La trampa de Tucídides

Ente’l garapiellu de llibros que tengo, nomalu biblioteca sedría esaxeradamente encrestao, tengo ún que merqué na Plaza d’Armes de L’Habana va yá dellos años. La Guerra del Peloponesu de Tucídides, edición de la bonaerense Emece de 1944 y con seguridá procedente de dalguna estantería prerevolucionaria. Nesta obra, l’historiador plantega la trampa na que cayó la entoncenes hexemónica Esparta, aquella que mos averó Zack Snyder con 300, la inolvidable película. Una Esparta que contemplaba con remor cómo Atenes crecía en poder y aliances, lo que la llevó a desendolcar una guerra, la del Peloponesu, que la llevaría a la derrota final y la desapaición como potencia.

Les potencies hexemóniques, y los imperios, tienen como carauterística principal el poder militar, pero non sólo, tamién l’económicu y, sobre too, la capacidá d’influyir en ámbitos estremaos. Esto cabero ye cuasi lo más importante en determinaos momentos pues implica la perceición que tienen los otros d’esi poder. Asina asocedía cuando l’emperador Carlos empeñaba homes, y caudales que nun tenía, na llucha escontra’l turcu. Asina lo facíen los USA mientres tol periodu de Guerra Fría, a ellos correspondía liderar, conducir y aguiyar, eso ye lo que s’espera d’una potencia hexemónica, y ensin cayer na trampa de la confrontación.

Nestos tiempos, cuando la cayída del Muru de Berlín paecía prometer un periodu de paz unipolar, asistimos al paulatín remanecer d’un hexemón nuevu, China, que pola vía económica yá lleva años dexándose sentir, véase’l proyeutu de la Nueva Ruta de la Seda  https://www.academia.edu/37462646/El_cambio_del_pivote_geogr%C3%A1fico_de_la_historia.pdf  o la importante medría na inversión na Fuercia naval china, la encargada de velar pola seguridá de les llínees lloxístiques del país. En casa queden el Xinjiang, el Tibet y Hong Kong como problemes por resolver, pero l’apisonadora de la etnia Han paez imparable nesi tarrén. Agora’l saltu cualitativu que’l covid-19 pue dar a China nel campu de les perceiciones pue ser determinante.

Nel otru llau tenemos unos USA col peor dirixente pa tiempos de tribulación, el señor Donald Trump, campeón del populismu. El so personalismu debaláu ta poniendo en seriu peligru a parte de la población norteamericana, especialmente, nun país de capitalismu xavaz, a los más desfavorecios; pero’l so unilateralismu llévalu a pesllar el país ensin a naide consultar, a infravalorar la peligrosidá de la pandemia, a, en fin y en pos, abandonar el lideralgu que s’espera de la gran potencia nuna crisis mundial. Pol contrario, China, con gobiernu autoritariu y au nació la pandemia, supo resolver la crisis rápidamente y agora propónse como sofitu téunicu y material de los países que güei sufren con roxura l’ataque del virus, lo que va facer camudar la perceición que munchos tienen del xigante.

Norteamérica ta n’añu eleutoral y ye probable que Joe Biden, si’l virus lu respeta, va ser un durísimu contrincante pal presidente que, si ve en peligru la reeleición, podría cayer na tentación de la trampa de Tucídides, lo que mos llevaría a toos a una crisis mundial nueva.  

Raúl suevos

A 22 díes vencíos de marzu de 2020

Torna en castellán en repdiv.blogspot.com