D'altruistes y salvapatries

D’ALTRUISTES Y SALVAPATRIES

Por fin acabóse esta campaña eleutoral llarguísima; un añu más o menos, y por fin vamos poder dedicamos a pensar notres coses ¿La Lliga del añu viniente? ¿Por qué nunca-y dan la Palma d’oro a Almodovar? ¿Va llograr Trump reventar el mundu? Les coses qu’importen, a última hora.

A min, la edá, nestes ocasiones, llévame a cavilgar. Ye de baldre, nun requier esfuerciu y nun siendo yo futboleru cuasi que nun me queda otra. Y viendo les imáxenes de los nuesos líderes –ye namái un apellativu convencional- dime cuenta d'hasta qué puntu camudaron les coses nestos 40 años caberos. Los líderes de la transición yeren individuos que llucharen na oposición silenciosa antifranquista, dalgunos inclusive dende dientro de les propies files del réxime, dende los sindicatos universitarios, dende’l propiu Movimientu, dende toes partes; dalgunos tamién na so propia casa pos yeren fios de franquistes notorios. Hubo tamién militares que lo ficieron, pero estos yeren torpes y poco silenciosos, pescaronlos, y pagaronlo, quiciabes los únicos.

Esa xeneración de políticos, la de la Transición, siempres pudo presumir de tener lluchao escontra un réxime non democráticu. Qué pena que los procuradores en Cortes-yos robaren nel últimu momentu’l triunfu cola Llei pa la Reforma Política; sicasí ellos pudieron construyir lo nuevo, lo lluminosu, per oposición a lo vieyo y casposo. Eso cuasi siempres da bonos frutos y ellí entamó a nacer el discursu del sacrificiu pol bien xeneral, pola xente, pola ciudadanía, pol pueblu. Qué curioso.

Les nueves xeneraciones, eses qu’agora aporten al poder, yá nun tienen un réxime escontra’l que lluchar, salvo unos pocos, nos estremos, que faltos d’un discursu más ellaboráu convierten la constitución del 78 en réxime y escontra él pretenden lluchar. Estos nuevos políticos, mozos pero suficientemente preparaos, siguen calteniendo’l discursu del sacrificiu pol bien xeneral; a él dicen supeditalo too, y pa ello prepararonse a concencia, son altruismu n’estáu puru. Toos, o cuasi toos, vienen de les mocedaes de los partíos; toos, o cuasi toos, cursaron estudios superiores, dalgunos con resultaos  tan brillantes y “sorprendentes” que hasta’l poder xurisdiccional punxo’l güeyu sobro los sos llogros, notros casos la prensa, plasmada, nun duldó n’airealo. Son les nueves xeneraciones.

Esti sacrificiu de los nuesos políticos ta abondo llonxano del altruismu del que facen gala otros españoles, misioneros per llugares estremaos nel mundu, especialmente n’África. Ellí asesinaron esti mes de mayu tan eleutoral a dos d’ellos, en febreru cayó otru. La prensa pasó apriesa percima de los sos cadabres; son noticies que venden poco nel mercáu informativu; son noticies que pueden aportar a facemos cayer na cuenta qu’esisten persones que dan la so vida, toa ella, na entrega a los demás, a los otros, con independencia de qu’estos seyan d’otra raza, con independencia de que nun heba réditos de dalu tipu, solo’l prestu de la entrega personal. Los sos collacios, qu’ellí siguen, manifiesten, cada vegada que pierden a ún d’ellos, qu’esi ye’l so destín, el serviciu a los que nun tienen un res, y que nello van continuar, n’África, n’América, en cualquier llugar au puedan ser d’utilidá.

Y digo yo que quiciabes temos perdiendo la gran oportunidá de desendolcu de la Marca España, que quiciabes estos homes y muyeres, ordenaos o seglares, que lleven la so misión hasta dexar la so vida n’ocasiones, y la so salú siempres, son los meyores embaxadores de nueso per esos mundos de Dios, y, si esos países quiciabes nun seyan tan interesantes como oxetivu comercial, ye posible que la so aición sirva pa que mos sintamos arguyosos de los nuesos compatriotas y podamos pensar que’l nuesu nun ye un país tan malu.

Hai otres coses más allá de la política y el futbol.

Raúl Suevos

A 26 de mayo de 2019

repdiv.blogspot.com