Aldeanismu nel Muru de Xixón

Tien la tierra xixonesa una reLlación llarga col conceutu d’España, tan llarga como la mesma esistencia del país, pues non en baldre foron les intenciones avieses del moru Munuza les qu’unviaron al sur al bravu Pelayo; y too ello p“apoderase” de la bella Adosinda, lo que llevaría al so hermanu, al regresu y comprobada la coyunda, a tirase al monte en franca rebeldía, lo que daría como resultáu l’épicu alcuentru de Cuadonga y con ello la nacencia d’España tala como la conocemos.

Too esto flota na borrina de los tiempos, ente lleendes y cróniques mui posteriores. Nun sabemos la filiación de Pelayo, anque prestaríanos que fuere astur, nin tampocu si Adosinda denunció o más bien consintió, pero’l casu ye que fo asina, más o menos, como too escomencipió. Sedría esti mal recuerdu u otros motivos pero Xixón durmió mientres dellos sieglos pa la historia y nun sedría hasta Jovino que se tornó a falar de la villa, que dende entós dicin-y de Jovellanos. Tanto fo’l so rellumu que’l xenial pincel de Goya dedicó-y ún de los sos retratos primeros, “Jovellanos nel Arenal de San Lorenzo”, anguaño  la xoya del Museú de Belles Artes d’Uviéu, nel que vemos al prócer con un fondu de sableres y llamargues llindáu poles augues de la bahía. Ye fácil maxinase’l Muru nesi paisax nel que’l xeniu aragonés llantó al nuesu paisanu.

Güei vi ondexar altiva la bandera xixonesa no alto de la Escalerona, llugar principal de tola fachada marítima; una bandera que los playos reconocemos y amamos como propia pero que poco o nada diz a los nuesos visitantes. Detrás de la Ilesia de San Pedro hai otres dos que malapenes sirven pa facer más llamativa la triada qu’ondexa esplendida sobro la torre del Club de Regates, cola Bandera Española enmarcada poles de la Villa y del Principáu, como debe ser. Too ello fai estrañu esi ondexar solitariu y hasta ciertu puntu pueblerín sobro’l reló de la Escalerona.

En tiempos pasaos yeren les banderes del mundu les que daben  color a esi Muru estraordinariu que fai vulgares a malecones de mayor sonadía; supongo que dalguna reforma y el coste del so caltenimientu debió pesar pal so retiru y la nuesa actual orfandá vesilolóxica, pero nestos tiempos nos que tol mundu paez afanase por atraer el turismu haza la tierra propia, y cuando la bona xestión del virus, pol momentu, fai que visitantes nuevos conozan el nuesu paraísu nun dexa de ser chocante que’l ayuntamientu de nueso caltenga la Bandera de la nación fuera del Muru.

Les reformes del Paséu, non consensuaes, que s’entamen nestos díes, pueen ser una gran oportunidá para reparar lo que nun ye más qu’una imaxe aldeana.

 

Raúl Suevos

En Gijón a 28 díes vencíos de xunetu de 2020

Torna en castellán en repdiv.blogspot.com

Covid por bombes na campaña de branu británica

Demientres los años nos que los terroristes vascos s’alcontraben más fuertes, y l’Estáu más débil, yera habitual qu’aportáu’l branu llevaren a cabu una serie d’atentaos nes costes mediterránees, col envís de amedranar a los posibles turistes y d’esa miente mancar los intereses económicos d’España.

Costó bien d’años acabar con aquelles barbaridaes, un trabayu que’l so esfuerciu principal realizaron los Servicios d’información de la Guardia Civil. Unos estragos que teníen ecu inmediatu nes páxines primeres de la prensa sensacionalista británica, que describía la situación como dramática anque la realidá fuere non tan preocupante, y del propiu gobiernu de los fios de la Gran Bretaña, que solía entainar en desaconseyar el viaxe pente medies del so Ministeriu d’Asuntos Esteriores. El resultáu siempres yera’l mesmu, una cayida nos fluxos turísticos y con ellos de los ingresos económicos.

Nesti añu malfadiáu del Covid acabamos d’atopanos con una situación paecida anque nesta oportunidá nun son los tabloides ingleses quienes tomen la iniciativa sinon el propiu gobiernu de les Islles; y fáenlo de forma más radical pues declaren una cuarentena pa toos aquellos que tornen al Reinu Xuníu dende la Península, daqué que, ensin dulda, va anular munchos planes de viaxe qu’agora van buscar otros destinos. La midida adoptóse anueche, ensin alerta previa nin tiempu pa camudar de ruta a toos aquellos que, nes dos direiciones, aniciaben los sos periplos. Una xera.

Los británicos dexen cada añu n’España más de 8500M d’euros, son más de 18M de viaxeros, esto ye, el mayor emisor individual de turistes haza España y la so ausencia va facer que munchos de los pequeños negocios que malapenes aguantaron el confinamientu, esperando desquitase na campaña de branu, véanse aboquiaos al pieslle definitivu. Y too ello metanes les entrugues, ensin respuesta, que munchos se van facer buscando una esplicación pa esti desastre. Pero nun la hai ¿O sí?

Ente’l Gobiernu español y el británicu hai delles coincidencies. La más festiva ye que dambos presidentes son unos fios de…, nel casu inglés, John-son, fiu de Xuan, y nel español Sánch-ez, fiu de Sancho, dambos son clásicos apellios patronímicos, pero les coincidencias series van más allá. Dambos s’atopen dirixendo los gobiernos que peor tienen actuao énte la crisis, van segundu y terceru na lista de muertos por millón, tres Bélxica que se distingue pola seriedá nel cómputu de fallecios por Covid.

Una triste coincidencia la de Londres y Madrid que nun despinta’l paralelismu con aquelles campañes de los terroristes vascos.  

Raúl Suevos

A 26 díes vencíos de xunetu de 2020

Torna en castellán en repdiv.blogspot.com

Butafuori na sablera de San Lorenzo

Los locales d'ociu nocherniegu tienen ente los sos asalariaos a unos personaxes, grandes como armarios y xeneralmente traxeaos d’oscuru que cola so sola presencia, actitú amenazante o, llegáu’l casu, l’usu de la so descomanada masa corporal, encarguense d’enzacar el pasu a quienes nun algamen el estándar de prestancia personal que’l llocal esixe o, cenciellamente, entren-yos pol güeyu esquierdu. Dientro d’estes importantes responsabilidaes tamién ta la d’echar fuera del negociu a enfilaos, pesaos o alborotadores.

N’Italia, que la so cultura yá yera vieya cuando’l restu d’europeos aniciaba a ser consciente de lo qu’eso significaba, tienen una especial gracia pa dar nome a dalgunes de les modernes procesiones que van apaeciendo nel nuesu escurrir d’urbanites. A los manteros ellí dicin-yos “vucumpra” porqu’eso, precisamente, ¿vuoi cumprare?, ¿quies comprar? Ye la frase qu’usen pa entamar esa peculiar rellación comercial. A los qu’echen fuera de les discoteques, buttare fuori, echar fuera, dicin-yos eso, butafuori. Ye una llingua, la italiana, práutica y cenciella.

Güei, paseando la playa por aquello que mi madre me dicía, que los baños de mar son bonos pa la circulación anque sólo se mueyen les piernes, tuve ocasión de ver un espectáculu insólitu. A la altura de la Escalerona, los controladores d’aforu, uniformaos colos sos chalecos reflectantes y el so “sereno” al llombu –supongo qu’heriedu municipal de dalguna previa operación fallida- diben pidiendo al personal que, debío a la subida de la marea y el consiguiente amontar de la densidá personal na zona, abandonaren el llugar.

L’aspeutu estraordinariu del acontecimientu ye que tol mundu recoyía les sos pertenencias y mansamente colaba haza esa maraviella del art decó xixones que representa la familiar Escalerona. Amezan lo anterior col usu masivu de la mázcara, potenciáu en dellos casos pola presencia de la policía municipal ensin dulda; l’escelente control que la Sanidá asturiana ta llevando colos contaxos del covid que güei dan 17 contaxaos y setenta y tantos controlaos rellacionaos colos anteriores, y vamos llegar a la conclusión de que quiciabes somos una sociedá moderadamente responsable. Afortunadamente.

Tien Asturies énte sí la más terrible oportunidá de posicionar la so marca nel mundu. Si logramos caltener a raya al virus, como hasta agora, vase falar muncho y bien de la rexón, lo que ensin dulda vanos aportar crecimientu turísticu n’años vinientes pero, muncho más importante, vanos presentar énte’l mundu como un bon llugar pa invertir, pos los capitales busquen, énte too, sociedaes formaes y responsables, lo que reflexamos anguaño. Nun lo estropiemos.

Raúl Suevos

A 23 díes vencíos de xunetu de 2020

Oscenidá na Moncloa

Defín la Real Academia de la Llingua Española la obscenidá como daqué qu’ofiende al pudor, y a esti con tres pallabres, honestidá, modestia, o recatu. Vien too esto a cuentu de les imáxes que güei aporten los telediarios col nuesu presidente de gobiernu, el doctor Sánchez, siendo recibíu polos sos ministros con un pasillu d’aplausos a la so llegada de la maratoniana reunión del Conseyu Européu en Bruseles.

Creo recordar que la nuesa dómina de mayor éxito nos concellos bruselenses coincidió cola presidencia de José María Aznar qu’ellí allegaba con un grupu d’espertos en teoría de xuegos y casi siempres algamaba a salise cola de so, para beneficiu del país. Yeren tiempos nos qu’España yera referente occidental en munchos aspeutos, les sos empreses abríense a los mercaos esteriores y los sos capitales viaxaben a la busca de negocios d’inversión. Depués llegaría’l mal pasu de la Segunda Guerra d’Iraq, nunca abondo esplicáu, que sedría entá peor rematáu yá na presidencia de Zapatero. Dende entós, por más que la comunicación institucional trate de convencenos de lo contrario, nun facemos otra cosa que dir descendiendo lenta ya inexorablemente pola pendiente del descreitu.

Nesti llargu Conseyu Européu otra vegada los países del sur xugaben de pinxones, especialmente Italia y España, puesto que Grecia y Portugal paez que ficieron los sos deberes. Na anterior crisis Rajoy llogró evitar la intervención europea y les pernomaes y vergonzoses visites de los espertos europeos, encargaos de comprobar que les reformes esixies se cumplíen a raxatabla enantes de desbloquexar los sucesivos tramos de subvenciones europees. Magar too, la so primer presidencia foi un calvariu, que visto lo visto nun mos tien servío pa meyorar les nueses finances.

El doctor Sánchez recibe, aparentemente con agrado, los aplausos de los sos ministros por dellos 140 mil millones d’euros, ente prestamos y subvenciones, a devolver los primeros y xustificar les segundes; una xustificación, mediante propuestes de reformes previes de les naciones receutores, que van ser aprobaes, o non, pol Conseyu Européu; propuestes que van suponer una serie de reformes en rellación con pensiones, reforma llaboral y rigor presupuestarios que choquen frontalmente col programa sociocomunista del gobiernu de nueso, y que van someter al mesmu a unas tensiones que mos van llevar a la ciudadanía per un llargu camín de respigos a lo llargo de los meses vinientes. 

Podemos maxinar quienes van distrayer los detalles de la operación, los detalles desagradables; la Corona ensin dulda, pues tiénse convertío anguaño nel pararrayos de tolo que’l gobiernu, nes sos dos almes, nun quier que se fale, pero va haber otros, como la Patria de los cuarteles de la Guardia Civil que güei, de sópito, paez molestar. Todo sirve y va servir pa que’l nuesu presidente avance de victoria en victoria y ente aplausos haza ¿la derrota final?

Raúl Suevos

A 21 díes vencíos de xunetu de 2020

Torna en castellán en repdiv.blogspot.com

La Corona, trampantoxu pal fracasu del gobiernu

El trampantoxu ye una téunica pintórica que vien de mui antiguu, tiempos griegos y tamién romanos, pero que recuperaron los franceses en sieglos recien y dieron-y nome. Nós españolizamoslo pa “trampiar al güeyu”. Trátase, en definitiva, d’una ilusión óptica que mos despinta la realidá, casi siempres pa meyorala, y asina podemos facer d’una paré humildosa un paisax marítimu o de montaña maraviosu. Búscase eso, distrayer l’atención del observador, de face-y ver una realidá que nun esiste.

Estos díes asistimos n’España a daqué paecío. Los miembros del gobiernu sociocomunista que dirixe la nación nun quieren que veamos la situación real que padecemos, nin les responsabilidaes que a ellos-yos competen. El guelpe caberu, escaeciéndomos pel momentu del Covid, da-lu’l presidente del Conseyu Européu que propón condiciones nueves pa aportar a los 750 mil millones d’euros de la Xunión Europea y que van suponer, si asina s’aprueben, unes condiciones que van tirar por tierra los planes d’esti gobiernu, pos afeuten al sistema de pensiones, reforma llaboral y rigor presupuestariu.

Ayeri la vicepresidenta Solbiñó sufrió nes sos carnes y prestixu les consecuencies de les falcatrues económiques llevaos a cabu y anunciaos pol so xefe de files, y asina, nel momento caberu quedóse ensin la piel del osu que’l so presidente yá vendiera. Tamos énte un continuum de plantegamientos y decisiones qu’ataquen los principios de la ortodoxia económica, referentes pa munchos de los nuesos socios, especialmente nel norte d’Europa.

Nel planu más pedestre, al que paez tar abonáu’l nuesu vicepresidente y principal artista del trampantoxu monárquicu, asistimos a la estrueldosa caída d’un partíu políticu, Podemos, que fo ablayadura del mundu occidental en cuantu a la rapidez del so ascensu. L“home” vuelve, una y otra vegada, a cayer nos mesmos erros a los que-y conduz una sobeya ensin sofitu nos fechos, y bombardéamos con una sucesión de purgues de discrepantes, Errejón, Bescansa, Espinar y un llargu etcétera. Sigue cola descomposición de les sos agrupaciones ente’l diktat de la direición y subsiguiente  caída eleutoral nes estremaes rexones autonómiques. Too ello arreglao colos sos enriedos amoroso/políticos, nos que les sos pareyes suben y baxen nel escalafón del partío acordies cola relación col líder, y el remate d’un casoplón dignu del  fiu d’un gran capitalista. Una imaxe políticamente desastrosa que necesita ser desenfocada con otra más fuerte, y ehí tenemos a la Corona.

Al xefe del gobiernu tampoco ye que les coses-y vayan muncho meyor. El so aportar al poder llegó como resultáu d’un pautu bizantinu contranatural col únicu oxetu de desaloxar al inquilín de Moncloa. Depués, unas eleiciones convocaes dende’l poder namái-y dieron una victoria pírrica que va ser puesta aínda más n’evidencia colos probes resultaos que s’esperen en Galicia y el País Vascu. El doctor Sánchez tamién necesita que se fale d’otra cosa, necesita un aliviu, al coste que seya.

La Constitución Española ye de les nomaes “fuertes”, esto ye, necesita de mayoríes mui cualificaes pa entamar siquier la so modificación; siguies de disolución de Cortes, referéndum y eleiciones nueves. Un camín abondo llargu pa qu’un gobiernu tan débil ya inestable como’l de nueso namái se pueda plantegar el so cambéu dende l’asunción de que se trata d’un trampantoxu que distraiga a la opinión pública mientres esos meses calorosos del branu. Si la Corona s’esgasta pol camín ¿A quién-y importa?

Pa la seronda vamos trepar cola verdadera crisis, la económica, la recayida del virus y, quiciabes, la disolución de les Cortes, y entós nun va haber trampantoxu que valga.   

Raúl Suevos

A 10 díes vencíos de xunetu de 2020