Biden sanciona al xixonés que manda en Cuba

 

El poder en Cuba, pal que nun lo sepa, ta nes manes de Raúl Castro, anque nominalmente seya Miguel Díaz Canel el qu’ocupa la presidencia. El sistema políticu cubán lleva 60 años llargos de dictadura militar de calter personalista, tamién se-y puede nomar autocracia, magar que como meyor se-y describiría sedría denominándolu como “castrismu”, asina, a seques; castrismu fidelista enantes y raulista agora, pero siempres castrismu.

Dientro d’esi sistema políticu, al que ensin dulda hai que reconocer una descomandada resistencia, la columna vertebral ta nel Exércitu, el MINFAR, Ministeriu de les fuercies armaes, al que se subordina’l ministeriu del interior dende qu’en 1989 les componendes de Fidel con Pablo Escobar, el narcotraficante, tuvieron a puntu d’algamar que los USA tuvieren una bona razón pa invadir la islla. Aquello atayóse col control del ministeriu del Interior pol Exércitu, el fusilamientu del xeneral Arnaldo Ochoa, que yá entamaba a torgar a los Castro, y, coincidiendo col “Periodu especial”, que entós s’aniciaba, la entrada independiente del MINFAR, lideráu por Raúl, nel mundu de la economía cubana.

Esi procesu xestionólu, como xefe d’estáu mayor, Julio Casas Regueiro, depués ministru cuando Raúl sustituyó a Fidel, quien tenía como mano drecha a un entoncenes mozu xeneral Álvaro López Miera, xixonés d’orixe, fíu del intelectual comunista exiláu nel 39, Julio López Rendueles. Santiagueros dambos, como los Castro, y, sobremanera, miembros del conocíu como 2º Frente, el que Raúl mandaba mientres la insurxencia revolucionaria, y, poro, fidelísimos d’esti.

Anguaño Álvaro López Miera ye’l ministru de defensa, y non sólo dirixe la seguridá, tamién el 60% de la economía cubana, ensin control parlamentariu o de la contraloría xeneral de la república, el so Tribunal de cuentes, que hasta ellí esiste anque poco controle. De forma que nun ye d’estrañar que’l presidente Biden se fixara n’él a la hora d’unviar el so mensax a la islla, a Iberoamérica y, sobremanera, a los votantes de Florida, clave en toles eleiciones yanquis.

Ye novedosa la sanción personal, pa lo que Biden emplega una llei diseñada pa los rusos, y puede que seya l’entamu de daqué nuevu, anque la primera conclusión ye que la posible “apertura”, al respective de les polítiques de Trump con Cuba, nun ye probable que se vea a plazo curtiu, pues si los esquierdistes dientro del so partíu son cafiantes, muncho peor sedría dexar esi flancu al descubiertu pa que los republicanos se cebaran n’él.

López Miera nun ye probable que tenga cuentes nos USA, nin tampocu piense en viaxar ellí; quiciabes lo faga dalgún día a Asturies au entá tien parientes, pero siempres ye esmolecedor tar nes listes de los USA.

Raúl Suevos

En Xixón a 24 de xunetu de 2021

Torna en castellán en repdiv.blogspot.com

El guelpe de Pablo Casado

 

Nestos díes caberos l’asuntu informativu tevo abondo fluexu. El virus tiense esforciao pero, como quiera que yá nun paez matar tanto como al entamu y la mocedá interactúa igualmente como si nun hubiera un mañana, esto ye, como siempres lo ficieron a lo llargo de les xeneraciones, les cifres yá nun asusten na mesma midida que lo facíen cola fola primera. Ye lo qu’hai, hasta les pandemies acaben por desenchise, magar el mayor y consecuente enfotu de virólogos y epidemiólogos, que van salir d’ésta a base de prozac y psicólogos, me temo.

L’equipu monclovita tien trabayao con puxanza por compensar esa falta de nerviu informativu nacional pero, dende lo del paséu pigméu con Biden, pudiera pensase que’l nuesu incombustible doctor Sánchez yá nun vende productu como enantes y asina, magar los esfuercios ganosos por convencenos del algame y altor del so viaxe a los Estaos Xuníos, nun paez que la so mítica fama  sirviera pa más qu’escitar la libido de dalguna ama de casa yanqui n’horariu mañaneru, y eso porque nun conocen la versión meyorada qu’equí mos ofrez de tantu en tantu Carlos Latre, más interesante inclusive pa los informativos. Un ablayamientu lo d’esi viaxe.

Equí, nel terruñu, hebo más movida. Camuñas, una vieya gloria de los tiempos de la UCD, despachóse diciendo que lo del 18 de xunetu nun foi un guelpe, afirmación que namái pue calificase como grosería sociopolítica. Foi un guelpe, y de llibru, pero que namái debiera interesar yá a historiadores y politólogos; por embargu, l’afirmación, en presencia de  Pablo Casado, llamativamente calláu na ocasión, tien desatao una grita, y ye que, en tiempos de esa mal nomada memoria democrática, o hestórica, hai asuntos que tán condergaos de mano, tanto si fales como si calles.

Casado, que nun debió d’estudiar muncho mientes cursaba Drechu, debiera saber que un guelpe ye “un actu d’autoridá, reflexivu, sópitu ya ilegal, escontra la organización, el funcionamientu o les competencies de les autoridaes constituyíes, llevao a cabu según un plan previu por un home, o un grupu d’homes, reuníos nun cuerpu o un partíu pa tomar el poder, defendelu, reforciar la so posición o camudar la orientación política del poder”[i], esto ye, lo plantegao pol “director”, el xeneral Mola, pero tamién dalgo que s’adapta perfeutamente al baltao previu del presidente de la república, Niceto Alcalá-Zamora, pa allugar nel so puestu a un Manuel Azaña que, cegáu pola so sobeya intelectual, taba lloñe de decatase que los sos oportunistes aliaos socialistes y comunistes namái lu necesitaben como mascarón de proa d’un proyectu empobináu a llevalos, a ellos, al poder.

Si’l que roba a un lladrón tien cien años de perdón Casado debiera centrase nesi aspeutu de la historia y nun dexase pillar na trampa dialéctica del 18 de xunetu, na que siempres va llevar les de perder.

Raúl Suevos

En Xixón a 23 de xunetu de 2021

Torna en castellán en repdiv.blogspot.com

---

[i] https://www.academia.edu/41306351/Anatom%C3%ADa_de_un_golpe_de_estado

Arrimadas nel entierru de Madariaga

 

Morrió don Salvador de Madariaga nel mes d’avientu de 1978 en Locarno, Suiza, a la venerable edá de 92 años y tres una vida frutosa dedicada a la política, la educación y la lliteratura. El so bustu acompaña a los d’Adenauer, De Gasperi, Churchill y Schuman nes sales del Palaciu see del Conseyu d’Europa n’Estrasburgu. Foi ensin dulda l’español que más apurrió a la construcción europea a lo llargo de tol sieglu XX, y nun se puede dicir lo mesmo tocantes la so contribución a España porque, desgraciadamente, la so voz malapenes s’oyía metanes el ruiu que los glayios y la trilita d’unos y otros producíen.

Don Salvador, yera lliberal, de los que acolumbraben un espaciu d’humanidá, ente la radicalidá d’esquierdes y dreches, basáu na educación y el pacifismu; un lliberalismu que, aplicáu al “llaberintu” español, debía servir pa dar espaciu a la “tercera” España, daqué que describe y señala con clarencia nuna de les sos obres más conocíes, l’ensayu “España”, que, denostada por esquierdes y dreches, foi mientres munchos años prohibida nel país de nueso y nella amuesa como la falta d’interés, de categoría política o la perceguera personal de los líderes políticos del 36, enzancó la creación d’un espaciu de centru y con ello la formulación d’un contrapesu a les tensiones radicales y centrifugues que conduxeron a la nuesa Guerra incivil. 

L’europeísmu de Madariaga ye posible que lo heredase’l so sobrín Javier Solana, que’l so puestu caberu n’Europa ocupa anguaño otru español, Joseph Borrell, ensin algamar el so altu nivel como executivu; pero nin ún nin l’otru tienen muncho que ver con quienes se proclamen, o pretendenlo, representantes del lliberalismu español de la mano de Inés Arrimadas, cabeza actual de lo que foi una gran esperanza va non muncho, con un Ciudadanos puxante y que, esti fin de selmana en Madrid, trató de tresmutase, o quiciabes namái camudar la envoltura, en bandera lliberal ente un PSOE radicalizáu por Podemos y un PP non menos tensionáu por Vox.

Madariaga ponía al home per delantre de la economía y la política, esi ordenamientu, percima del xuegu d’escaños, sovenciones, asesores y demás canonxíes del xuegu políticu tien de ser la seña de la nueva empresa d’Arrimadas, a quién dexaron d’acompañar elementos de valir –pienso en Pagazaurtundúa o Nart-, por nun creer nel proyectu, y otros que namái taben pol interés personal y meyor que marcharen; y a la que entá siguen figures con muncho qu’aportar al proyectu. Ye un momentu crucial pal futuru de la formación, que la so esistencia pue ser imprescindible pa la salú del sistema políticu español nel so conxuntu, y que la so desapaición supondría enterrar definitivamente la tercer España de Madariaga y tornar a lo de siempres.

Raúl Suevos

A 18 díes vencíos de xunetu de 2021

Torna en castellán en repdiv.blogspot.com

La hora de los militares cubanos

 

Ye Cuba, dende va más de 60 años, un país particular. Ellí casi too ye estremao a lo qu’asocede nel resto del mundu, y too se xustifica na llucha titánica que caltienen, dende la llegada de la Revolución, escontra’l mayor imperiu que conocieron los tiempos, los Estados Xuníos d’América. Eso, dicen ellos, disculpalo too.

Dende la distancia pudiera pensase que tamos énte un réxime militarista por aquello de la presencia que los uniformaos ostenten a lo llargo y ancho de les estructures del estáu, si bien, teniendo en cuenta la falta total de práutiques democrátiques nel sistema políticu cubán, au nun esiste nada paecío al votu llibre y secretu, y muncho menos un sistema de partíos nel que les distintes opciones polítiques pueden espresase y pretender dirixir demientres un tiempu establecíu los destinos de la nación, tendríemos de falar d’una dictadura militar. Esta sedría la meyor denominación del fenómenu cubanu.

En Cuba l’adoctrinamientu entámase a edá temprana, a los siete años, na organización de los Pioneros, los boy-scouts cubanos, au se-yos anicia a llenar la tiesta de revolución, patria y pueblu; pallabres que yá los van acompañar de per vida. Depués, dalgunos d’ellos, los meyor adoctrinaos,  van ingresar nos Camilitos, escueles provinciales d’educación premilitar, onde van cursar los años del bachiller a la par que manexen el fusil y encontien les mesmes idees de la relixón revolucionaria.

Unos cuantos, munchos, demasiaos pa un país de 10 millones de habitantes, van llegar a les escueles d’oficiales Antonio y José Maceo, en Santiago de Cuba y en La Habana, de donde van salir promovios a oficiales d’escasa preparación -sacantes en llabores d’intelixencia nes que son maestros- pero d’inconmovible ideoloxía revolucionaria. Toa una vida per delantre pa amosar la so llealtá al secretariu xeneral del Partíu Comunista cubanu, enantes Fidel, depués Raúl Castro, y agora esi apparátchik de llealtá revolucionaria contrastada llantáu por Raúl, Díaz Canel, el presidente n’exerciciu.

La fame, la penuria y los estragos del covid qu’anguaño sufren los cubanos, que yá nu se creen el cuentu del bloquéu, llevaron estos díes a milenta d’ellos a la cai, nuna manifestación espontánea –en Cuba, dende siempres, la disidencia ta infiltrada pola contraintelixencia- qu’aporta imáxenes impensables va unos díes; y mediu mundiu caltiense espectante énte lo que pueda asoceder pero, convien nun escaecelo, too depende de la postura que tomen esos militares qu’entamaron la so vida profesional siendo adoctrinaos nos Pioneros, y ehí se va ver lo que pa ellos significa la pallabra pueblu.

Namái un alzamientu popular masivu, al mou rumanu o ucranianu, va torcer el brazu del réxime, anque equí, mentanto, tengamos ocasión de ver como dalgunos de nuestros políticos se ponen de perfil y otros defienden a los castristes.

Raúl Suevos

En Gijón a 13 díes vencíos de xunetu de 2021

 Torna en castellán en repdiv.blogspot.com

Mangos y probitería nel Caney

 

Ente los españoles qu’en tiempos recientes tienen fecho turismu en Cuba ye probable qu’a dalgunos-yos suene’l nome del Caney como perteneciente a un de los meyores rones cubanos, por preciu y calidá, que entá güei, magar la esbiría y menguante producción de zucre de la islla, se pueden tastiar ellí; pero’l nome tamién trae recuerdos de vieyes xestes militares españoles.

Nel Caney, un villoriu pela rodiada de Santiago de Cuba, el 1 de xunetu de 1998, el xeneral Vara de Rey, colos homes a les sos órdenes, dio una leición de puxu y heroísmu énte la superioridá apolmonante de los norteamericanos, n’homes, 500 escontra 7000, y medios, ametralladores y artillería escontra simples fusiles máuser. Les dos hores de resistencia que los yanquis calcularen convirtiéronse en doce cuando la munición de los españoles s’escosó. Ellí cayeron Vara de Rey y munchos de los sos homes y el Caney convirtióse en sinónimu de resistencia militar demientres delles xeneraciones.

Dalgo dempués, casi al mesmu tiempu que’l gallegu pá de los Castro s’afincaba per aquelles tierres, un español llegó al Caney procedente de la República Dominicana y traxo consigo unes granes d’una variedá de mangu que llantó nel xardín de la so casa col resultáu de que en pocu tiempu los plantones dieron frutu. Yera’l qu’anguaño se conoz como mangu bizcochuelu, un prodixu de tastu y dulzura que nel oriente cubanu, au’l so plantíu s’estendió rápidamente, puese atopar per toes partes, tantu en xardines como en plantíos, anque la ineficiencia fondera del sistema d’economía centralizada del partíu comunista cubanu ye incapaz d’allugalu nos miserables mercaos habaneros.

Estos díes toa Cuba ta de fiesta, ye tiempu de mangos y, a lo menos per unos díes van podor llevase daqué a la boca y engañar la fame, porque en Cuba, nestos tiempos en que tol mundu namái paez prestar atención a lo rellacionao col covid, la miseria reinante poco tien qu’envidiar a los tiempos del “periodu especial”. Güei tamién falten melicines y proteínes, güei de nuevo la represión del réxime algama cotes máximes, güei otra vegada’l bloquéu y el supuestu asediu yanqui sirve como escusa pa caltener a la población n’estáu de sitiu. Demasiao quiciabes.

De nuevo esti branu y magar la pandemia dalgunos españoles van viaxar de turismu a la iskla y, encapsulaos dientro de la burbuya de los complexos turísticos, van tornar a casa ensin decatase del estáu de ruina física del país y postración moral y humana de los sos habitantes. Quiciabes el ron Caney se lo faiga, a unos y otros, más llevaderu.     

Raúl Suevos

A 11 díes vencíos de xunetu de 2021

Torna en castellán en repdiv.blogspot.com

La inmadurez europea

 

Sobro la Xunión Europea, y los sos antecedentes dende la Europa del Carbón y del Aceru, escribiéronse, y van siguir escribiéndose, toa mena de tribunes, ensayos y trataos; güei tamos énte un finxu nuevu que’l comisariu européu Thierry Breton, encargáu d’anunciaro el miércoles caberu 30, calificó como un cambéu de paradigma pa la Xunión. Veamos.

Tratábase d’anunciar la puesta en marcha del Fondu de Defensa Européu, 7000 millones d’euros en 23 estayes que van suponer un puxu terrible pa la industria y la dotación de la so Defensa; enteramente con fondos comunes europeos. Daqué que ye, ensin dulda, un reblincón descomanáu na construcción d’esa imprescindible Defensa, si ye qu’Europa quier, verdaderamente, convertise nun actor creyíble na seguridá mundial. Y si non, preparémonos pal so entierru.

Con esta iniciativa ye mui probable que demos un gran reblincu en cuantu a les nueses capacidaes, pero les armes y los equipamientos nun sirven de gran cosa si nun hai una voluntá nidia d’emplegalos. Vienme a la tiesta aquello que-yos dicíen a los oficiales cuando recibíen el so sable: “nun lo uses ensin razón nin lu envaines ensin honor”; colos exércitos asocede daqué paecío, necesiten una voluntá política que tenga bien definío’l significáu de la disuasión, el vieyu “si vis pacem para bellum”, dalgo que nun paez qu’asoceda nel casu européu.

Tamos en plenu cambéu del Pivote xeográficu de la historia dende Eurasia haza’l lloxanu Pacíficu. El gran xuego nun ta yá nes mesetes y altiplanos más allá de los Urales, too se va xugar na redolada del Mar de la China; ellí au esti gran país exerz la so presión y onde tarde, o quiciabes más ceo de lo que pensamos, va confrontar colos EEXX. Europa queda nuna esquina, anque ye una esquina mui ventosa que requier d’abrigu y paragues.

N’África el coctel de falta de gobernanza, yihadismu y presiones económiques chines xenera una constante presión haza’l norte que se manifiesta nuna presión migratoria creciente y n’estaos fallíos como Libia y Siria; too ello confluye, al traviés del Mediterráneu, n’Europa, con Grecia, Italia y España como paganos iniciales. Nel Cáucasu, Rusia y Turquía, yá presentes nos dos países mencionaos, caltienen la so histórica rivalidá como vimos recien nel Altu Karabaj. Ucrania, tres la mutilación de Crimea a manes de Putin, sufre la sangría del Dombas mientes güeya, dubitativa, haza la XE. Nel BálticU la creciente presión rusa fai que la OTAN caltenga un espliegue de unidaes nel que tamién España participa. Y pronto va llegar la hora del destemple árticu, colo qu’ello implica pa la xeopolítica mundial.

Los paladines de la voluntá europea paecen ser Merkel, a puntu de dise pa la so casa, y Macron, con un más qu’inciertu futuru eleutoral, lo que mos dexa, magar el Fondu Européu recién creáu, con una sensación d’afogón y medrana que namái un avance nidiu na construcción de la Europa política pue disolver. Veremos qué pasa.     

Raúl Suevos

En Xixón a 5 díes vencíos de xunu de 2021

Torna en castellán en repdiv.blogspot.com