El discursu del rei

Cuando se diz asina, ensin agregos, a la xente vien-y a la cabeza una película protagonizada por Colin Firth, esi actor inglés que, como David Niven na so dómina, paez especializáu en facer d’inglés, precisamente, y que nesa película encarna a Jorge VI, el pá de l’actual monarca del Reinu Xuníu quien aportaba al tronu por causa sobrevenida y tenía que resolver el tragu, dada la so tatexatura, de dar el discursu inaugural de la Corona.

Sicasí, güei ye un día particular n’España tocantes el discursu del rei. Forma parte del entamu la Nuechebona dende va munchos años, cuasi diríamos que dende siempre pues cada vegada somos menos los qu'entá mos acordamos de cuando’l momentu-y correspondía al Caudillu. A les nueve en puntu, enantes el rei Xuan Carlos y agora'l so fiu, el rei Felipe, métesemos en casa per unos minutos, malapenes diez, y agasayamos con un repasu de lo que foi l’añu y aventura una espresión de bonos deseyos pal futuru de la nación. Pero güei paez que tamos nuna ocasión particular.

Va dalgo más de dos años sorprendíamos el rei Felipe con un discursu fuera de programa nel que mos falaba de desllealtá institucional, antónimu del conceutu que suelda l’entramáu de la nuesa Constitución dende qu’España ye democracia. Discursu que supunxo l’activación d’un gobiernu hasta entós petrificáu énte l’abilsu que suponía l’aplicadura per primera vegada d’un artículu 155 que paecía apavoriar a tol arcu parllamentariu. Foi ensin dulda un discursu históricu, como nel so día lo fo’l de so pá con ocasión del intentu del guelpe d’estáu de 1981. Discursos dambos que marquen la historia d’un reináu.

España ta soriella. Les votaciones caberes amuesen nidiamente una polarización del espectru políticu con un amenorgamientu claru, cuasi evaporación, de les posiciones centristes y, poro, transaccionales. Les posibilidaes de formación de gobiernu paecen pasar pola construcción d’un arbíu políticu que nel so senu o sofitos lleva posiciones non yá diverxentes sinon antagóniques en cuantu a la integridá de la nación española. Y, amás, aporta, pasaos más de cien años, una entente nueva ente Marx y Bakunin, pues a la presencia socialista y comunista, amecese una CUP, vía sofitu al gobiernu independentista catalán que, a la so vegada sofitaría al futurible de la nación, representa una nueva y menos curiosa versión del entoncenes frescu y, en ciertu mou, naif movimientu anarquista catalán.

Esperen dalgunos que So Mayestá entre nesti ruedu a manos llimpies, ensin esperar a ver qué clas de morlacu sal per toriles y cuando esti gobiernu en funciones caracterizóse por obsequialu con aventones innecesarios y siendo él, el gobiernu, quien tien la pallabra cabera sobro’l so parllamentu de fin d’añu. Nun barrunto yo que’l rei Felipe mos sorprenda esta nueche, les sos pallabres van ser estremadamente midíes. Nun pue ser d’otra miente. El tiempu tien de pasar, al rei nun-y correspuende gobernar y a nós tócamos, una vegada más, esperar y deseyar que les instituciones y mecanismos del estáu seyan abondo conducentes y áxiles como pa que, nesta hora de negros presaxos, llogren sacanos adelantre con los menores daños pa la nación.

Nun podemos nin debemos esperar que cada añu So Mayestá-y recuerde a la clas política cuáles son les sos responsabilidaes.  

Raúl Suevos

A 24 d’avientu de 2019

Torna en castellán en repdiv.blogspot.com