yera la denomación cola que l’argot estudiantil describía’l suspensu xeneral, sacantes relixón y ximnasia. Supunxome’l costu d’un añu y el mio pedimientu voluntariu, consciente de les mio flaqueces, pa dir internu al Loyola d’Uviéu, au algamé a acabar el bachiller ensin más problemes. D’ellí a opositar, cola lección del premiu al esfuerciu bien aprendida.
El pasu viniente costóme tres años d’oposición, un mecanismu que Mill describía, yá en 1861, como’l más conducente pa dotar al estáu de servidores con una suficiente y contrastada formación de base, al empar qu’aforra caudales con esa preselección. Educación y oposición, dos mecanismos de contrastada operatividá pa llograr esa meyor sociedá y esa alministración eficiente.
N’España tamos anguaño énte una especie de barra llibre en rellación colos suspensos; prevalez l’evitar sufrimientu al alumnu sobro la alquisición de conocimientos y, lo que ye más importante, la valoración del esfuerciu y del méritu; como si, nuna sociedá cada vegada más competitiva, esos aspeutos nun tuvieren importancia na construcción del futuru adultu.
Lo anterior combinase cola decisión gubernamental de convertir en fixos a los interinos con más de diez años nel puestu, furtiando esos puestos de la llibre competencia pol sistema d’oposición, daqué que, con independencia de los meritos y drechos de los ocupantes anguaño desos puestos, abre la puerta al desmontaxe d’un sistema que se tien demostrao a lo llargo del tiempu como’l más utilitariu pa reforciar la sociedá y l’estáu nacional. Tamos caminando una sienda que namái pue llevar a la escayencia como sociedá.
Raúl Suevos
A 8 díes vencíos d’agostu de 2021
No comments:
Post a Comment