Anda desatáu’l mundiu de los
analistes políticos. Los de casa, los del asuntu nacional. Y ye que, una vegada
más, el presidente de nueso tien tirao pela cai de metanes, nesti casu tomando’l
rol de campeón del drechu internacional, y enllenándose la boca de
manifestaciones guapes sobro la bondá de la diplomacia pa llevar la paz al mundiu.
Too ta nel manual.
Diz el nuesu xefe de gobiernu que
l’aición de Trump, secundáu por Netanyahu, va escontra les normes del drechu
internacional, anque dalgunos piensen que nesi asuntu, por aquello de la guerra
xusta y la so fía, la guerra preventiva, habría muncho que discutir, sobremanera
si tenemos en cuenta’l calter terrorista del réxime de los ayatolás y la so
intención de siguir col desendolcu de la so bomba nuclear, pa la que yá-y sobren
vectores llanzadores, y ello, dexando de llau la sangre de ciudadanos iraníes
qu’aínda corre peles cais de les sos ciudaes. Namái él paez pensala asina per
estos pagos europeos.
El corolariu más radical d’esta
posición nuesa tien sío la negativa pal usu de les bases norteamericanes n’España,
lo que tien llevao a mover los aviones cisternes a la base alemana de Ramstein,
unos 2500 km más lloñe de la so zona d’aición actual, lo que paez que tien
cabreao especialmente al ogru anaranxáu de Washington. Una situación pola que yá
pasamos nel pasáu y que nun-y llevará a romper rellaciones con nós pero que, pón
más en valir al so aliáu del sur, Marruecos, roblante de los Alcuerdos d’Abraham,
colos que entamó esta movida va yá un par d’años en Gaza. Ye lo qu’hai.
Tampocu tien duldao’l nuesu
presidente en desmarcase de la posición europea, totalmente del llau de
Washington tres los bombardeos iraníes sobro Chipre, y magar tener llargao en
Munich nun va muncho sobro les escelencies de la Defensa europea, de la que va
quince díes se dicía valedor. Sabe que va ser Europa’l parapetu pa les menacies
de Trump.
Dalgún va pensar que Pedro
Sánchez perdió’l norte, o l’oremus, pero paecen escaecer el so Manual de
resistencia, que ye la so biblia política auténtica, col so Credu basáu na
supervivencia, qu’agora pasa por caltener esos cien diputaos, a costa de lo que
seya, lo que-y permitiría, llegao’l casu, siguir como secretariu xeneral del
PSOE y aforáu nel Congresu. Les sos posiciones desnortaes en política
internacional conciten l’aplausu de les esquierdes regresistes y aseguren-y una
posición de mínimos para lo que va venir. Lo que-y pase a España se la sopla.
Raúl Suevos
A 3 díes vencíos de
marzu de 2026
No comments:
Post a Comment