Caza mayor, caza al rei

CAZA MAYOR, CAZA AL REI

Falar de caza mayor y tamién de rei paez que mos lleva al rei Juan Carlos, pero non, nun falamos d’él, falamos del rei, el rei n’exerciciu, el rei Felipe VI, que va unos meses debió cometer el mayor delitu que se podía facer naquelles feches, les del intentu de golpe d’estáu de los mandamases catalanes.

Foron unos díes abondo estraños, media España, o más, tabemos col coral encoyíu güeyando como unos pocos queríen romper el país au ñacíeramos y a naide, de los que mandaben o queríen mandar, paecía que-y esmoleciera asuntu talu. Nun aporto a maxinar cómo taríen los catalanes non independentistes que se veíen ensín nación nin pasaporte.

El casu ye que’l rei vieno damos tranquilidá. Un discursu firme, claru y breve, nel que echaba-yos en cara la falta de llealtá institucional a les autoridaes catalanes y, quiciabes lo más importante, dicía-yos, a esos catalanes que tamién se sienten españoles, que nun taben solos, que podíen contar con él y colos demás españoles, o cola mayoría polo menos.

El discursu foi como un aliendu pal morrebundu. El gobiernu, qu’andaba como sonáu, o eso paecía, garro’l pasu, ya unos díes dempués, nuna manifestación convocada en Barcelona tiempu enantes, un millón de persones paseóse pol centru la ciudá proclamando la so españolidá. Hasta los políticos non independentistes, de tolos colores, se dexaron ver. Y la culpa teníala’l rei.

Esta ye la clave de la cacería anguaño. El rei dio-y la vuelta al afandu xeneral y los independentistes, hasta yo lo pueo pescanciar, nun-y lo perdonen. Poro’l frayatu de rellaciones cola corona del aniciu del branu y poro la reprobación del rei estos díes caberos nel parllamentu catalán.

Lo llamativu d’esto último ye que la que propuesta de declaración vieno de la mano de los Comunes, esto ye, del Podemos catalán, partíu que se declara republicanu, cosa llexítimo,  y porque diz qu’ellos nun lu votaron, lo que me paez una mazcayada. Votélu yo’l día que voté la Constitución, y como yo la gran mayoría de los españoles de la dómina, especialmente los catalanes, y nun me paez que les naciones vayan votando la so constitución con cada xeneración.

Aportaos equí podemos pensar que too esto forma parte del xuegu políticu normal, que la política ye asina. Lo anormal ye’l silenciu del gobiernu anguaño, que güei, por fin, dio l’anuncia de que va pidir l’anulación de la reprobación catalana nel Constitucional, pero too ello ensín una pallabra más fuerte qu’otra, nun vaya ser que daquíen s’anoxe y ponga en peligru l’aprobamientu los presupuestos.

Son coses que pasen cuando se gobierna en minoría, yá-y pasaba al señor Rajoy y pasa-y muncho más al señor Sánchez que tien ainda menos diputaos, y nós, mentanto, asistimos, como espectadores ensín xuegu, a una cacería na que la pieza mayor paez que seya’l rei, y too por allugase del llau de los españoles, de la mayoría creyo, ¿O non?

Raúl Suevos

En Xixón a 16 d’ochobre de 2018