Dragones en Trubia, y en Xixón capitanes

DRAGONES EN TRUBIA, Y EN XIXÓN CAPITANES

El domingu más averáu al 14 de xunetu ye’l día que los franceses celebren l'aniversariu la Bastilla, aniciu d’una revolución que diba camudar el mundu, con un grandiosu desfile nos Campos Elíseos de Paris. Esti añu, ente otres unidaes, figura como invitáu d’honor l’Eurocuerpu, el Cuartel xeneral de Cuerpu d’Exércitu que, con see na ciudá d’Estrasburgu y Francia, Bélxica, Alemaña, España y Luxemburgu como naciones marcu, meyor simboliza l’oxetivu de construcción d’una defensa dafechu europea, al que tan allegáu s’amuesa’l presidente Macron dende’l so aportar al poder en Francia.

Pel llau español, nel Eurocuerpu, tán destinaos unos 130 homes y muyeres que al so mandu atópase’l xeneral de división Fernando García Blázquez en cuantu Xefe del Estáu mayor. Toos ellos desendolquen los sos cometios n’inglés como llingua de trabayu y dende la so nacencia tien esplegao en Bosnia, Kosovo, Afganistán o Mali. Los sos oficiales de carrera, llueu, van entamar a ser inxenieros d’organización industrial porque esi ye’l grau nel que los formen na Academia Xeneral Militar de Zaragoza.

Vien lo anterior a cuentu’l congresu qu’esta selmana cabera desendolcaron los inxenieros d’organización industrial nel Principáu, del que la prensa dio cuenta incidiendo de pasu en que la Universidá d’Uviéu anunció l’entamu, nesti yá próximu cursu, d’esta titulación nueva na Escuela politéunica de Xixón y pa la que les preinscripciones auguren un ésitu total. A min llamóme l’atención que naide cayera na cuenta qu’esta titulación ye na que se formen los nuesos oficiales; los que nutren y van nutrir les files del Reximientu del Príncipe nº 3 y tamién les del Eurocuerpu, les de la Defensa Europea nel futuru.

España foi pionera en ver la importancia d’esti grau pa la formación militar y yá va 9 años que se camudaron los planes d’estudiu p’adautalos a la Europa del Plan Bologna y al futuru. L’ingresu faise pente medies un concursu oposición nel que la parte concursal puntúa les asignatures de la carrera que los opositores traigan yá aprobaes polo que ye mui posible que dalgunos de los futuros alumnos xixoneses opten por dar el saltu dendeViesques a Zaragoza; lo que daría tamién a Asturies la posibilidá d'amontar la representación de la rexón nel cuadru d’oficiales nacional, siempres per baxo la tasa que-y correspondería. A ver qué pasa, a ver si vamos tener capitanes de Xixón.

Los dragones representen el modelu nuevu de vehículu de combate sobro ruedes 8x8 pala Infantería española. El BMR lleva más de 40 años per esos mundos ensin Dios, ellí au España tien participao en misiones esteriores, Bosnia, Kosovo, Afganistán, Iraq o Líbano. Dalguna voi escaecer. En toes se señaló que yá nun respondía a les necesidaes del campu de batalla modernu pero nun foi hasta qu’en Líbano un coche-bomba acabó cola vida de seis de los nuesos soldaos que’l gobiernu se punxo en marcha. Agora, deforma irregular, pues nun taría nes atribuciones d’un gobiernu en funciones l’aprobar esti tipu de gastu, apruebase la puesta en marcha del proyeutu que va resultar en 284 dragones que darán proteición y nueves y mayores capacidaes a les nueses unidaes d’Infantería.

Un sistema d’armes como esti consta de estremaos y complexos procesos de fabricación pero paez ser que la parte más importante vase desendolcar en Trubia, en Santa Bárbara sistemes, lo que, xunto colos mecanizaos y sofisticaos Pizarros pal Arma de inxenieros yá en marcha, va dar como resultáu una importante carga de trabayu demientres dellos años que va servir pa desaniciar en parte la tráxica desindustrialización de la rexón.Bienvenios los dragones, aunque nun vuelen.

Interesante qu’esta mesma selmana los nuesos vecinos santanderinos crearen el primer cluster d’industries de la defensa con implicación d’universidá ya instituciones. ¿Va serqu’ellí hai más 

iniciativa?    

14 de xunetu de 2019

Raúl Suevos

Coronel d’Infantería (r)

Repdiv.blogspot.com