El cuentu de la princesa

EL CUENTU DE LA PRINCESA

Va yá unos cuantos años cayóme enriba la xera d’amosar a una princesa xordana los salones nobles del Palaciu de Buenavista, see del Cuartel xeneral del Exércitu.Avisaronme con un par d’hores d’antelación y namái tuve tiempu pa lleer un par devegaes el cartafuellu n’inglés que, per aquel entós, yá taba editáu. Un bon intencionáu díxome que yera una amazona de sonadía internacional.

El casu ye que yo aviéme pa lo peor pues el mio ingles yera absolutamente indecente,güei ta ente esi nivel ya’l so antónimu, non muncho más. Pa cuando aportó la princesa, n’uniforme de coronel del Exércitu xordanu y unos cuantos acompañantes, yo dábame yá por dimisionariu pero aínda asina púnxeme a la xera y de salón en salón fui esplicándo-y les notables obres y mobiliariu qu’ellí s’atesoren, con especial atención a tolo rellacionao col caballu. A la pequeña estatua ecuestre d’Alfonsu XIII, obra de Benlliure, creo que-y dediqué cuasi un cuartu d’hora y nun me paeció que la princesa mostrara especial entusiasmu pero achaquelo a la mio probitú llingüística.

Pasaos unos díes, y cuando yá entamaba a escaecer el mal tragu, daquien mos informó que la nuesa princesa nun yera l’amazona; la que nós acoyimos yera la so hermana pequeña, la otra yera Haya que nestos díes ocupa les páxines los periódicos por tenese fugao de la so casa y maríu allá en Dubái, nos Emiratos árabes. El puntu de xunión de les dos hermanes colos caballos paez que n’ocasiones atopabase en Xixón au entá les recuerden cuando una participaba nel concursu de saltos internacional y la otra animabala dende la grada, dempués, na tarde noche, dambes, dicen que degustaben la sidra y la gastronomía asturiana con fervor autenticu, pero quién sabe…

Al home d’Haya, l’emir de Dubái, yá se-y escapare una fia va dalgún tiempu, anque foi“prindada” y devuelta a los brazos del so pá, y ye que les xaules, anque d’oru, xaules son. Haya, que diz la prensa que yera la 6ª esposa, anque nun sé si l’ordinal representa un puestu más nun serrallu o la última d’una serie, marchó colos sos dos fios y 40 millones de dólares, pa un pasar, a vivir a Londres, si bien nun tenemos noticies si ye que, como una moderna Sherezade, fartucóse de conta-y cuentos al emir y prefirió una vida occidental enantes que siguir reviciando de les maravielles dubaities, que la so capital pasa por ser la ciudá más cosmopolita del mundu.

Los países de relixón musulmana, y en xeneral quienes profesen esa relixón y tienen capacidá d’espresión nos medios de comunicación, ofendense cada vegada que n’occidente se faen reproches 

sobro la situación de la muyer nes sociedaes de so, anque la so situación seya namái un elementu más de cómo s’atopen los drechos humanos en munches d’ellas. La fuxida de dalgunes de les sos fémines más notories solo representa una arenuca nuna gran sablera; per detrás d’elles queda un océanu de sufrimientos y de falta de drechos y, polo que mos toca, bien faríamos nes nueses sociedaes en poner cotu y remediu a actitues, xestos y elementos sociales que, de la mano de les actuales y munches vegaes forzaes corrientes migratories, pueden aniciar a  asitiar raigaños n’Europa y poro n’España.  

En Xijón a 2 de xunetu de 2019

Raúl Suevos

repdiv.blogspot.com