La batalla de Manassas

 

En xunetu de 1861, en plena guerra civil norteamericana, tevo llugar la Batalla de Manassas, en redol del llagu del mesmu nome que s’atopa a dellos 25 kilómetros de la capital, Washington. Una batalla que tamién ye conocida como Bull Run, y más particularmente como la Batalla del Picnic, porque dao que s’esperaba una victoria contundente de les tropes de la Federación sobro les Secesionistes del sur, les families acomodaes de la capital decidieron garrar los sos carruaxes y desplazase a les colines na contorna a la llaguna p’asistir en primer fila a la derrota prevista.

Las coses nun foron como s’esperaben y si al entamu paeciera que los xenerales sudistes Beauregard y Johnston perdíen la partida, pa gayola de los espectadores, l’apaición d’un Thomas “Stonewall” Jackson estraordinariu, qu’esi día ganaría esi nomatu pola so defensa cerrisca de la llínea, faría taramiellar el dispositivu federal hasta desbaratar l’ataque poniendo en fuyida a las tropes yanquis, y con elles al auditoriu, que coles sos vagonetes embotellaron los caminos y amontaron l’escalabru.

Va yá dellos díes pudimos asistir a la Batalla nueva de Manassas, esta vegada, nel nuesu casu, dende la comodidá que la televisión mos apurre. Y ye qu’ellí se competía pola Copa Solheim, otra vegada en redol del llagu y coles llombes llenes de xente; si bien nesta ocasión dirimíase'l primáu temporal nel mundiu del golf femenín ente les selecciones d’Estaos Xuníos y Europa.

Les comentaristes magnífiques televisives, de gran nivel golfísticu, nun pertenecen a la escuela del gran Matías Prats, colos so conociemientos enciclopédicos, y sustrajeron-y a l’audiencia esos comentarios oportunos sobro la primer batalla, si bien ellí yera un auténtico combate deportivu lo que se desarrollaba, anque nesti casu, foran les de nueso, nel papel de los secesionistes, les perdedores.

La Solheim, xunto cola Ryder, son, según creo, les úniques competiciones deportives nes que les dos potencies, EEXX y Europa, enfrentense direutamente, colos sos miembros, nel casu européu, actuando con un sentíu apasionáu d’equipu, colos colores de la bandera nos sos uniformes y faciendo cimblar les coraes de l’audiencia millonaria que sigue l’eventu. Ye lo qu’hai.

Esta vegada perdieron les europees, depués de retener la copa nes tres oportunidaes caberes. Nun importa, van tornar a ganala y van siguir calteniendo esi espíritu que l’inolvidable Severiano Ballesteros impulsara personalmente va yá años. Pero dada la importancia simbólica del acontencimientu paeciera razonable que, n'ocasiones vinientes, los telespectadores pudieran asistir n’abiertu a estes batalles golfistiques incruentes, por Europa y pol golf, una actividá económico-deportiva ca día de más importancia n’España, y n'Asturies.

Raúl Suevos

A 21 díes vencíos de septiembre de 2024

Torna en castellán en repdiv.blogspot.com

Pasos de mocedá pel Muru

Taba esti vienres la ciudá que casi nun se podía andar; pellí analayaben los de siempres y una montonera de cares nueves, qu’amás, pa sorpresa del caminante, falaben raro, anque tres oyer delles parolaes ún identificaba que yeren l’inglés y l’alemán les llingues qu’usaben. Debe haber cruceros nel Musel, cabildré yo.

Y asina yera, dos a falta d’un, con milenta de viaxeros a bordu de dambes naves, de los qu’una bona parte, imaxino, prenderíen dalguna de les estremaes rutes d’autobús que les compañíes suelen ufiertar a estos turistes particulares, y que, posiblemente, van tener Uviéu y Cuadonga como destinos principales.

Al restu, los menos desacobardaos n’apariencia, quéda-yos la opción de visitar la ciudá, la nuestra nesti casu, Xixón, que s'enllena de families y, sobremanera, pareyes de xente vieyo, convencíos, como asocede colos españoles, que la vida nun s’acaba cola xubilación, y qu’aínda queda muncho por facer y conocer. Ye una sensación estraña y positiva ver de guelpe tanta tercera edá n’actitú de curiosidá pasiando d’un llau pal otru. Ye lo qu’hai.

Na Plaza del Marqués, puntu neurálxicu del Xixón turísticu, les terraces nun daben abastu, ente nacionales tomando’l vermú y cruceristes tastiando la gastronomía llocal, lo qu’imaxino que va poner contentos a los hosteleros llocales que yá esfruten un septiembre con más turistes de lo que suel ser habitual. Un día redondu, en suma, pa ellos.

A min, que güeyo como un acordeonista qu’entretien la redolada dende’l pozu romanu recibe una recompensa numberosa d’estos viaxeros, lléname de gayola’l ver esta animación viaxera en personaxes tan entraos n’años -la cifra de los que se van quedando hospitalizaos nos distintos atraques ye un secretu más guardao que’l cómo los israelíes xaquearon los buscapersones de los de Hezbollah- pero aplaudo la so resolución, y paezme xusto que revicien del trabayu de tantos años, pero al mesmu tiempu, y anque pueda paecer demagóxicu, nun dexo de decatáme de lo anómalu que ye esti vien y va de los mayores, mientes la economía occidental nun paez ser a xenerar puestos de trabayu abondo pagaos como pa que’l día de mañana, cuando eso seya, los mozos anguaño tamién se puedan dir de cruceru, o au-yos pete, que diría Pinón.

Sicasí, Xixón rescamplaba bien guapa en plena y descomanada baxamar na so sablera de San Lorenzo, y el llovíu, qu’aportaría puntual al tapecer, paecía querer da-yos un respiru a los andariegos pa que pudieran apreciar en tol so esplendor a Don Pelayu nel so pedestal.

Raúl Suevos

A 20 díes vencíos de septiembre de 2024

 Torna en castellán en repdiv.blogspot.com

Falando de Venezuela

 

Ente l’esiliu español del presidente electu del país y la detención de dos pardillos de Bilbao por terrorismu, más la verborrea del nuesu inefable ministru d’Esteriores, estos díes caberos, el país que viera cabalgar al asturianu José Tomás Boves ye pastu de les páxines primeres de la prensa. Ye lo qu’hai.

De Venezuela sabemos que tien desde la so nacencia mesma una llarga historia de caudillos militares. Bolívar, que sofita la so trayeutoria na traición a Francisco Miranda y la Guerra a muerte al español, dexó ver les so idees totalitaries nos so proyeutos de constitución pa la Gran Colombia, Perú y Bolivia, au se reservaba la presidencia vitalicia. Depués d’él vendríen munchos espadones, quedando namái pal gobiernu civil una dómina curtia na parte segonda del sieglu XX.

Hugo Chávez aporta al poder ganando unes eleiciones llibres, depués d’una amnistía –grave erru- tres intentu sangrientu de guelpe previu, y en cuantu que llega al Palaciu de Miraflores entama la tresformación política del país, camudando la Constitución ya aniciando una serie de victories eleutorales, de más que duldosa llimpieza, que-y sirven pa crear, gracies al petróleu y al padrinazgu políticu de Fidel Castro, el bolivarianismu, conocíu tamién como Socialismu del sieglu XXI. Versión caribeña del totalitarismu marxista.

El totalitarismu ye un sistema qu’axunta tolos poderes baxo el control d’un partíu políticu o, más xeneralmente, un caudillu, véase Cuba, dirixendo tamién les rellaciones sociales pente medies de la ideoloxía oficial. Nel casu bolivarianu munchos foron los esfuercios del chavismu pa logralo, y si nun lo consiguieron nun fue pola emigración de millones de venezuelanos, la probitería económica del país y la persecución de cualquier tipu d’oposición. 

¿Cómo facelo dende la democracia? Pente medies d’un procesu d’anulación de los poderes del estáu. L’executivu pertenez-y por definición; al lexislativu, si nun se cuenta con votos abondo, torgase-y lexislar y controlar al executivu; nel xudicial allunganse xueces allegaos nunos casos, y menaciaselos notros; al cuartu poder, la prensa, acosasela o comprasela hasta sometelu y, al “quintu”, les Fuercies Armaes, asociaselu hasta convertilu en cómplice; a la fin, a los votantes seduzselos con subsidios qu’ellí nomen misiones. El resultau de too esto ye la destrucción y ruina del estáu y la conversión del sistema políticu en simple tiranía.

Dende España esto contemplábase como daqué llonxanu, ayén a nós, pero la realidá ye la que ye, y, güeyando l’espeye, vemos que yá avanzamos hasta’l control de la prensa, escalón caberu, puestu que les Fuercies Armaes equí tán a lo so, la defensa del país.

Venezuela, el llibru que mos lo cuenta.

Raúl Suevos

A 18 diés vencíos de septiembre de 2024

Torna en castellán en repdiv.blogspot.com

La Cayida

La película que me vien a la tiesta ye la que trata de describir los díes caberos d’Adolf Hitler, pieslláu nel bunker de la Cancillería de Berlín, xunto colos so colaboradores más averaos, demientres en redol d’él too s’esbarrumbaba al pasu de les fuercies afaraores del mariscal Zukov, unviáu por Stalin, y ayudáu pola pasividá nel avance de los Aliaos al mandu d’Eisenhower.

Vienme l’alcordanza cuando contemplo, de la mano de les informaciones que, magar la dictadura férrea, consiguen salir, la situación llaceriosa na que Cuba s’atopa, y que nun fai más qu’empiorar ca día, mientes el vieyu dictador, Raúl Castro, caltiénse seguru y afayadizu na so casa de la Zona cero, en Siboney, nes afueres de L’Habana.

Demientres la mio estancia ellí, ente 2010 y 2013, la vida yá yera abondo dura pal cubanu d’a pie, anque esistía la esperanza de que, cola presidencia Obama, les coses podríen meyorar. Moratinos ayudaba cola salida de los presos políticos de Fidel, encarcelaos pola so voluntá soberana dende’l 2003, quitándo-y a Raúl un dolor de morra adicional, paecíu a lo qu’agora fae’l doctor Sánchez col presidente electu de Venezuela. Pero, en xeneral, la falta facíase notar nos mercaos habaneros y nes tiendes de venta en divises o pesos convertibles.

Yá entoncenes campaba’l Dengue, tamién el Zika y el Chikungunya, virus, nalgunos casos letales, tresmitíos pol mosquitu, anque nun se conocía l’Oropouche, qu’anguaño también se tien asentao na islla. Magar ellos, el turismo paecía la panacea del futuru, y el réxime llanzábase a la construcción d’hoteles d’alta categoría. Los canadienses yeren los clientes principales, y la seguridá, que permitía salir a cenar a les paladares habaneres, cola precaución de ver aú pisabes pero ensin mieu al asaltu, suponía un valir a tener en cuenta en comparanza con otros destinos caribeños.

Güei  cómese poco y mal nos hoteles, porque la falta de pagos alloñó a los proveedores, y l’agricultura cubana nun atopa guaḥiros dispuestos a suministrar al Sistema nacional d’acopiu, que paga pocu y tarde. Les cifres de turistes caen, con namái los rusos apaeciendo, y lluéu los chinos dicen, y aquella seguridá d’enantes traduzse n’atracos na carretera del aeropuertu de L’Habana y nos cruces nochirniegos de gran parte de la islla. Too s’esbarrumba y los cubanos traten  por tolos medios de colar del país.

Mentanto, el vieyu dictador, Raúl Castro, apoltrónase nel so refuxu esperando una muerte dulce y pacetible. Ye lo qu’hai.  

Raúl Suevos

A 15 díes vencíos de septiembre de 2024

Torna en castellán en www.repdiv.blogspot.com 

Estilos isabelinos

 

Nel pasáu nacional de nueso fálase de dos estilos isabelinos, el más recien pertenez a Isabel II, aquella neña güérfana criada ente los estremaos intereses políticos de la so dómina, y qu’acabara los so díes en Paris tres ser espulsada pola nomada Revolución gloriosa, si bien fuera más bien una traxicomedia, como casi tolo de nueso. El so estilu, centráu no mobiliariu, considerase pretenciosu y aparente, ensin sustanza.

L’otru tien más fuste, como la Isabel I que-y da nome, ensin dulda una de les más grandes dirixentes de la historia mundial, y abarcaba toles artes, con principal mostrariu na arquitectura, au desarrolla, a partir del góticu flamencu, un estilu propiu del qu’aínda esfrutamos nos monumentos d’España. Un estilo personal que dexó la so buelga principal na evanxelización d’América. Mal qu’a unos y otros-yos pese.

Anguaño tamién tenemos estilu isabelinu. Vien ésti de la mano, cabría dicir que tamién de la sorrisa, d’Isabel Ayuso, dirixente madrilana que cuala émula de Xuana d’Arcu empeñase en espulsar a los ingleses –doctor Sánchez- del so territorio sagráu, y ello magar l’actitú coimbre del rei de Francia –güei Feijoo, y enantes Casado-. Ye un estilu basáu nun gobiernu conducente col que lidera les cifres positives de les comunidaes autónomes en munchos aspeutos, y col que tien lograo afitase y crecer nos so resultaos electorales, qu’a lo postrero ye lo que cuenta, pero tamién cola utilización d’un verbu afiláu y n’ocasiones firiente que nun dexa pasar niún de los ataques que recibe de los ingleses; perdón, del doctor Sánchez, o cualquier de los so esbirros.

Agora aporta al teatru nacional otra Isabel, ésta Perelló d’apellíu, que vien a dirixir per primer vegada na historia, na so condición de muyer, el Poder Xudicial, del que convien recordar que’l Tribunal Constitucional nun forma parte. Ye daqué que nun debiera sorprender, pues va yá munchos años que la muyer ye preponderante nos escalafones de la carriera, pero nunca enantes se diera.

Pertenez a la “progresista” asociación de Xueces pola Democracia, que con un escasu 10% controla la mayoría de los puestos importantes de la maxistratura, en desterciu de la “conservadora” Asociación profesional de la Maxistratura, que con un 20% queda lloñe de talu poder; nun digamos yá los non adscritos, condergaos a la insignificancia. Ye lo qu’hai.

El casu ye qu’ella, Isabel, tiénse convertío na esperanza cabera, non namái pa les muyeres, a les qu’ayeri dedicó parte del so discursu inaugural, sinon pa la Xusticia, con mayúscules; aquella que, con imparcialidá ciega , debe allugar a los otros poderes nel so sitiu, y a nós, los ciudadanos, a salvu d’ellos.

Veremos qué estilu trae.

Raúl Suevos

A 6 de septiembre de 2024

Torna en castellán en abellugunelcamin.blogspot.com

Culete d'emigrante

 

A dalgún foriatu los pensamientos malos van poder llevalu albidrar nel títulu qu’abre esta tribuna daqué que ta lloñe de les mio intenciones nesti fin cuasi serodiegu del mes d’agostu. Un remate que, tres la Semanona, vien marcáu pela Semana de la sidra, col so yá tradicional intentu de record Guinness, y, especialmente, el concursu rexonal de escanciadores; certamen nel que, otra vegada, tienen rellumao particularmente los echadores de sidra d’orixe emigrante. Afortunadamente, habría qu’añader.

Y ye qu’anguaño, en munches de les nueses sidreríes, ye habitual que’l culete mos lu sirva un profesional venío de fuera, xeneralmente d’Hispanoamérica, porque, nun mos engañemos, el sacrificáu oficiu de la hostelería nun ye curiosu abondo pa los mozos de nueso, qu’amás de pocos, prefieren otros carreros, menos sufríos y meyor pagaos. Ye lo qu’hai.

Non namái nes sidreríes, tamién notros oficios, como la construcción, obres públiques, la pesca, y, en xeneral, trabayos duros y, d’entamu, de poca cualificación. Y ello porque la nuesa Asturies nun cuenta, como notres rexones d’España, con grandes esplotaciones agrícoles y colleches estensives en mano d’obra, tampocu’l clima ayuda, lo que fai que la nuesa “invasión” seya de calter menor.

Pero nun hai qu’engañase, ellos, los regularizaos, y tamién los irregulares, tán en parte detrás d’eses cifres de crecimientu del PIB que plasmen a los nuesos socios europeos. Ensin ellos gran parte de la nuesa economía taría en camín, si non yá, de gripase. Esi culete d’emigrante dámos un puntu de respiración asistida.

Esa ye la parte positiva de la emigración que “sufre” España; pero hai otra vertiente que vien de la mano de la nuesa falta de capacidá pa dixerir la llegada de más personal del que la economía y la sociedá pueden asumir ensin que dalguna costura entre en tensión. Y ello, cola producción constante de noticies rellacionaes con delitos y orden públicu, supón, ensin dulda, un elementu pa la confrontación ente les estremaes fuercies polítiques, equí y en toa Europa.

Que l’asuntu reviste la mayor importancia sorrayalo’l fechu de que’l doctor Sánchez se tenga visto obligao a intervenir, con un viaxe pel Golfu de Guinea nel que tevo tiempu pa llanzar mensaxes fallecos que namái tienen servío, polo contradictorio, pa encrespar a los so socios y a la oposición.

Necesitamos brazos mozos que vengan a impulsar, pela base, la nuesa economía, pero ye preciso qu’ello se faiga con orden y conciertu, pues de lo contrario, como se puede columbrar nalgunes partes d’España, namái xeneramos un lumpen social qu’a nada bono conduz.

Raúl Suevos

A 1 día vencío de septiembre de 2024

Torna en castellán en repdiv.blogspot.com